დონალდ ტრამპმა ავიაკატასტროფაში დაღუპულთა ოჯახებს მიუსამძიმრა

აშშ-ის პრეზიდენტმა, დონალდ ტრამპმა ვაშინგტონში, რეიგანის ეროვნულ აეროპორტთან მომხდარ ავიაკატასტროფაში დაღუპულთა ხსოვნას წუთიერი დუმილით პატივი მიაგო და მსხვერპლის ოჯახის წევრებს მიუსამძიმრა.

პრეზიდენტმა შემთხვევა ტრაგედიად მოიხსენია და განაცხადა, რომ მთელი ღამის განმავლობაში, ინციდენტის ადგილზე უწყვეტ რეჟიმში მიმდინარეობდა სამძებრო-სამაშველო ოპერაცია, რომელშიც ჩართული იყო როგორც ადგილობრივი და ფედერალური მთავრობა, ასევე შეიარაღებული ძალები, სანაპირო დაცვა.

„პირველი ლედის, ჩემი და 340 მილიონი ამერიკელი სახელით, ჩვენი გულები გატეხილია და თქვენ გვერდით ვართ, ვლოცულობთ თქვენთვის“, – განაცხადა ტრამპმა.

როგორც ტრამპმა აღნიშნა, მიუხედავად იმისა, რომ ამ ეტაპზე არ იციან, რამ გამოიწვია შეჯახება, მათ აქვთ გარკვეული მოსაზრებები და გამოძიება დაადგენს მომხდარს, რათა უზრუნველყონ, რომ მსგავსი რამ აღარასდროს განმეორდეს.