განათლება
1674391756
უნდა ჰქონდეთ თუ არა ბავშვებს საშინაო დავალება - რას ამბობს სპეციალისტი
ჰუმანური პედაგოგიკის ფუძემდებელი, აკადემიკოსი შალვა ამონაშვილი ბავშვის ყოველდღიურ ცხოვრებასა და მის ფსიქოლოგიაზე საუბრობს. აკადემიკოსი განმარტავს, უნდა ჰქონდეთ თუ არა ბავშვებს საშინაო დავალება.
1673935450
მიხეილ ჩხენკელმა ჩინეთის სახალხო რესპუბლიკის ახლად დანიშნულ ელჩს უმასპინძლა
საქართველოს განათლებისა და მეცნიერების მინისტრმა მიხეილ ჩხენკელმა ჩინეთის სახალხო რესპუბლიკის ახლად დანიშნულ ელჩთან ჭოუ ციენთან გაცნობითი ხასიათის შეხვედრა გამართა. მინისტრმა ელჩს თანამდებობაზე დანიშვნა პირადად მიულოცა და თავის საქმიანობაში წარმატებები უსურვა.შეხვედრის ფარგლებში მიხეილ ჩხენკელმა საქართველოში განათლების ყველა საფეხურზე მიმდინარე რეფორმებზე ისაუბრა და ჩინეთის სახალხო რესპუბლიკის ელჩს ბოლო წლებში განხორციელებული მასშტაბური საგანმანათლებლო პროექტები გააცნო.მინისტრმა ჭოუ ციენს მადლობა გადაუხადა თანამშრომლობისთვის და იმ ერთობლივი პროექტებისთვის, რომლებსაც სამინისტრო ჩინეთის სახალხო რესპუბლიკასთან პარტნიორობით ზოგადი და უმაღლესი განათლებისა და მეცნიერების მიმართულებით უკვე მრავალი წელია წარმატებით ახორციელებს. მიხეილ ჩხენკელმა განაცხადა, რომ საქართველოსა და ჩინეთის უნივერსიტეტებსა და სამეცნიერო-კვლევით დაწესებულებებს მრავალწლიანი მჭიდრო პარტნიორობა აკავშირებთ, რაც ორ ქვეყანას შორის არსებული მეგობრობის თვალსაჩინო მაგალითია.საუბრისას მხარეებმა საქართველოსა და ჩინეთის სახალხო რესპუბლიკას შორის არსებული პარტნიორობის გაღრმავების პერსპექტივები განიხილეს და სამეცნიერო კავშირების გაძლიერების საკითხებზეც იმსჯელეს.თავის მხრივ, ჩინეთის სახალხო რესპუბლიკის ელჩმა მადლობა გადაუხადა მიხეილ ჩხენკელს მხარდაჭერისთვის და საქართველოს განათლებისა და მეცნიერების სამინისტროსთან აქტიური თანამშრომლობის მზაობა გამოთქვა.მხარეებს შორის შეხვედრას ჩინეთის სახალხო რესპუბლიკის საელჩოს ატაშე ჩუიბინ ჩენი ესწრებოდა.
1673609460
ქედის მუნიციპალიტეტის 2023 წლის ბიუჯეტის პროექტში გაწერილია ის მიმართულებები, რომლებიც განათლების წახალისების მიზნით უნდა განხორციელდეს. დოკუმენტის თანახმად, „იმისათვის, რომ კიდევ უფრო მეტად ამაღლდეს მოსწავლისა და სტუდენტის სწავლის ხარისხი, ძალზედ მნიშვნელოვანია მათი მოტივირება. პროგრამის ფარგლებში განხორციელდება წარმოდგენილი განცხადებების მიღება, განხილვა და დაზუსტება. შერჩეულ ბენეფიციარებზე წლის განმავლობაში ერთხელ გაიცემა სტიპენდია, რომლებსაც ბოლო ორი წელი ნასწავლი აქვთ ქედის მუნიციპალიტეტის საჯარო სკოლაში, ამასთან მოსწავლეს უნდა ჰქონდეს მინიჭებულიოქროს ან ვერცხლის მედალოსანის სტატუსი. ასევე ქვეპროგრამის ფარგლებში განხორციელდება იმ სტუდენტთა წახალისება, რომლებიც ბოლო ორი წელი სწავლობდნენ ქედის მუნიციპალიტეტის საჯარო სკოლაში და ერთიან ეროვნულ გამოცდებში მოიპოვებენ სახელმწიფო (50 %, 70%, 100 %) გრანტს და ჩაირიცხებიან საქართველოს ტერიტორიაზე არსებულ, ავტორიზებულ უმაღლეს საგანმანათლებლო დაწესებულებებში აკადემიური უმაღლესი განათლების პირველი საფეხურის უმაღლეს საგანმანათლებლო პროგრამებზეშენიშვნა: ქვეპროგრამის ფარგლებში სტიპენდია გაიცემა შემდეგნაირად - სტუდენტი, რომელიც ერთიან ეროვნულ გამოცდებში მოიპოვებს 100 % გრანტს, სტიპენდიის სახით ერთჯერადად ჩაერიცხება 1000 ლარი, 70% -ის შემთხვევაში 700 ლარი, ხოლო 50% - 500 ლარი.მოსწავლეს, რომელსაც მიენიჭება ოქროს მედალოსანის სტატუსი, წლის განმავლობაში ერთხელ სტიპენდიის სახით ჩაერიცხება 500 ლარი, ხოლო ვერცხლის მედალოსანს 400 ლარი.“
1672474795
უფასო პროგრამები და ვაუჩერები სკოლის მოსწავლეებისთვის, რომლებიც 2023 წლიდან ამოქმედდება - დეტალები
დეკემბრის ბოლოს, თბილისის საკრებულომ დედაქალაქის 2023 წლის ბიუჯეტი დაამტკიცა და მისი მოცულობა 1 მილიარდ 632 მილიონი ლარია.EDU.ARIS.GE-მ დოკუმენტში განათლების მიმართულებით, კერძოდ კი სკოლის მოსწავლეებისთვის განსაზღვრული სხვადასხვა პროგრამების შესახებ მოიძია ინფორმაცია.როგორც 29 დეკემბერს გამოქვეყნებულ დოკუმენტში ვკითხულობთ, პირებს, რომელთა შორისაც იქნებიან 18 წლამდე სასკოლო ასაკის სოციალურად დაუცველი მოსწავლეები, უფასო სწავლება შეეძლებათ, ახალგაზრდობის სახლებში, მოსწავლე ახალგაზრდობის ეროვნულ სასახლეში, სპორტულ სკოლებსა და საცურაო აუზებზე.რაც შეეხება გამოყოფილ თანხებს, უფასო სწავლება სპორტულ სკოლებში და საცურაო აუზებში-688,5 ლარით დაფინანსდება. ხოლო, ხელოვნების სკოლებში მოსწავლეთა უფასო სწავლებისთვის 980,0 ლარი დაიხარჯება.თბილისის ბიუჯეტის დოკუმენტში, უფასო სახელოვნებო განათლების მიღებისთვის კონკრეტული საგანმანათლებლო დაწესებულებების ჩამონათვალი და მიმართულებებიც არის გაწერილი:ოთარ თაქთაქიშვილის სახელობის N19 ხელოვნების სკოლაში – საორკესტრო ინსტრუმენტების სპეციალობით მოსწავლეთა უფასო სწავლება;შოთა შანიძის სახელობის N20 ხელოვნების სკოლაში – საორკესტრო ინსტრუმენტების სპეციალობით მოსწავლეთა უფასო სწავლება;ზურაბ ანჯაფარიძის სახელობის N28 ხელოვნების სკოლაში – ქართული ხალხური საგუნდო ხელოვნების განყოფილებაზე მოსწავლეთა უფასო სწავლება;ჰამლეტ გონაშვილის სახელობის N29 ხელოვნების სკოლაში – თანამედროვე და ტრადიციული მიმდინარეობის განხრით მოსწავლეთა უფასო სწავლება;ალიოზ მიზანდარის სახელობის N1 ხელოვნების სკოლის საგუნდო ხელოვნების განყოფილებაზე (კაპელა) მოსწავლეთა უფასო სწავლება;გარდა ამისა, დოკუმენტში წერია, რომ განხორციელდება წარმატებული სპორტსმენი ბავშვების ფინანსური წახალისებაც, რისთვისაც 429 ათასი ლარია გამოყოფილი.„ქვეპროგრამის ფარგლებში განხორციელდება სპორტის სხვადასხვა სახეობებში მოასპარეზე 18 წლამდე ასაკის პერსპექტიული სპორტსმენების ფინანსური წახალისება, რაც გაზრდის მათ მოტივაციას სასწავლო-საწვრთნო პროცესის მიმართ“, – ვკითხულობთ დოკუმენტში.დაფინანსება გაითვალისწინეს შეზღუდული შესაძლებლობების მქონე ბავშვთა და მოზარდთა საკურორტო მომსახურეობისთვისაც, რისთვისაც 1,616.6 ლარია გამოყოფილი.„დაფინანსება ხორციელდება ვაუჩერული პრინციპით, რომლის ფარგლებშიც მოსარგებლეები თავად აირჩევენ მომსახურების მიმწოდებელს. ვაუჩერის ოდენობა და გაცემის წესი განსაზღვრული იქნება ქალაქ თბილისის მუნიციპალიტეტის მთავრობის განკარგულებით, ხოლო განცხადების და ვაუჩერის ფორმას ამტკიცებს ქალაქ თბილისის მუნიციპალიტეტის მერიის ჯანდაცვისა და სოციალური მომსახურების საქალაქო სამსახური“, – განმარტებულია ბიუჯეტის დოკუმენტში.დაფინანსება გათვალისწინებულია მცირე საოჯახო ტიპის სახლებიდან გასული, სრულწლოვანი პირების დამოუკიდებელი ცხოვრების ხელშეწყობისთვისაც, ოდენობა 36 000 ლარი;როგორც დოკუმენტში ვკითხულობთ, ამ მომსახურეობით ისარგებლებენ 18-დან 21 წლამდე ასაკის ბენეფიციარები, რომელთა დაფინანსებაც მოხდება არამატერიალიზებული სახით-ვაუჩერით, რომლის ღირებულებაც 500 ლარია.„პროგრამა ხორციელდება ვაუჩერული პრინციპით, რომლის ფარგლებშიც მოსარგებლეები თავად აირჩევენ მომსახურების მიმწოდებელს. ვაუჩერის ოდენობა და გაცემის წესი განსაზღვრული იქნება ქალაქ თბილისის მუნიციპალიტეტის მთავრობის განკარგულებით, ხოლო განცხადების და ვაუჩერის ფორმას ამტკიცებს ქალაქ თბილისის მუნიციპალიტეტის მერიის ჯანდაცვისა და სოციალური მომსახურების საქალაქო სამსახური“.
1672391456
მანდატურის სამსახური სასკოლო სივრცეში აღდგენითი პროცესების ახალი მოდელის დანერგვას იწყებს
,,ვაგრძელებთ მუშაობას როგორც მიღწეული შედეგების მდგრადობის და შენარჩუნების მიმართულებით, ასევე ახალი ინიციატივების და პროექტების დანერგვას“- ამის შესახებ საგანმანათლებლო დაწესებულების მანდატურის სამსახურის უფროსმა გელა გელაძემ პრაიმტაიმთან ინტერვიუს დროს განაცხადა.რა გამოწვევებს აწყდებოდა მანდატურის სამსახური გასული წლის განმავლობაში და რამდენად ეფექტიანად შეძლო ამ გამოწვევებთან გამკლავება, ამ და სხვა კითხვებს გელა გელაძემ უპასუხა. - 2022 წელს, განსხვავებით წინა პერიოდისგან, მოსწავლეები უკვე სრულფასოვნად დაუბრუნდნენ სასკოლო სივრცეს. როგორი იყო ეს წელი სასკოლო უსაფრთხოების კუთხით? დასაწყისშივე უნდა აღინიშნოს, რომ საგანმანათლებლო დაწესებულების მანდატურის სამსახური, სასკოლო უსაფრთხოების მიმართულებით, განსაკუთრებულ ყურადღებას უთმობს არა მხოლოდ ცალკეულ დარღვევებზე რეაგირებას, არამედ - პრევენციული ღონისძიებების განხორციელებას. სწორედ პრევენციული მიმართულების გაძლიერებით, ჩვენ შევძელით სასკოლო სივრცეში თავიდან აგვერიდებინა ბევრი, საკმაოდ სახიფათო რისკის შემცველი შემთხვევა. თუმცა, რა თქმა უნდა, გამოწვევები და სირთულეები იყო, რაც სრულიად ბუნებრივია, სასკოლო ცხოვრების სპეციფიკიდან გამომდინარე. თუ გასული წლის სტატისტიკას შევაფასებთ, მთავარი დარღვევები სკოლებში დისციპლინურ გადაცდომებს უკავშირდებოდა; იყო სიტყვიერი და ფიზიკური დაპირისპირების ფაქტები; გვხვდებოდა ოჯახური ძალადობის შემთხვევები, რის გამოვლენასაც ჩვენი სამსახური დიდი ყურადღებით ეკიდება. ასევე, ჩვენი მანდატურების მიერ, მთელი წლის განმავლობაში, სკოლებიდან მოხდა არაერთი აკრძალული ნივთის პრევენციულად ამოღება. - რა გამოწვევებს აწყდებოდა თქვენი სამსახური გასული წლის განმავლობაში და რამდენად ეფექტიანად შეძლო მან ამ გამოწვევებთან გამკლავება?როდესაც სტატისტიკაზე ვსაუბრობთ, აქ მინდა აუცილებლად აღვნიშნო, რომ ჩვენ ვახორციელებთ დარღვევების დეტალურ აღრიცხვას და ანალიზს, რათა გვქონდეს რეალური სურათი, რა გამოწვევები არსებობს სასკოლო უსაფრთხოების კუთხით და რა პრევენციული ღონისძიებები უნდა განვახორციელოთ მათ თავიდან ასარიდებლად. ეს ნიშნავს, რომ ჩვენ არ ვმუშაობთ მხოლოდ კონფლიქტებზე რეაგირების, აკრძალული ნივთების ამოღების ან დარღვევების აღრიცხვის მიმართულებით, არამედ, ვცდილობთ ვებრძოლოთ გამომწვევ მიზეზებს, რაც სასკოლო უსაფრთხოების თვალსაზრისით ამა თუ იმ დარღვევას განაპირობებს. მაგალითად, როდესაც ვსაუბრობთ ძალადობასა და ბულინგზე, მანდატურის სამსახურმა, საერთაშორისო ორგანიზაციებთან მჭიდრო თანამშრომლობით, საპილოტე სკოლებში უკვე განახორციელა ბულინგისა და ნივთიერებათა ავადმოხმარების პრევენციის გრძელვადიანი პროგრამა, რომლის ფარგლებში ინტერვენცია მოხდა საგანმანათლებლო დაწესებულების ყველა რგოლთან - პედაგოგებთან, ადმინისტრაციასთან, მშობლებთან და მოსწავლეებთან. ამასთან, საპილოტე სკოლებში დავნერგეთ ჩვენ მიერ შემუშავებული ახალი მოდული მოზარდებში გაჯეტდამოკიდებულებასა და კიბერბულინგთან დაკავშირებით, რაც ასევე ერთ-ერთი მნიშვნელოვანი გამოწვევაა თანამედროვე საგანმანათლებლო სივრცეში. - მშობლების ნაწილი ამბობს, რომ არ იციან მათი შვილები რას მოიმოქედებენ, როცა სახლიდან გადიან. არის ეს თამბაქოს მოხმარება თუ სხვა სარისკო ქცევები. ამ მხრივ როგორ ეხმარება ამ პრობლემის დაძლევაში მანდატურის სამსახური?პრევენციის მიმართულებით, ჩვენ განსაკუთრებულ ყურადღებას ვუთმობთ ცნობიერების ასამაღლებელ კამპანიებს. ჩვენმა თანამშრომლებმა -მანდატურებმა, ფსიქოლოგებმა და სოციალურმა მუშაკებმა მოსწავლეებთან, მათ მშობლებთან და მასწავლებლებთან/ადმინისტრაციის წარმომადგენლებთან, მხოლოდ გასული წლის განმავლობაში, ათასობით საინფორმაციო-საგანმანათლებლო შეხვედრა ჩაატარეს ისეთ თემებზე, როგორიცაა: სარისკო ქცევების პრევენცია და მათზე რეაგირება, დესტრუქციული ქცევის, კრიზისული სიტუაციების მართვა; მოწყვლადობის რისკის წინაშე მყოფი მოსწავლეების იდენტიფიცირება; ძალადობა და კიბერბულინგი; ოჯახში ძალადობა; ბავშვთა ასაკში ქორწინება; გენდერული თანასწორობა; ტოლერანტობა;ბავშვთა უფლებები და ანტიდისკრიმინაციული მიდგომები.გარდა ამისა, ჩვენი ფსიქოსოციალური მომსახურების ცენტრი, მთელი წლის განმავლობაში აქტიურად განაგრძობდა საჭიროების მქონე მოზარდების როგორც ინდივიდუალურ, ისე ჯგუფურ თერაპიებს, ასევე, მშობელთა ფსიქო განათლებას. პარალელურად, ცენტრის სპეციალისტები აქტიურად თანამშრომლობენ შესაბამის უწყებებთან და მონაწილეობენ მულტისექტორულ შეხვედრებში.საგანმანათლებლო დაწესებულების მანდატურის სამსახურში აქტიურად ფუნქციონირებს კრიზისული ინტერვენციის ჯგუფი, რომლის მიზანია კრიზისული შემთხვევების ადგილზე შეფასება, სიტუაციის პირველადი მართვა, შესაბამისი რეკომენდაციების გაცემა და შემდგომი ღონისძიებების დაგეგმვა. ამ მიზნით, 2022 წლის განმავლობაში, ფსიქოსოციალური მომსახურების ცენტრის თანამშრომლების მიერ ქვეყნის მასშტაბით ვიზიტი568 საჯარო სკოლაში განხორციელდა.აქვე, მინდა განსაკუთრებული ყურადღება გავამახვილო კიდევ ერთ უმნიშვნელოვანეს მიმართულებაზე, რაც საგანმანათლებლო სივრცეში სოციალური მუშაობის კომპონენტისა და სოციალური მუშაკების როლის გაძლიერებას უკავშირდება. საგანმანათლებლო დაწესებულების მანდატურის სამსახურს, თბილისსა და რეგიონებში, ახალი სოციალური მუშაკები დაემატნენ და მათი რაოდენობა 63-მდე გაიზარდა. სოციალური მუშაობის კომპონენტით, მანდატურის სამსახური ამჟამად შესულია საქართველოს 56 საჯარო სკოლაში. საქართველოს საგანმანათლებლო სივრცეში, ეს არის უპრეცედენტო შემთხვევა,როდესაც სოციალური მუშაკი სასკოლო ცხოვრების ორგანული ნაწილი გახდა და თავის ფუნქცია-მოვალეობებს ის უშუალოდ ადგილზე ახორციელებს. აქამდე, სოციალური მუშაობა სკოლებში საჭიროებისამებრ, ინტერვენციის ფარგლებში ხორციელდებოდა.სკოლის სოციალური მუშაობა გულისხმობს მოსწავლეთა, მათი მშობლებისა და პედაგოგების მხარდაჭერას საგანმანათლებლო პროცესში, ასევე, მოსწავლეთა ეფექტიანი სოციალური ფუნქციონირებისათვის ხელშემშლელი ფაქტორების შემცირებასა და აღმოფხვრას, მათ შორის, სკოლის მიღმა დარჩენილი მოსწავლეების სასკოლო სივრცეში დაბრუნებისთვის საჭირო ღონისძიებების განხორციელებას. მხოლოდ გასული წლის განმავლობაში, სკოლაში სოციალური მუშაობის მიმართულებით ჩვენ მიერ განხორციელებული ღონისძიებების ფარგლებში, სხვადასხვა საინფორმაციო, საგანმანათლებლო, შემეცნებით, სპორტულ, სადისკუსიო და საინტერვენციო აქტივობაში ჩაერთო: 5005 მასწავლებელი, 776 - ადმინისტრაციის წარმომადგენელი; 45519 - მოსწავლე; 6096 - მშობელი/კანონიერი წარმომადგენელი.როგორც თქვენთვის ცნობილია, საერთაშორისო პრაქტიკის გათვალისწინებით, ჩვენ დავიწყეთ საგანმანათლებლო სივრცეში სასკოლო მედიაციის, განხორციელება, რაც აღდგენითი პროცესების, კონფლიქტებზე რეაგირების და მათი კონსტრუქციული გზით გადაჭრის ერთ-ერთი საუკეთესო მექანიზმია. სასკოლო მედიაციის მიზანი, ადრეული და ეფექტური ჩარევით, კონფლიქტური სიტუაციის მშვიდობიანი გადაწყვეტა, პროაქტიული რეაგირება და პრევენციაა. მედიაციის პროცესს მანდატურის სამსახურის სპეციალურად გადამზადებული თანამშრომლები უძღვებიან. - რამდენ სკოლაშია ამჟამად, საქართველოს მასშტაბით, საგანმანათლებლო დაწესებულების მანდატურის სამსახური წარმოდგენილი?- 2022 წელს, ჩვენ, გეგმის მიხედვით გავაგრძელეთ მანდატურის სამსახურის გაფართოების პროცესი. ჩვენი სამსახური, დამატებით, საქართველოს რეგიონების კიდევ 85 საჯარო სკოლაში შევიდა. მოცემულ ეტაპზე, საგანმანათლებლო დაწესებულების მანდატურის სამსახური,საქართველოს მასშტაბით, 692 საჯარო სკოლაშია წარმოდგენილი. ამ სკოლებში მოსწავლეთა საერთო რაოდენობის, დაახლოებით, 95% სწავლობს. ასევე, მანდატურის სამსახური უსაფრთხოებისა და საზოგადოებრივი წესრიგის დაცვას უზრუნველყოფს 2 კერძო სკოლასა და 1 პროფესიულ კოლეჯში.საგანმანათლებლო დაწესებულების მანდატურის სამსახურმა, კონკურსის წესით, გასულ წელს, 361ახალი მანდატური შეარჩია. მოსამზადებელი კურსის წარმატებით დასრულების შემდეგ, ისინი თბილისისა და რეგიონების საჯარო სკოლებში განაწილდნენ.- როგორია თქვენი გეგმები მომავალი წლისთვის? რა სიახლეებს უნდა ველოდოთ მანდატურის სამსახურისგან 2023 წელს? - ცხადია, ჩვენ გავაგრძელებთ როგორც რეაგირების კომპონენტის, ისე პრევენციული მიმართულების გაძლიერებას. ასევე, კიდევ უფრო გაძლიერდება და გაფართოვდება მანდატურის სამსახურის ფსიქოსოციალური მომსახურების ცენტრი. ჩვენ ვიწყებთ აღდგენითი პროცესების ახალი მოდელის დანერგვას სასკოლო სივრცეში. ასევე, იწყება სპეციალური საგანმანათლებლო საჭიროებების მქონე მოსწავლეთათვის ფსიქოსოციალური მომსახურების მიწოდების კომპონენტის განვითარებაზე მუშაობა. იგეგმება მანდატურის სამსახურის შესვლა, სოციალური მუშაობის კომპონენტით, რესურს სკოლებში და ინკლუზიური განათლების მხარდამჭერი ახალი მოდელის დანერგვა. აღნიშნული მოდელი, საქართველოს ეროვნული განათლების სისტემის ხარისხისა და ინკლუზიურობის გასაძლიერებლად, საქართველოს განათლებისა და მეცნიერების სამინისტროს, გაეროს ბავშვთა ფონდის, ნორვეგიის საგარეო საქმეთა სამინისტროსა და ნორვეგიის სპეციალური საგანმანათლებლო საჭიროებების ეროვნული სამსახურის (STATPED) მიერ, ერთობლივი პროექტის „არც ერთი ბავშვი განათლების გარეშე“ ფარგლებში შემუშავდა. უკვე მომზადდა საგანმანათლებლო დაწესებულების მანდატურის სამსახურში ინკლუზიური განათლების მხარდამჭერი ახალი სისტემის დაფუძნებისთვის საჭირო საკანონმდებლო ცვლილებების პროექტი. მოხდა ინკლუზიური განათლების მულტიდისციპლინური გუნდის საქმიანობასთან დაკავშირებული საჭიროებების შესწავლა, ჩატარდა არაერთი სამუშაო შეხვედრა თემატური სამუშაო ჯგუფების ფარგლებში, ასევე, საინფორმაციო შეხვედრები შეზღუდული შესაძლებლობის მქონე პირთა წარმომადგენლობით არასამთავრობო ორგანიზაციებთან, რომლის მონაწილეები გაეცნენ ინკლუზიური განათლების მხარდამჭერ ახალ მოდელს და მის დანერგვასთან დაკავშირებულ სამომავლო გეგმებს.ასე რომ, ჩვენ გვაქვს საკმაოდ მნიშვნელოვანი გეგმები 2023 წლისთვის. ვაგრძელებთ მუშაობას როგორც მიღწეული შედეგების მდგრადობის და შენარჩუნების მიმართულებით, ასევე ახალი ინიციატივების და პროექტების დანერგვას, რაც ხელს შეუწყობს უსაფრთხო, მეგობრული და თანასწორი სასკოლო გარემოს განმტკიცებასაქვე, მინდა, ვისარგებლო შემთხვევით და საგანმანათლებლო დაწესებულების მანდატურის სამსახურის ერთიანი გუნდის სახელით მოგილოცოთ დამდეგი შობა და ახალი წელი! იმედი მაქვს, რომ 2023 წელი იქნება ნაყოფიერი და წარმატების მომტანი მთელი საქართველოსთვის!
1672295946
იანვრიდან დმანისის სოფელ ბოსლებში მცხოვრები ბავშვები სწავლას ახალ სკოლაში გააგრძელებენ
საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, საქართველოს მთავრობის დაფინანსებით, ქვემო ქართლში, დმანისის მუნიციპალიტეტის სოფელ ბოსლების საჯარო სკოლის რეაბილიტაცია დაასრულა.სოფელ ბოსლების 280 ბავშვზე გათვლილი სკოლა საერთაშორისო სტანდარტების შესაბამისად რეაბილიტირდა. სკოლის შენობაში მოეწყო საკლასო ოთახები, საპირფარეშოები, სპორტული მოედნები და ეზოს ტერიტორია. დამონტაჟდა გათბობის, წყალსადენის და კანალიზაციის სისტემები. სკოლა სრულად ადაპტირებულია შეზღუდული შესაძლებლობის მქონე პირებისთვის.მოსწავლეები, რომლებიც, სკოლის რეაბილიტაციამდე, რთულ პირობებში იღებდნენ განათლებას, უკვე 2023 წლის იანვრიდან გამართული ინფრასტრუქტურით და კეთილმოწყობილ გარემოში გააგრძელებენ სწავლას.მუნიციპალური განვითარების ფონდმა, 2022 წელს, ქვეყნის მასშტაბით, 45 საჯარო სკოლის რეაბილიტაცია და მშენებლობა დაასრულა. სამუშაოების ჯამურმა ღირებულებამ დაახლოებით 124 მილიონი ლარი შეადგინა.
1671526082
თელავის სახელმწიფო უნივერსიტეტს ახალი რექტორი ჰყავს
იაკობ გოგებაშვილის სახელობის თელავის სახელმწიფო უნივერსიტეტის რექტორის თანამდებობაზე, აკადემიური საბჭოს სრულმა შემადგენლობამ ექვსი ხმით, არცერთის წინააღმდეგ, რექტორის თანამდებობაზე, ხარისხის უზრუნველყოფის სამსახურის უფროსს, შალვა ჭკადუას დაუჭირა მხარი.რექტორობის კიდევ ერთმა კანდიდატმა, უნივერსიტეტის ყოფილმა რექტორმა, ავთანდილ ღელაღუტაშვილმა, საკუთარი კანდიდატურა, არჩევნებამდე რამდენიმე საათით ადრე მოხსნა.შალვა ჭკადუამ, რექტორის თანამდებობაზე, პროფესორი ირმა შიოშვილი შეცვალა, რომელსაც პოსტი 2014 წლიდან ეკავა.შალვა ჭკადუა დიპლომატიისა და საერთაშორისო ურთიერთობების სპეციალისტია.2010 წელს მან ისტორიის მეცნიერებათა დოქტორის ხარისხი მოიპოვა.2006 - 2011 წლებში მუშაობდა საბერძნეთის საელჩოს სამხედრო ატაშატში.2013 წლიდან, შალვა ჭკადუა უნივერსიტეტის ხარისხის უზრუნველყოფის სამსახურის უფროსია.უნივერსიტეტის ახლად არჩეულ რექტორს გამოქვეყნებული აქვს ათობით შრომა, სტატია, მონოგრაფია და კვლევა, არის წიგნის თანავტორი. ის, 15-ზე მეტი საერთაშორისო პროექტის მონაწილეა.შალვა ჭკადუა, ამჟამად, სოციალურ მეცნიერებათა, ბიზნესისა და სამართლის მეცნიერებათა ფაკულტეტის ასოცირებული პროფესორია.
1671167460
განათლების სამინისტრომ პროფესიული განათლების ეროვნული ჯილდოს 2022 წლის გამარჯვებულები გამოავლინა
განათლების სამინისტრომ პროფესიული განათლების ეროვნული ჯილდოს 2022 წლის გამარჯვებულები გამოავლინა. დასახელდა წლის საუკეთესო საკომუნიკაციო პროექტი, საუკეთესო ინსტრუქტორი, გამორჩეული საერთაშორისო პროექტი და წლის რეგიონული პარტნიორი.ძირითადი საკონკურსო კატეგორიების გარდა, სხვა ჯილდოებიც გაიცა. კონკურსის მიზანი პროფესიული განათლების გაძლიერება და პოპულარიზაციაა.საქართველოს განათლებისა და მეცნიერების მინისტრმა მიხეილ ჩხენკელმა „პროფესიული განათლების ეროვნული ჯილდოს“ გამარჯვებულებს მიღწეული წარმატება მიულოცა და 2022 წლის პროფესიული საგანმანათლებლო პროგრამის ნომინაციაში გამარჯვებული კოლეჯის – „იკაროსის“ წარმომადგენელს საპატიო პრიზები პირადად გადასცა. 2022 წლის პროფესიული საგანმანათლებლო პროგრამის ნომინაციაში გამარჯვებული კოლეჯი „იკაროსი“ გახდა პროგრამით – კულინარიის ხელოვნება, ხოლო წლის პროფესიული მომზადების/ გადამზადების კატეგორიაში გამარჯვებულად გამოცხადდა კოლეჯი „ახალი ტალღა“, პროგრამით – კერძების მომზადების ტექნოლოგია.ინფორმაციას ავრცელებს განათლებისა და მეცნიერების სამინისტრო.
1670999066
საქართველოს განათლებისა და მეცნიერების მინისტრი მიხეილ ჩხენკელი და საქართველოში ევროკავშირის ელჩი პაველ ჰერჩინსკი ლისის ტბის მიმდებარე ტერიტორიაზე მშენებარე აღმოსავლეთ პარტნიორობის ევროპული სკოლის კომპლექსს ეწვივნენ და სამშენებლო სამუშაოების მიმდინარეობას პირადად გაეცნენ.მიხეილ ჩხენკელმა განაცხადა, რომ ევროპული სკოლის პროექტის განხორციელება საქართველოსა და ევროკავშირს შორის არსებული მჭიდრო თანამშრომლობის თვალსაჩინო მაგალითს წარმოადგენს. მისი თქმით, ევროპული სკოლის პროექტს რეგიონში ანალოგი არ ჰყავს და იგი ევროკავშირის ფარგლებს გარეთ პირველ პრეცედენტს წარმოადგენს, რომელიც აღმოსავლეთ პარტნიორობის ქვეყნების მოსწავლეებს მულტიკულტურულ გარემოში, ფუნდამენტურ ღირებულებებზე დაფუძნებულ მაღალი ხარისხის ევროპულ განათლებას სთავაზობს.თავის მხრივ, საქართველოში ევროკავშირის ელჩმა პაველ ჰერჩინსკიმ მადლობა გადაუხადა მიხეილ ჩხენკელს პროექტის მხარდაჭერისთვის და განაცხადა, რომ ევროპული სკოლის პროექტის განხორციელება კიდევ უფრო მეტად შეუწყობს ხელს საქართველოსა და ევროკავშირს შორის არსებული პარტნიორობის გაღრმავებას.ევროკავშირის სტანდარტების შესაბამისი ახალი ევროპული სკოლის კომპლექსის მშენებლობა ლისის ტბის მიმდებარე ტერიტორიაზე მიმდინარეობს და 2024 წელს დასრულდება.საქართველოს განათლებისა და მეცნიერების სამინისტრო გააგრძელებს აქტიურ და მჭიდრო თანამშრომლობას ევროკავშირის მხარესთან, რათა აღმოსავლეთ პარტნიორობის ევროპული სკოლის პროექტის ყველა კომპონენტი ეფექტიანად განხორციელდეს.
1670520060
განათლების სამინისტრო ინფორმაციას ავრცელებს
საქართველოს განათლებისა და მეცნიერების სამინისტრო საჯარო სკოლის დირექტორობის მსურველებისთვის ინფორმაციას ავრცელებს, რომელსაც ,,პრაიმტაიმი" უცვლელად გთავაზობთ:,,საქართველოს განათლებისა და მეცნიერების სამინისტროს ინიციატივით საჯარო სკოლის დირექტორობის მსურველთა სერტიფიცირების პროცესი მიმდინარეობს. სერტიფიცირების მსურველთა რეგისტრაცია 2022 წლის 16 დეკემბრის ჩათვლით გაგრძელდება. რეგისტრაციის გავლა შესაძლებელია ბმულზე: აღსანიშნავია, რომ დირექტორობის მსურველთა სერტიფიცირება ორ საფეხურს – ტესტირებასა და გასაუბრებას მოიცავს.სერტიფიცირების პროცესში მონაწილეობის შესაძლებლობა აქვთ უმაღლესი განათლების მქონე საქართველოს მოქალაქეებს, რომელთაც მუშაობის არანაკლებ 3-წლიანი გამოცდილება აქვთ. 2020 წელს გამოცხადებული დირექტორობის მსურველთა შესარჩევი კონკურსის ფარგლებში უკვე დარეგისტრირებული პირები ხელახალ რეგისტრაციას აღარ საჭიროებენ. დირექტორობის მსურველთა საგამოცდო პროგრამა და ტესტის ნიმუშები ხელმისაწვდომია ვებგვერდზე: https://directors.mes.gov.ge. დირექტორობის მსურველებს საშუალება აქვთ, ვებგვერდზე https://el.ge ვებინარის სახით მიიღონ კონსულტაცია სხვადასხვა საკითხთან დაკავშირებით.გარდა ამისა, სერტიფიცირებით დაინტერესებულ პირებს შეუძლიათ კონკრეტული შეკითხვები გამოაგზავნონ ელექტრონულ ფოსტაზე – directors@emis.ge", - აღნიშნულია განცხადებაში.
1670407261
ქუთაისის მერი იოსებ ხახალეიშვილი საერთაშორისო და ეროვნულ სასკოლო ოლიმპიადებში გამარჯვებულ მოსწავლეებსა და მათ პედაგოგებს შეხვდა.2020-2021 - 2022 სასწავლო წლებში არაერთმა ქუთაისელმა მოსწავლემ მოიპოვა მნიშვნელოვანი წარმატება საგნობრივ ოლიმპიადებში. ტრადიციულად, ქუთაისის მერია ყოველწლიურად აჯილდოებს წარმატებულ მოსწავლეებსა და მათ მასწავლებლებს.„ ქუთაისი ყოველთვის იყო განათლების ქალაქი. მოხარული ვარ, რომ თქვენ აგრძელებთ ამ საუკეთესო ტრადიციას და არაერთხელ ასახელეთ თქვენი პედაგოგები, სკოლა, ქუთაისი. თქვენი ნიჭის და შრომის შედეგია, რომ საერთაშორისო და ეროვნული ოლიმპიადებიდან გამარჯვებულები გვიბრუნდებით. გვინდა დაგიფასოთ ეს გარჯა და წაგახალისოთ კიდევ უფრო დიდი წარმატებებისთვის.თქვენთან ერთად უნდა შევქმნათ უკეთესი ქუთაისის ხვალინდელი დღე!“- განაცხადა იოსებ ხახალეიშვილმა.შეხვედრის მონაწილეებს საპატიო სიგელები და ფულადი ჯილდო გადაეცათ.
1670044980
2021/2022 წელს სწავლა 8 846 მოსწავლემ შეწყვიტა - საქსტატი
2021/2022 სასწავლო წლის განმავლობაში, სწავლა შეწყვიტა 8 846 მოსწავლემ - ინფორმაციას ამის შესახებ საქსტატი ავრცელებს."საქსტატის მონაცემებით: 2022/2023 სასწავლო წლის დასაწყისისთვის, საქართველოში სულ 2 302 ზოგადსაგანმანათლებლო დაწესებულება (სკოლა) იყო, მათ შორის 2 086 საჯარო, ხოლო 216 კერძო.წინა სასწავლო წელთან შედარებით, ქვეყანაში არსებული სკოლების რაოდენობა 6 ერთეულით შემცირდა.რეგიონების მიხედვით, ყველაზე მეტი სკოლა (17.1%) იმერეთში ფიქსირდება.2022/2023 სასწავლო წლის დასაწყისისთვის, საქართველოს ზოგადსაგანმანათლებლო დაწესებულებებში 633.3 ათასი მოსწავლე სწავლობდა, რაც წინა სასწავლო წლის მაჩვენებელს 1.4 პროცენტით აღემატება. საჯარო სკოლებში მოსწავლეთა საერთო რიცხოვნობის 89.9 პროცენტი სწავლობს, ხოლო კერძო სკოლებში - 10.1 პროცენტი. მოსწავლეთა საერთო რიცხოვნობიდან 48.1 პროცენტი გოგოა, ხოლო 51.9 პროცენტი - ბიჭი.რეგიონებს შორის, ყველაზე მეტი მოსწავლე (35.4%) თბილისში სწავლობს.2021/2022 სასწავლო წლის განმავლობაში, სწავლა შეწყვიტა 8 846 მოსწავლემ, რაც 25.5 პროცენტით მეტია წინა წლის ანალოგიურ მაჩვენებელთან შედარებით. იმ მოსწავლეთა შორის, რომელთაც შეწყვიტეს სწავლა, 42.6 პროცენტი გოგოა, ხოლო 57.4 პროცენტი - ბიჭი.2022 წელს საშუალო სკოლა დაასრულა 45 423 მოსწავლემ, რაც წინა წლის შესაბამის მაჩვენებელს 17.3 პროცენტით აღემატება. დაწყებითი განათლება მიიღო 60 235 მოსწავლემ, რაც წინა წლის შესაბამის მაჩვენებელზე 26.5 პროცენტით მეტია, ხოლო საბაზო განათლება - 45 008 მოსწავლემ, რაც წინა წლის შესაბამის მაჩვენებელს 0.4 პროცენტით ჩამორჩება.2022/2023 სასწავლო წლის დასაწყისისთვის, ზოგადსაგანმანათლებლო დაწესებულებებში დასაქმებული იყო 62 296 პედაგოგი, რაც წინა წლის ანალოგიურ მაჩვენებელთან შედარებით 1.1 პროცენტით ნაკლებია. მასწავლებელთა დიდ უმრავლესობას ქალები შეადგენენ, კერძოდ, პედაგოგების რიცხოვნობაში ქალების წილი 87.4 პროცენტი, ხოლო კაცების წილი 12.6 პროცენტია", - ვკითხულობთ ინფორმაციაში.
