1736522821

“მადლობა უფალს, რომ ჩემი მეორე ნახევარი და ჩემი შვილების დედა ხარ” - ბერას მილოცვა მეუღლეს

ბერა ივანიშვილი მეუღლეს, ნანუკა გუდავაძეს სოციალურ ქსელში იუბილეს ულოცავს და ოჯახურ, თბილ კადრებს გვიზიარებს.წყვილი შვილებთან ერთად პოზირებს და ლამაზად გამოიყურებიან.„დაბადების დღეს გილოცავ, ჩემო საოცარი მეუღლევ. მადლობა უფალს, რომ ჩემი მეორე ნახევარი და ჩემი შვილების დედა ხარ“, – წერს ბერა ივანიშვილი.

1735333947

ინფორმაცია ზოდიაქოს ნიშნებს - ვის რა ფერის სამოსი უნდა ეცვას ახალ წელს

2025 წლისთვის, ზოდიაქოს ნიშნებს, გთავაზობთ თუ რა ფერის სამოსით შეხვედრა სჯობს ახალ წელთან. ასტროლოგები გვირჩევენ: ვერძი - წითელი, ცეცხლის ფერები (ნარინჯისფერი, ყვითელი).კურო  – მწვანე, იისფერი, მიწისფერი.ტყუპები  – რუხი, ბეჟი, ცისფერი.კირჩხიბი – თეთრი, ვარდისფერი, ლურჯი.ლომი – ოქროსფერი, ყვითელი, წითელი.ქალწული – მწვანე, ყავისფერი, ნარინჯისფერი.სასწორი – ლურჯი, რუხი, ვარდისფერი.მორიელი –  წითელი, მუქი ლურჯი.მშვილდოსანი – თეთრი, ცისფერი, იისფერი.თხის რქა  – შავი, ნაცრისფერი, მწვანე.მერწყული  – ლურჯი, რუხი, ელეგანტური ფერები.თევზები - ზღვის ფერები (მწვანე, ცისფერი), ვარდისფერი.ასტროლოგიური ფერის თეორიები ამბობენ, რომ თქვენი ზოდიაქო შესაძლოა დაგეხმაროთ სწორი ფერის არჩევაში, რომელიც თქვენს ენერგიასთან და ემოციებთან ჰარმონიაში იქნება.

1735190918

Reuters: United Airlines-ის თვითმფრინავის შასიში ადამიანის ცხედარი იპოვეს

 ამერიკული ავიაკომპანია United Airlines-ის თვითმფრინავის შასიში ჰავაის ერთ-ერთ კუნძულზე დაშვების შემდეგ ადამიანის ცხედარი აღმოაჩინეს. ინფორმაციას Reuters-ი ავრცელებს.სააგენტოს ცნობით, თვითმფრინავი ჩიკაგოდან ჰავაის მიმართულებით ასრულებდა რეისს. როცა ის ჰავაიში დაეშვა, აეროპორტის მომსახურე პერსონალმა მის შასიში გარდაცვლილი ადამიანი აღმოაჩინა.ავიაკომპანიაში არ იციან, თუ როგორ მოხდა ადამიანი ასაკეცი ბორბლის სივრცეში. მომხდართან დაკავშირებით დაწყებულია გამოძიება.

1730871960

ამერიკის ცხელი ნოემბერი - ყველა ინფორმაცია საპრეზიდენტო არჩევნებზე

ამერიკის შეერთებულ შტატებში გრძელდება 5 ნოემბრის საპრეზიდენტო არჩევნებში მიცემული ხმების დათვლა. ჯერჯერობით ლიდერობს ქვეყნის ყოფილი პრეზიდენტი, რესპუბლიკელი დონალდ ტრამპი. დემოკრატიული პარტიიდან მისი მეტოქეა ვიცე პრეზიდენტი კამალა ჰარისი.ამერიკული საარჩევნო სისტემით, საპრეზიდენტო არჩევნებში გამარჯვებულს საბოლოოდ გამოავლენს შტატების მოსახლეობის რაოდენობის მიხედვით დაკომპლექტებული საარჩევნო კოლეგია. კანდიდატებს გამარჯვებისთვის კოლეგიისგან სჭირდებათ 538-დან სულ მცირე 270 ხმა.დემოკრატიული პარტიის პრეზიდენტობის კანდიდატის საარჩევნო შტაბის წარმომადგენლის ცნობით, კამალა ჰარისი ამ ღამით მხარდამჭერებს სიტყვით არ მიმართავს. ინფორმაციას ამის შესახებ „ბიბისი“ ავრცელებს.მედიის ცნობით, მოქალაქეების ნაწილმა კამალა ჰარისის საარჩევნო შტაბი და ასევე მხარდამჭერთა შეკრების ადგილი დატოვა.როგორც „ბიბისი“ აღნიშნავს, მხარდამჭერებმა შეკრების დატოვება მას შემდეგ დაიწყეს, რაც ცნობილი გახდა ორი ე.წ. მერყევი შტატის – ჩრდილოეთ კაროლინისა და ჯორჯიის წინასწარი შედეგები, რომელთა თანახმადაც აღნიშნულ შტატებში დონალდ ტრამპი იმარჯვებს.ამერიკის შეერთებული შტატებში 5 ნოემბრის არჩევნების დღეს არაერთ საარჩევნო უბანზე მიიღეს შეტყობინება შენობაში ბომბის არსებობის შესახებ. შემოწმებამ დაადასტურა, რომ ყველა შეტყობინება ცრუ იყო.„სიენენის“ წინასწარი მონაცემებით, აშშ-ის პრეზიდენტობის რესპუბლიკელმა კანდიდატმა, დონალდ ტრამპმა ორ მერყევ შტატში გაიმარჯვა, ხოლო სამში ლიდერობს. მედიის ინფორმაციით, ტრამპი გამარჯვებულია ჩრდილოეთ კაროლინასა და ჯორჯიაში. პენსილვანიაში, სადაც დათვლილია ხმების 93%, დონალდ ტრამპს 51,1% აქვს, ხოლო ჰარისს – 47,8%.დემოკრატების კანდიდატი კამალა ჰარისი, არჩევნების პარალელურად, ამომრჩევლებს აქტიურობისა და მხარდაჭერისკენ მოუწოდებს."დააკაკუნეთ კარზე, დაურეკეთ ამომრჩევლებს, მიაწვდინეთ ხმა მეგობრებსა და ოჯახის წევრებს. ჩვენ ერთად დავწერთ იმ ყველაზე დიდი ისტორიის მომდევნო თავს, რაც კი ოდესმე გაგვიგია", – ვკითხულობთ ჰარისის პოსტში.რესპუბლიკელების კანდიდატი დონალდ ტრამპი კი ფილადელფიაში მასობრივი თაღლითობის შესახებ საუბრობს."ვრცელდება ხმები ფილადელფიაში არჩევნებში მასობრივი თაღლითობის შესახებ და სამართალდამცველი ორგანოები უკვე ადგილზე მიემართებიან", - წერს პრეზიდენტობის კანდიდატი სოციალურ ქსელში.აშშ-ის პრეზიდენტობის რესპუბლიკელ კანდიდატს, დონალდ ტრამპს ფლორიდაში, უესთ პალმ ბიჩში გახსნილ საარჩევნო შტაბში ელოდებიან. ტრამპი სავარაუდოდ სიტყვით მიმართავს მხარდამჭერებს.ადგილზე, რესპუბლიკელი კანდიდატის სხვა მომხრეებთან ერთად, იმყოფება მილიარდერი ილონ მასკი, ასევე რობერტ კენედი უმცროსი და ტულსი გაბარდი.Fox News-ის ცნობით, ტრამპმა ამომრჩეველთა კოლეგიის 277 ხმა მიიღო. ეს უკვე საკმარისია იმისთვის, რომ ის გამარჯვებულად გამოცხადდეს.წინასწარი მონაცემების გამოქვეყნებისთანავე, ტრამპს არჩევნებში გამარჯვება მეგობარი ქვეყნების ლიდერებმა მიულოცეს:ისრაელის ომის კაბინეტის წევრი, ენერგეტიკის მინისტრი ელი კოენი დონალდ ტრამპს აშშ-ის საპრეზიდენტო არჩევნებში გამარჯვებას ულოცავს.როგორც ელი კოენი წერს, ტრამპის პრეზიდენტობის პირველი ვადის დროს მსოფლიოსთვის და ისრაელის სახელმწიფოსთვის დიდი წარმატების მიღწევა მოხერხდა.უნგრეთის პრემიერ-მინისტრი, ვიქტორ ორბანი აშშ-ის პრეზიდენტობის რესპუბლიკელი კანდიდატის, დონალდ ტრამპის გამარჯვებას ზეიმობს.„დილა მშვიდობისა, უნგრეთო! გზად ლამაზი გამარჯვებისკენ“, – წერს ორბანი სოციალურ მედიაში და აქვეყნებს ფოტოს, სადაც ტელევიზორში საარჩევნო პროცესს ადევნებს თვალს. „გამარჯვება გარანტირებულია“, – აღინიშნა ორბანმა.ტრამპს არჩევნებში გამარჯვება მიულოცა კამალა ჰარისის მთავარმა დონორმა, მილიარდერი მარკ კუბანმა.„გილოცავთ დონალდ ტრამპ. თქვენ სამართლიანად მოიგეთ. ვულოცავ ულონ მასკსაც ასევე",- წერს მარკ კუბანი სოციალურ ქსელ X-ზე.აშშ-ის წარმომადგენელთა პალატის სპიკერი მაიკ ჯონსონი საპრეზიდენტო არჩევნებში დონალდ ტრამპის გამარჯვებას ეხმიანება და აცხადებს, რომ ამერიკელებმა ქვეყანა გადაარჩინეს. როგორც მაიკ ჯონსონმა დაწერა, ამერიკელმა ხალხმა თავისი სათქმელი თქვა.„ჩვენ გადავარჩინეთ ამერიკა, ამერიკელმა ხალხმა თავისი სათქმელი თქვა. პრეზიდენტი დონალდ ტრამპი და სენატორი ჯეი დი ვენსი თეთრ სახლში მიდიან. ჩვენ მზად ვართ, ვიმუშაოთ ამერიკელი ხალხისთვის“, – დაწერა მაიკ ჯონსონმა.„მოუთმენლად ველოდები მასთან მუშაობას, რათა მშვიდობა ნატო-ს მეშვეობით გავაძლიეროთ“,-ასე დაწერა მისალოცი პოსტი ნატო-ს გენერალურმა მდივანმა, მარკ რუტემ სოციალურ ქსელში.ისრაელის პრემიერ-მინისტრი ბენიამინ ნეთანიაჰუს მისალოც წერილში კი ვკითხულობთ: „ძვირფასო დონალდ და მელანია, გილოცავთ ისტორიაში უდიდეს დაბრუნებას. თქვენი ისტორიული დაბრუნება თეთრ სახლში გვთავაზობს ახალ დასაწყისს ამერიკისთვის და ვალდებულებას ისრაელსა და ამერიკას შორის დიდებული ალიანსისთვის. ეს დიდი გამარჯვებაა. თქვენი ნამდვილი მეგობარი, ბენიამინი და სარა ნეთანიაჰუ“.5 ნოემბერს აშშ-ში ჩატარდა კონგრესის წარმომადგენელთა პალატის, სენატის წევრთა მესამედის და 11 შტატის გუბერნატორის არჩევნებიც.ამ დროისთვის არსებული მონაცემებით, 100 ადგილიან სენატში რესპუბლიკელებს 48 ადგილი აქვთ, დემოკრატებს – 39, 435 ადგილიან წარმომადგენელთა პალატაში კი, სადაც გამარჯვებისთვის 218 ხმაა საჭირო, ასევე წინასწარი მონაცემებით, რესპუბლიკელებს 166 ადგილი აქვთ, დემოკრატებს კი - 113.წარმომადგენელთა პალატის ყოფილი სპიკერი ნენსი პელოსი კონგრესში ბრუნდება. როგორც გამოცემა „ჰილი“ წერს, ეს პელოსისთვის კონგრესში მე-20 ვადა იქნება.სან-ფრანცისკოელმა ლიბერალმა კალიფორნიის მე-11 ოლქში მარტივად გაიმარჯვა, სადაც დაამარცხა ნომინალური მეტოქე, რესპუბლიკელი ბრუს ლუ.

1730799094

ყოველთვის არ იმარჯვებს ის, ვისაც მეტი ხმა ერგება - როგორ ირჩევს აშშ პრეზიდენტს

დღეს აშშ-ში საპრეზიდენტო არჩევნებია, რომლის შედეგებსაც მსოფლიო მოუთმენლად ელოდება.  როგორც ექსპერტები ამბობენ, ამ თარიღმა, შესაძლოა,  ამერიკისა და დანარჩენი მსოფლიოს დღის წესრიგი რადიკალურად შეცვალოს.  არჩევნებში ერთმანეთს ამერიკის ყოფილი, რიგით 45-ე პრეზიდენტი, რესპუბლიკელი, დონალდ ტრამპი და ქვეყნის მოქმედი ვიცე-პრეზიდენტი,  დემოკრატი, კამალა ჰარისი უპირისპირდებიან.  „ყოველთვის არ იმარჯვებს ის, ვისაც ყველაზე მეტი ხმა ერგო“,- ამერიკის საპრეზიდენტო არჩევნებზე საუბრისას ალბათ ხშირად გაგიგონიათ ეს ფრაზა.  ასე მოხდა მაგალითად  2016 წელს ჰილარი კლინტონის შემთხვევაში. საპრეზიდენტო არჩევნებში  კლინტონი ტრამპის კონკურენტი იყო, მან მოწინააღმდეგეზე 3 მილიონით მეტი ხმა მიიღო, თუმცა პრეზიდენტი მაინც დონალდ ტრამპი გახდა.  რა ხდება საქმე ისაა, რომ ამერიკაში მოსახლეობა პრეზიდენტს არაპირდაპირი წესით ირჩევს. მარტივი სიტყვებით რომ ვთქვათ, ისინი პირდაპირ, ხმის მიცემით კი არ ირჩევენ პრეზიდენტს, არამედ ირჩევენ ე.წ. საარჩევნო კოლეგიას, რომელმაც შემდგომში გამარჯვებული კანდიდატი უნდა გამოავლინოს.  საარჩევნო კოლეგია ამერიკის კონსტიტუციის საფუძველზე შექმნილი ორგანოა, რომელიც 538 წევრისგან შედგება. იმისათვის, რომ კანდიდატი პრეზიდენტი გახდეს, მას მინიმუმ 270 წევრის ხმა სჭირდება. კოლეგიაში ერთიანდება აშშ-ის 50-ვე შტატი - ყველა შტატს აქვს ხმის მიცემის უფლება. თუმცა, რაც უფრო დიდი და მრავალრიცხოვანია შტატი, მით უფრო  მეტი ხმა აქვს  მას საარჩევნო კოლეგიაში.  მაგალითად: კალიფორნიიის შტატს საარჩევნო კოლეგიაში 55 ხმა აქვს, ტეხასის შტატს - 40, ფლორიდას 30, ნიუ-იორკს - 28.  ნებრასკისა და მენის შტატის გარდა, თითქმის ყველა შტატს, მათ შორის ვაშიგნტონს  აქვს ე.წ.  გამარჯვებულს ეკუთვნის  შტატის კუთვნილი საარჩევნო კოლეგიის ყველა ხმა. ანუ,  მაგალითად - თუ კალიფორნიაში ხალხის ხმებით დემოკრატმა კანდიდატმა გაიმარჯვა  - მისია  55-ხმა, რომელიც კალიფორნიას საარჩევნო კოლეგიაში ეკუთვნის.  ასევე ამერიკაში შტატები დაყოფილია წითელ და ლურჯ ფერებად - წითელი ფერი წარმოადგენს რესპუბლიკურ პარტიას, ლურჯი კი დემოკატებს. ასეთ შტატებს პროგნოზირებად შტატებსაც უწოდებენ ხოლმე. რადგან წარსულმა გამოცდილებებმა არაერთხელ აჩვენა, რომ წითელ შტატებში თითქმის ყოველთვის რესპუბლიკელები იმარჯვებენ, ხოლო ლურჯში დემოკრატები.  ასევე, არსებობს ე.წ. მერყევი შტატები, რომელთა შორისაც არის - არიზონა, ჯორჯია, მიჩიგანი, ნევადა, ჩრდილოეთ კაროლინა, პენსილვანია და უისკონსინი. ამ შტატებში ყოველთვის განსხვავებული შედეგები იდება ხოლმე, ამიტომ არცერთ წელს არ იციან, რა მოხდება აქ და რა გადაწყვეტილებას მიიღებს მოსახლეობა.   ახლა კი რაც შეეხება კანდიდატებს: დავიწყოთ კამალა ჰარისით, რომელსაც მხარს ისეთი ცნობილი სახეები უჭერენ, როგორებიც ჰარისონ ფორდი, ლებრონ ჯეიმსი, ჯენიფერ ლოპესი, მადონა, სკარლეტ იოჰანსონი, ტეილორ სვიფტი, კარდი ბი, არნოლდ შვარცენეგერი და ბიონსე არიან... სია საკმაოდ გრძელია...  კამალა ჰარისის მხარდასაჭერად მათ არაერთი ვიდეო რგოლი ჩაწერეს.  აღსანიშნავია, რომ არჩევნებამდე რამდენიმე კვირით კამალა ჰარისი რეპერ შონ დიდი ქომბსის წვეულებებში მონაწილეობაშიც დაადანაშაულეს. თუმცა, როგორც შემდეგ გაირკვა,  ეს დეზინფორმაცია იყო.  რაც შეეხება კამალა  ჰარისის 2020 წელს დაწერილ ტვიტს, სადაც ის პი დიდის მადლობას უხდის -  როგორც აღმოჩნდა, რეალურად ჰარისმა Diddy-ის მადლობა იმ ონლაინ ღონისძიების მასპინძლობისთვის, გადაუხადა,  რომელიც  აშშ-ში კოვიდის გამო გამოწვეულ რასობრივ უთანასწორობას ეხებოდა.  რამდენიმე ფაქტი კამალა ჰარისზე: კამალა დევი ჰარისი ოუკლენდში დაიბადა.  მისი სახელი ჰინდურ ენაზე „ლოტუსს“ ნიშნავს. აღსანიშნავია, რომ ჰარისის მშობლები  აქტიურად იყვნენ ჩართული სამოქალაქო უფლებების მოძრაობაში,  მათ პატარა კამალა საპროტესტო აქციების დროს სულ თან დაჰყავდათ. ჯერ კიდევ 13 წლის იყო ის, როდესაც მის მეზობლად მცხოვრები ბავშვები შეკრიბა და საპროტესტო აქცია გამართა იმ წესების წინააღმდეგ, რომლის მიხედვითაც ბავშვებს მათი საცხოვრებელი კორპუსის წინ მდებარე გაზონზე თამაშის უფლება არ ჰქონდათ. კამალა ჰარისს მნიშვნელოვანი რეპუტაცია და აღიარება მოუტანა ისეთ თემებზე მუშაობამ, როგორიც იყო ჯგუფური ძალადობის, ნარკოტრეფიკინგისა და სექსუალური ძალადობის საქმეები.  ის  აშშ-ის ისტორიაში პირველი  ქალია, რომელმაც ვიცე-პრეზიდენტის თანამდებობა დაიკავა.  თავად კამალა თავის თავს „მკაცრ ბოსს“ უწოდებს - ჰარისის  ცხოვრებისეული  დევიზი კი ასე გამოიყურება - „შენ შეიძლება იყო პირველი, მაგრამ დარწმუნდი, რომ უკანასკნელი არ ხარ“;არ უყვარს, როდესაც „ქალ ობამას“ ეძახიან. როდესაც ჟურნალისტმა ჰკითხა, ხომ არ გააგრძელებდა ობამას მემკვიდრეობას, კამილამ უპასუხა: „მე ჩემი მემკვიდრეობა მაქვს“. დონალდ ტრამპი დონალდ ტრამპის მხარდამჭერთა სიაში წამყვან ადგილს იკავებენ: რეპერი კანიე უესტი, ილონ მასკი, კიმ კარდაშიანი, 50 cent და მელ გიბსონი. როგორც მოსალოდნელი იყო, ტრამპის წინა საარჩევნო კამპანიას არ ჩაუვლია სკანდალების გარეშე. პენსილვანიაში ამომრჩევლებთან შეხვედრაზე, სიტყვით გამოსვლის დროს,  ტრამპს რამდენჯერმე ესროლეს. სროლის შედეგად დაიღუპა შეკრების ერთი მონაწილე, ორი კი კრიტიკულად დაშავდა.  ასევე, მილიარდერი ილონ მასკი, რომელიც ტრამპის ამომრჩევლებს შორის 1 მილიონი დოლარის გათამაშებას აპირებდა - სასამართლოში დაიბარეს.  ჩვენი გადაცემის ფორმატიდან გამომდინარე, დღეს ტრამპის საარჩევნო პროგრამას არ მიმოვიხილავთ, თუმცა ჩვენს მაყურებელს აშშ-ს  პრეზიდენტობის კანდიდატის შესახებ რამდენიმე უცნობ ფაქტს მოვუყვებით: ცოტამ თუ იცის, რომ 13 წლის ასაკში დონალდ ტრამპი სკოლაში დისციპლინასთან დაკავშირებული პრობლემების გამო, ნიუ-იორკის სამხედრო აკადემიაში გააგზავნეს, სადაც მან „ხმამაღალი მჩაგვრელის" წოდებაც კი დაიმსახურა.  ტრამპს ძალიან უყვარს ფსევდონიმების გამოყენება - უცხოური მედიის ცნობით, ჯონ მილერი და ჯონ ბარონი დონალდ ტრამპის საყვარელი ფსევდონიმებია. ყოფილა შემთხვევები, როცა მედიას ტრამპი სწორედ ამ სახელებით ეკონტაქტებოდა. ის თავს ხან  "ტრამპის ორგანიზაციის ვიცე-პრეზიდენტად" მოიხსენიებოდა, ზოგჯერ კი კომპანიის სახელით ჩიოდა სასამართლოებში.  მას საკუთარი  სამაგიდო თამაში აქვს -  სახელად „ტრამპი".  არსებობს დონალდ ტრამპის სათამაშო ფიგურებიც. ტრამპს დაწერილი აქვს წიგნი, სახელწოდებით, „გარიგების ხელოვნება“.  ფორბსის 2024 წლის ოქტომბრის მონაცემებით, ტრამპის ქონება 6, 6 მილიარდ დოლარს შეადგენს.   

1719561780

„დედა მოგვ***ა“ - ფაქტები და შეფასებები ტრამპისა და ბაიდენის დებატებზე

27 ივნისს, ატლანტაში, ჯო ბაიდენსა და დონალდ ტრამპს შორის დებატები გაიმართა. ეს ბაიდენის და ტრამპის პირველი და საკმაოდ ნაადრევი საჯარო დაპირისპირებაა 2024 წლის საარჩევნო სამზადისში.დემოკრატები პრეზიდენტ ჯო ბაიდენის დებატებზე გამოსვლის გამო სასოწარკვეთილები არიან.საზოგადოების ნაწილი ისტორიულ დებატებს კატასტროფულს უწოდებს და ამბობს, რომ პრეზიდენტმა პოზიციები დათმო ისეთ საკითხებზეც კი, რომლებშიც დემოკრატებს უპირატესობა ჰქონდათ. აი რას წერს CNN-ი.„როგორც ჩანს, დემოკრატებს მხოლოდ რამდენიმე წუთი დასჭირდათ იმის გასააზრებლად, თუ რამდენად ცუდად არის ყველაფერი.„ბაიდენი საშინლად გამოიყურება. აბნეულია“, - განაცხადა ერთ-ერთმა დემოკრატმა, რომელიც გარკვეული პერიოდი ბაიდენის ადმინისტრაციაში მუშაობდა. „საშინელებაა“, - თქვა პარტიის სხვა წარმომადგენელმა.ერთმა დემოკრატმა კი, რომელიც საარჩევნო კამპანიაზე მუშაობს, თქვა: „დედა მოგვე***ა“, - წერს CNN-ი.The Guardian-ი და მისი ექსპერტები ამერიკის მოქმედი და ყოფილი პრეზიდენტების დებატებს აფასებენ. ბრიტანული გამოცემა წერს, რომ თეთრი სახლის მოქმედი ხელმძღვანელის გამოსვლა იმდენად არადამაჯერებელი იყო, რომ დემოკრატები მისი კანდიდატურის მოხსნაზეც კი ფიქრობენ.„ის ფაქტი, რომ ლიბერალური წრეები საუბრობენ იმის შესახებ, შეიძლება თუ არა მოქმედი პრეზიდენტის [კანდიდატურის] ჩანაცვლება მაშინ, როდესაც მან შიდაპარტიული პრაიმერიზი მოიგო, გვიჩვენებს, რამდენად უჭირთ „დემოკრატებს“ დებატების შემდეგ იმის დადასტურება, რომ ბაიდენს ქვეყნის მართვა შეუძლია. ბევრს აინტერესებს, უნდა აწარმოოს თუ არა „დემოკრატიულმა პარტიამ“ სერიოზული დისკუსიები იმის თაობაზე, თუ რა შეიძლება კიდევ გაკეთდეს ამის [ბაიდენის ჩანაცვლების] ნაცვლად“, - აღნიშნავენ გამოცემაში.BBC აშშ-ის პრეზიდენტობის კანდიდატების დებატების პირველ რაუნდს აფასებს. გამოცემა წერს, რომ თეთრი სახლის მოქმედი მმართველის გამოსვლამ მის ასაკთან დაკავშირებული შიშები გაამძაფრა.„მართლა არ ვიცი რა თქვა ამ წინადადების ბოლოს და, ვფიქრობ, მანაც არ იცის“, - აღნიშნა ტრამპმა ბაიდენის ერთ-ერთი პასუხის შემდეგ. „შესაძლოა, ეს პასუხი იყოს მთელი ღამის შეჯამება“, - წერს BBC და დასძენს, რომ დებატების მსვლელობისას, ბაიდენი უფრო კონცენტრირებული გახდა.რაც შეეხება ტრამპს, ის უფრო დისციპლინირებული იყო, ვიდრე 2020 წლის დებატებში. ის არ აწყვეტინებდა სიტყვას ოპონენტს. თუმცა ტრამპი სუსტად გამოიყურებოდა, როცა საუბრობდა აბორტების აკრძალვაზე და პირად სკანდალებზე.მე ჩავკეტე საზღვრები და გვქონდა ყველაზე უსაფრთხო ქვეყანა ისტორიაში, ახლა კი ყველაზე საშინელი საზღვარი გვაქვს, - თქვა აშშ-ის ყოფილმა პრეზიდენტმა, დონალდ ტრამპმა.გარდა ამისა, დონალდ ტრამპმა ბაიდენს კრიმინალი უწოდა.„ეს კაცი კრიმინალია. ის იღბლიანია. მე არაფერი ჩამიდენია არასწორი. ჩვენ გვაქვს სისტემა, რომელიც არის გაყალბებული და ამაზრზენი“, – აღნიშნა ტრამპმა.აშშ-ის მოქმედმა პრეზიდენტმა, ჯო ბაიდენმა კი აღნიშნა, რომ სცენაზე ერთადერთი გასამართლებული დამნაშავე დონალდ ტრამპია. ბაიდენის თქმით, მოსაზრება, რომ მან რამე დანაშაული ჩაიდინა, აღმაშფოთებელია.დონალდ ტრამპმა მოქმედ პრეზიდენტს, ჯო ბაიდენს ასევე წუწუნა უწოდა და უთხრა, რომ არც ქვეყანაში და არც მსოფლიოში არ სცემენ პატივს. როგორც ტრამპმა აღნიშნა, ბაიდენს პატივს სამხედროებიც არ სცემენ.„როგორც ბევრი პოლიტიკოსი, ეს კაცი უბრალოდ წუწუნაა. მან თქვა: „ჩვენ ამას გავაკეთებთ, ჩვენ იმას გავაკეთებთო“, გვინდა მოვიშოროთ ეს გადასახადები, თუმცა არაფერს აკეთებს. რასაც ეს კაცი აკეთებს, არის ის, რომ ჩვენი ქვეყანა აღარ არის უსაფრთხო მილიონობით ადამიანის შემოშვების გამო. ჩვენი სამხედროები მას პატივს არ სცემენ. სულელებივით გამოვიყურებით ავღანეთში. ვერ აღვკვეთეთ ისრაელში მომხდარი, ეს იყო ისეთი საშინელება, რაც არასდროს უნდა მომხდარიყო. ირანი გაკოტრებული იყო. ყველა, ვინც ირანთან საქმიანობდა, მათ შორის ჩინეთი, აშშ-სთან საქმიანობას ვეღარ აწარმოებდნენ. ირანი გაკოტრებული იყო, მათ არ ჰქონდათ ფული „ჰამასისთვის“ ან „ჰეზბოლასთვის“, ტერორისთვის,- მიმართა ტრამპმა ბაიდენს.ყველაზე დამაჯერებელი ჯო ბაიდენი აშშ-ის საგარეო პოლიტიკაზე საუბრისას იყო, როდესაც ნატოს მნიშვნელობაზე, უკრაინის მხარდაჭერისა და რუსეთის წინააღმდეგ მოქმედების აუცილებლობაზე საუბრობდა.„ფაქტი ისაა, რომ პუტინი ომის დამნაშავეა! მას ასიათასობით ხალხი ჰყავს მოკლული. და ერთადერთი, რასაც არ მალავს, არის ის, რომ საბჭოთა იმპერიის აღდგენა სურს. მთელი უკრაინა უნდა. შენ რა გგონია, მანდ გაჩერდება“?! - მიმართა ტრამპს.კითხვაზე, აღიარებს თუ არა 2024 წლის არჩევნების შედეგებს დონალდ ტრამპი, მან თქვა რომ აღიარებს იმ შემთხვევაში, თუ არჩევნები „სამართლიანი და კანონიერი“ იქნება.მან არაერთხელ გაიმეორა ცრუ ინფორმაცია 2020 წლის საპრეზიდენტო არჩევნების „გაყალბების“ შესახებ, - რაზეც მისი საარჩევნო კამპანია ხშირად ფოკუსირდება.„სიენენის“ ინფორმაციით, რეგისტრირებული ამომრჩევლების უმრავლესობა, რომლებიც პრეზიდენტ ჯო ბაიდენის და რესპუბლიკელი კანდიდატის დონალდ ტრამპის დებატებს უყურებდნენ, მიიჩნევენ, რომ დებატებს დონალდ ტრამპმა უკეთ გაართვა თავი.გამოკითხულთა 67 % ამბობს, რომ ტრამპმა საკუთარი პოზიციები უფრო მკაცრად გამოხატა, 33 % კი თვლის, რომ ეს ბაიდენმა უფრო კარგად გააკეთა.გამოკითხულთა 57 % თვლის, რომ ისინი არ ენდობიან ბაიდენის შესაძლებლობებს, მართოს ქვეყანა, ხოლო 44 % აცხადებს, რომ ამ მხრივ მათ ტრამპის მიმართ არ აქვთ ნდობა. ამ მიმართულებით მაღალი მაჩვენებელი არცერთ კანდიდატს აქვს, თუმცა დებატების მაყურებელთა 36% ამბობს, რომ ისინი ქვეყნის მართვაში დონალდ ტრამპს ენდობიან, მხოლოდ 14 % კი ამ მხრივ ჯო ბაიდენს ენდობა.თავად აშშ-ის მოქმედი პრეზიდენტი ჯო ბაიდენი თავის მეტოქესთან, დონალდ ტრამპთან გამართულ დებატებს გამოეხმაურა და თქვა, რომ მან კარგად გაართვა თავი.„რთულია დებატები მატყუარასთან. მან 26-ჯერ მოიტყუა, დიდი ტყუილები თქვა“, – განაცხადა ბაიდენმა.აშშ-ის დემოკრატიული პარტიის ზოგიერთი წარმომადგენელი მიიჩნევს, რომ პარტიამ საპრეზიდენტო კანდიდატი უნდა შეცვალოს.დემოკრატმა სტრატეგმა, ტერინ ბონდმა Sky News-სთან საუბარში თქვა, რომ ჯო ბაიდენის ნაცვლად პრეზიდენტობის კანდიდატად ვიცე-პრეზიდენტი კამალა ჰარისი არ უნდა დასახელდეს, რადგან ქვეყანა შავკანიანი ქალის პრეზიდენტობსთვის მზად არ არის.მისი თქმით, კარგი კანდიდატები იქნებოდნენ კალიფორნიის გუბერნატორი, გეივინ ნიუსომი და მიჩიგანის გუბერნატოი გრეტჩენ უიტმერი“, – განაცხადა ტერინ ბონდმა.„კი, ეს იყო ნელი დასაწყისი, მაგრამ იქნება ძლიერი დასასრული“, - თქვა ვიცე-პრეზიდენტმა კამალა ჰარისმა CNN-თან ინტერვიუში.ნანა ჩხაიძე

1717131780

ამერიკის თუ ტრამპის „ბნელი ღამე“ - ისტორიაში პირველად, სისხლის სამართლის საქმეზე გასამართლებული ექსპრეზიდენტი პრეზიდენტობისთვის ბრძოლას აგრძელებს

ნიუ იორკის ნაფიც მსაჯულთა სასამართლომ ამერიკის ყოფილი პრეზიდენტი დონალდ ტრამპი სისხლის სამართლის საქმეზე დამნაშავედ ცნო. ისტორიაში ეს სისხლის სამართლის პირველი საქმეა შეერთებული შტატების ყოფილი პრეზიდენტის წინააღმდეგ, თანაც ისეთისა, რომელიც ხელახლა არჩევისთვის იბრძვის საპრეზიდენტო არჩევნებში.ნაფიცმა მსაჯულებმა დონალდ ტრამპი 34-ვე ბრალდებაში დამნაშავედ ცნეს. მოსამართლე სასჯელს 11 ივლისს გამოაცხადებს. ტრამპს ბრალს სდებენ იმაში, რომ ის შეეცადა დაემალა პორნომსახიობ სტორმი დენიელსისთვის 130 ათასი დოლარის გადახდის ფაქტი 2016 წლის საპრეზიდენტო არჩევნების წინ, რომელშიც მან გამარჯვება მოიპოვა.დენიელსი ამტკიცებს, რომ მას ტრამპთან სექსი ჰქონდა 2006 წელს და რომ ტრამპის ყოფილმა ადვოკატმა მაიკლ კოენმა მას ფული გადაუხადა, რათა ეს ამბავი არ გაეხმაურებინა.ტრამპი უარყოფს რაიმე სამართლებრივ კანონდარღვევას, ასევე უარყოფს, რომ დენიელსთან რომანი ჰქონდა.მსაჯულები ორი დღის განმავლობაში მსჯელობდნენ ამ საქმეზე, სანამ 30 მაისს განაჩენს გამოიტანდნენ. განაჩენის გამოტანისთვის მსაჯულებს ერთხმად უნდა დაესკვნათ, რომ ტრამპმა - რომელიც მიმდინარე წლის საპრეზიდენტო არჩევნებში რესპუბლიკური პარტიის სავარაუდო კანდიდატია - თავისი კომპანიის დოკუმენტაციაში ყალბი მონაცემები შეიტანა, ან სხვა პირს უბიძგა ამის გაკეთებისკენ, და რომ ის მოქმედებდა სხვა დანაშაულის ჩადენის ან დაფარვის განზრახვით.„დონალდ ტრამპის წინააღმდეგ საქმე ჩვენი მართლმსაჯულების სისტემის იარაღად გამოყენება და დემოკრატიის შელახვის აშკარა მცდელობაა“, - განაცხადა „რესპუბლიკელმა“ კონგრესმენმა, დენ მიუზერმა.„ეს ბნელი დღეა ამერიკისთვის, ტრამპის წინააღმდეგ სასამართლო პროცესი ფიქცია იყო და სხვა არაფერია, თუ არა პოლიტიკური დევნა“, - განაცხადა „რესპუბლიკელმა“ სენატორმა, ტედ კრუზმა.„ნიუ-იორკში გამოტანილი განაჩენი ჩვენი მართლმსაჯულების სისტემის მასხრად აგდებაა. პოლიტიკური შოუ, რომელსაც გაუძღვა ბაიდენის მომხრე მოსამართლე, ნაფიცი მსაჯულები ამერიკის ყველაზე ლიბერალური ოლქიდან, აბსურდული და სასაცილო ბრალდებები. ბაიდენი და შეშლილი მემარცხენეები არაფრის წინაშე არ გაჩერდებიან ხელისუფლებაში დასარჩენად“, - აღნიშნა მარკო რუბიომ.აშშ-ის წარმომადგენელთა პალატის სპიკერმა, მაიკ ჯონსონმა დონალდ ტრამპის წინააღმდეგ გამოტანილ გამამტყუნებელ განაჩენს ამერიკის ისტორიაში სამარცხვინო დღე უწოდა.„დღეს სამარცხვინო დღეა ამერიკის ისტორიაში. „დემოკრატები“ მიესალმნენ ოპოზიციური პარტიის ლიდერის გასამართლებას სასაცილო ბრალდებებით. ჩვენი მართლმსაჯულების იარაღად გამოყენება ბაიდენის ადმინისტრაციის დამახასიათებელი ნიშანია და დღევანდელი გადაწყვეტილება კიდევ ერთი მტკიცებულებაა იმისა, რომ „დემოკრატები“ არ გაჩერდებიან“, - დასძინა მან.აშშ-ის პრეზიდენტი ჯო ბაიდენი აშშ-ის ყოფილი პრეზიდენტის, დონალდ ტრამპის სისხლის სამართლის საქმეზე ნაფიც მსაჯულთა გადაწყვეტილებას სოციალურ ქსელში ეხმაურება.„დონალდ ტრამპი ოვალურ კაბინეტს რომ ვერ მიუახლოვდეს, მხოლოდ ერთი გზა არსებობს, საარჩევნო ყუთთან“, – წერს ბაიდენი სოციალურ ქსელში.სასამართლო დაიწყო აპრილში, მოსამართლე ხუან მერჩანის ხელმძღვანელობით - რომელმაც სასჯელის განსაზღვრის დღედ 11 ივნისი დააწესა. საქმიანი მონაცემების გაყალბებისთვის მაქსიმალური სასჯელი ოთხწლიანი პატიმრობაა, თუმცა მოსამართლემ შესაძლოა გადაწყვიტოს პირობითი თავისუფლების, ან საზოგადოებისთვის სასარგებლო სამუშაოს გაწევის მისჯა.დამნაშავედ ცნობის მიუხედავად ტრამპს არ ეკრძალება კენჭისყრაში მონაწილეობა, ან თანამდებობის დაკავება, თუკი ის შეძლებს ნოემბრის არჩევნებში პრეზიდენტ ჯო ბაიდენის დამარცხებას. გავრცელებული მოლოდინით, რესპუბლიკური პარტია მას კვლავაც დაასახელებს პრეზიდენტობის კანდიდატად ივლისში - რამდენიმე დღეში მას მერე, რაც მას სასჯელის ზომას შეუფარდებენ.ვერდიქტზე პასუხად ტრამპმა განაცხადა, რომ ის "უდანაშაულო კაცია", და რომ "ჭეშმარიტ ვერდიქტს ხალხი 5 ნოემბერს გამოიტანს".

1702624812

რას ნიშნავს მოლაპარაკებების ეტაპი, რომელიც ქვეყნისთვის კანდიდატის სტატუსის მინიჭებას მოჰყვება

14 დეკემბერს ევროკავშირმა საქართველოს კანდიდატი ქვეყნის სტატუსი მიანიჭა.ქვეყნისთვის კანდიდატის სტატუსის მინიჭების შემდეგ, ევროკავშირი მასთან გაწევრიანებაზე მოლაპარაკების პროცესს იწყებს.მოლაპარაკებები დაყოფილია 35 თავად, რომლებიც 6 თემატურ ბლოკშია დაჯგუფებული: საფუძვლები; შიდა ბაზარი; კონკურენცია და ინკლუზიური ზრდა; მწვანე დღის წესრიგი და მდგრადი კავშირები; რესურსები, სოფლის მეურნეობა და ერთიანობის პოლიტიკა; საგარეო ურთიერთობები.თითოეულ ბლოკზე მოლაპარაკებები იწყება ერთიანად - მას მერე, რაც ქვეყანა განსაზღვრულ მაჩვენებლებს მიაღწევს. თითოეულ თავზე მუშაობა წარიმართება ინდივიდუალურად, მისი პირობითი დახურვის მიზნით.საფუძვლების შესახებ მოლაპარაკებები იხსნება პირველ რიგში და იხურება ბოლოს; ამ ბლოკში მიღწეული წინსვლა მოლაპარაკებების საერთო ტემპს განსაზღვრავს.საფუძვლები მოიცავს მიმართულებებს:სასამართლო სისტემა და ფუნდამენტური უფლებები; სამართალი, თავისუფლება და უსაფრთხოება; სახელმწიფო შესყიდვები; სტატისტიკა; ფინანსური კონტროლი.ევროკავშირის წევრობის მსურველი ქვეყნების უმრავლესობას რამდენიმე ურთიერთგადამკვეთი პოლიტიკური საკითხის მოგვარება უწევს. ამაში შედის:კანონის უზენაესობა; სამოქალაქო საზოგადოება და გამოხატვისა და მედიის თავისუფლება.გაწევრიანების კრიტერიუმები, იგივე კოპენჰაგენის კრიტერიუმები (მიემართება ევროპული საბჭოს 1993 წლის კოპენჰაგენის სამიტს, რომელზეც განისაზღვრა ეს კრიტერიუმები) ის არსებითი პირობებია, რომელიც ყველა კანდიდატმა ქვეყანამ უნდა შეასრულოს, რათა გახდეს წევრი სახელმწიფო.კანდიდატი ქვეყნის გზა ევროკავშირის სრულუფლებიან წევრობამდე კომპლექსურია და გაწევრიანების ვადებს ბევრი ფაქტორი განსაზღვრავს, თუმცა, კანდიდატი ქვეყნის მიერ, ევროკავშირის კრიტერიუმების შესრულებაში მიღწეული პროგრესი მთავარი საზომი იქნება. წევრობის მინიჭებამდე, ევროკავშირი ზედმიწევნით აფასებს კანდიდატი ქვეყნის უნარს, შეძლებს თუ არა ის გაერთიანების პრინციპებისა და ღირებულებების დაცვას.გაწევრიანება დამსახურებაზე დაფუძნებული პროცესია და თითოეული ქვეყნის მიერ მიღწეულ ობიექტურ პროგრესზეა დამოკიდებული.

1697309712

ისრაელ-პალესტინის კონფლიქტის მოკლე ისტორია

როგორ წარმოიშვა ეს კონფლიქტი?კონფლიქტის არსია ის, რომ ისრაელი ითხოვს უსაფრთხოებას რეგიონში, რომელსაც მისდამი მტრულად განწყობილად მიიჩნევს, პალესტინელები კი საკუთარი სახელმწიფოს შექმნისკენ მიილტვიან.აღმოსავლეთ ხმელთაშუაზღვისპირეთი, დღევანდელი ისრაელი და პალესტინის ტერიტორია, ოსმალეთის იმპერიის შემადგენლობაში შედიოდა საუკუნეების განმავლობაში. იქ მეტწილად მშვიდობიანად თანაცხოვრობდნენ მუსლიმები და ქრისტიანები, და მცირე რაოდენობით, ებრაელებიც.მეოცე საუკუნის დასაწყისში ათასობით ათასი ევროპელი ებრაელი გადასახლდა ამ ტერიტორიაზე, რომელსაც თავიანთ ისტორიულ სამშობლოდ მიიჩნევდნენ. ჰოლოკოსტს კიდევ უფრო მეტი ებრაელის ემიგრაცია მოჰყვა ევროპიდან, მათ შორის შუა აღმოსავლეთშიც.როცა ადგილობრივ არაბებში პალესტინური ეროვნული იდენტობა ყალიბდებოდა, ევროპაში ფეხს იდგამდა სიონიზმი, ებრაელთა მოძრაობა, რომელიც მრავალწლიანი დევნისა და შევიწროების შემდეგ, გადარჩენისთვის ებრაული სახელმწიფოს შექმნას ქადაგებდა.დავიდ ბენ-გურიონმა ისრაელის თანამედროვე სახელმწიფოს შექმნა 1948 წლის 14 მაისს გამოაცხადა. ამის წინააღმდეგნი იყვნენ პალესტინელები და მათ შორის გარშემო ახლად დამოუკიდებლობამოპოვებული არაბული სახელმწიფოები - ეგვიპტე, იორდანია, სირია და ერაყი. დამოუკიდებლობის გამოცხადების შემდეგ ისინი თავს დაესხნენ ახლად შექმნილ სახელმწიფოს.1948 წლის ომის შედეგად 700 ათასი პალესტინელი - ბრიტანეთის მიერ მართული მაშინდელი პალესტინის არაბული მოსახლეობის ნახევარი - სახლებიდან გაიქცა ან ამის გაკეთება აიძულეს.ეს მოვლენა ცნობილია როგორც „ნაკბა“, რაც არაბულად კატასტროფას ნიშნავს.პალესტინელი ლტოლვილები საბოლოოდ იორდანიაში, ლიბანში, სირიაში, ღაზაში, დასავლეთ სანაპიროზე და აღმოსავლეთ იერუსალიმში დაფუძნდნენ.ომის დროს ისრაელში დარჩენილი პალესტინელები კი ამ ქვეყნის მოსახლეობის 20 პროცენტს შეადგენენ.1949 წელს ზავი დაიდო, თუმცა ოფიციალური სამშვიდობო დოკუმენტი არ გაფორმებულა.1967 წელს ისრაელმა პრევენციული დარტყმა განახორციელა ეგვიპტისა და სირიის წინააღმდეგ. ამით დაიწყო 6-დღიანი ომი, რომლის დროსაც ისრაელმა დაიკავა დასავლეთი სანაპირო, იორდანიისგან მოიპოვა აღმოსავლეთი იერუსალიმი, სირიისგან კი - გოლანის მაღლობები.1973 წელს ეგვიპტემ და სირიამ იერიში მიიტანეს ისრაელის პოზიციებზე სუეცის არხის და გოლანის მაღლობების გასწვრივ, რასაც იომ-ქიფურის ომი მოჰყვა. ისრაელმა ორივე არმია სამ კვირაში უკუაგდო.1982 წელს ისრაელი შეიჭრა ლიბანში. იასირ არაფატის ათასობით პალესტინელი მებრძოლი 10 კვირის განმავლობაში ალყაში იმყოფებოდა, ვიდრე მათი ევაკუაცია ზღვით არ განხორციელდა. 2006 წელს ლიბანში ომი განახლდა მას შემდეგ, რაც „ჰეზბოლას“ მებრძოლებმა ისრაელის ორი ჯარისკაცი აიყვანეს ტყვედ და ისრაელმა საპასუხო თავდასხმა განახორციელა.2005 წელს ისრაელმა დატოვა ღაზა, რომელიც 1967 წელს ეგვიპტესთან ბრძოლის შემდეგ ჰქონდა დაკავებული. ღაზა მნიშვნელოვანი შეტაკებების ეპიცენტრი იყო 2006, 2008, 2012, 2014 და 2021 წლებში.ომების გარდა პალესტინელებმა ორი ინტიფადა, ანუ აჯანყება მოაწყვეს 1987-1993 და 2000-2005 წლებში.როგორ ცდილობდნენ მშვიდობის დამყარებას?1979 წელს ეგვიპტემ და ისრაელმა ხელი მოაწერეს სამშვიდობო შეთანხმებას, რითაც დასრულდა 30-წლიანი მტრობა.1993 წელს ისრაელის პრემიერ-მინისტრი იცხაკ რაბინი და არაფატი ოსლოს ხელშეკრულებაზე შეთანხმდნენ, რომელიც პალესტინის შეზღუდულ ავტონომიას ითვალისწინებდა.1994 წელს ისრაელმა სამშვიდობო ხელშეკრულება დადო იორდანიასთან.2000 წელს კემპ დევიდის სამიტში მონაწილეობდნენ აშშ-ის პრეზიდენტი ბილ კლინტონი, ისრაელის პრემიერი ეჰუდ ბარაკი და არაფატი. სამიტი საბოლოო სამშვიდობო შეთანხმების გარეშე დასრულდა.2002 წელს ისრაელს შესთავაზეს არაბული გეგმა, რომელიც ითვალისწინებდა ურთიერთობის ნორმალიზებას ყველა არაბულ ქვეყანასთან. სანაცვლოდ ისრაელს უნდა დაეტოვებინა 1967 წელს ომის დროს დაკავებული ტერიტორიები, შექმნილიყო პალესტინის სახელმწიფო და „სამართლიანად გადაწყვეტილიყო“ პალესტინელი ლტოლვილების პრობლემა.2014 წლიდან სამშვიდობო მოლაპარაკებები შეჩერდა მას შემდეგ, რაც ვაშინგტონში ისრაელსა და პალესტინელებს შორის ვერ მოხერხდა შეთანხმების მიღწევა.პალესტინელებმა მოგვიანებით უარი განაცხადეს აშშ-ის პრეზიდენტის, დონალდ ტრამპის ადმინისტრაციასთან თანამშრომლობაზე, რადგან მან მხარი არ დაუჭირა ორი სახელმწიფოს პრინციპს - სამშვიდობო ფორმულას, რომლის მიხედვითაც 1967 წელს ისრაელის მიერ დაპყრობილ ტერიტორიაზე პალესტინის სახელმწიფო შეიქმნება.

1692947832

პუტინის კლანის „გამოცხადებული სიკვდილის ქრონიკა“ - როგორ იგეგმება პოლიტიკური მკვლელობები

ადამიანის სიცოცხლეს მსოფლიოს ერთ-ერთი ყველაზე სასტიკი „ტერორისტი“ პუტინისთვის არანაირი ფასი არ აქვს, არც ქვეყნის შიგნით და მითუმეტეს არც ქვეყნის ფარგლებს გარეთ. ის დამცირებას არავის და არასდროს პატიობს! ეს კარგად უნდა სცოდნოდა პრიგოჟინს. გასარკვევი მხოლოდ ის იყო, როდის და ხერხით იძიებდა პუტინი შურს...„ვაგნერის“ ჯგუფის მიერ ივნისის ბოლოს როსტოვში შტაბის დაკავება, პრიგოჟინის თავხედობის და პუტინის დამცირების მწვერვალი იყო – ამგვარად მიიღო ეს ფაქტი მთელმა მსოფლიომ.თუ ავიაკატასტროფაში პრიგოჟინის დაღუპვა დადასტურდა, ეს იქნება პუტინის "პოლიტიკური გენოციდის" კიდევ ერთი შემთხვევა. ვინ იქნება შემდეგი? რუსული სიკვდილის ბრიგადები – რეჟიმის მიერ შეკვეთილი მკვლელობები 23 აგვისტოს საღამოს ტვერის რეგიონში ჩამოვარდა „ვაგნერის“ დამფუძნებლის, ევგენი პრიგოჟინის თვითმფრინავი. ბიზნესჯეტი მოსკოვიდან სანქტ-პეტერბურგში მიფრინავდა. მასში იმყოფებოდა 10 ადამიანი, მათ შორის, ეკიპაჟის სამი წევრი. ტვერის მახლობლად, თვითმფრინავის ჩამოვარდნის ადგილზე, სამძებრო ოპერაცია დასრულდა, ნაპოვნია თვითმფრინავში მყოფი ათივე ადამიანის გვამები.24 აგვისტოს რუსეთის პრეზიდენტმა ვლადიმირ პუტინმა ირიბად დაადასტურა კერძო სამხედრო კომპანია „ვაგნერის“ დამფუძნებლის, ევგენი პრიგოჟინის სიკვდილი ტვერის ოლქში მომხდარ ავიაკატასტროფაში.„პრიგოჟინს ვიცნობდი ძალიან დიდი ხნის განმავლობაში, 90-იანი წლების დასაწყისიდან. ის იყო რთული ბედის ადამიანი. სერიოზულ შეცდომებსაც უშვებდა და საჭირო შედეგებსაც აღწევდა საკუთარი თავისთვისაც და მაშინაც, როცა მას ამაზე ვთხოვდი ხოლმე, როგორც ამ ბოლო თვეებში. იყო ნიჭიერი ადამიანი, ნიჭიერი ბიზნესმენი“, - განაცხადა რუსეთის პრეზიდენტმა. იმრან ალიევი 2020 წლის 30 იანვარს სასტიკად მოკლეს საფრანგეთში მცხოვრები ჩეჩენი ბლოგერი იმრან ალიევი, მეტსახელად „მანსურ სტარი“.ამავე წლის 26 თებერვალს შვედეთში მცხოვრები ცნობილი ჩეჩენი ბლოგერისა და რამზან კადიროვის კრიტიკოსის თუმსო აბდურაჰმანოვის ბინაში უცნობი მამაკაცი შეიჭრა და მძინარე ბლოგერს თავში რამდენჯერმე ჩაარტყა ჩაქუჩი, თუმცა აბდურაჰმანოვმა მოახერხა თავდამსხმელის მოგერიება, განეიტრალება და პოლიციისთვის ჩაბარება.როგორც გამოძიებამ შემდგომში დაადგინა, თავდასხმის უკან რუსეთის მოქალაქეების ჯგუფი იდგა.კადიროვის სიკვდილის ბრიგადებზე საინტერესო მოსაზრება აქვს რონდელის ფონდის მკვლევარს, ალექსანდრე კვახაძეს.მისი თქმით, რამზან კადიროვი, რომელიც წლებია ერთპიროვნულად მართავს ჩეჩნეთის რესპუბლიკას, შეუწყნარებელია განსხვავებული აზრის მიმართ, როგორც ჩეჩენეთში, ისე მის ფარგლებს გარეთ:„ჩეჩნეთში პოლიტიკური და განსხვავებული აზრის გამო დევნა არ არის ახალი მოვლენა. იქ მომუშავე არაერთი უფლებადამცველი პოლიტიკური დევნისა და ანგარიშსწორების მსხვერპლი გამხდარა.გარდა ამისა, რუსეთის ფედერაციის მასშტაბით გავრცელებულია ე.წ. „ბოდიშის მოხდის“ ვიდეოების პრაქტიკა, როდესაც რამზან კადიროვის საჯარო კრიტიკოსს მუქარითა თუ ძალადობით თავისი  სიტყვების უკან წაღებასა და რამზან კადიროვისთვის ბოდიშის მოხდას აიძულებენ და მისი მობოდიშება საჯაროვდება“.კადიროვის და ზოგადად, პუტინის რეჟიმის მსხვერპლთა სია საკმაოდ ვრცელია და ამ ჩამონათვალში წამყვან ადგილს ჟურნალისტები და სამოქალაქო აქტივისტები იკავებენ.კადიროვი-პუტინის რეჟიმის განსაკუთრებულ სამიზნეს წარმოადგენენ დევნილობაში მყოფი ჩეჩნებიც.არის შემთხვევები, როცა რუსეთის სპეცსამსახურები მკვლელობის ადგილიდან ყველანაირ მტკიცებულებას აქრობენ და როგორც წესი, კატეგორიულად უარყოფენ გახმაურებულ მკვლელობებთან ოფიციალური მოსკოვის კავშირს. ზელიმხან ხანგოშვილი ერთ-ერთი შემთხვევა ბერლინში საქართველოს მოქალაქის, ზელიმხან ხანგოშვილის მკვლელობას უკავშირდება.ცხადია, პუტინის რუსეთმა ამ შემთხვევაშიც მკვლელობასთან ყოველგვარი კავშირი უარყო, თუმცა გერმანიის პროკურატურა უკვე დაბეჯითებით ირწმუნება, რომ დანაშაულში რუსეთის სპეცსამსახურების ხელი ურევია.მომხდარის გამო, გერმანიამ ორი რუსი დიპლომატი ქვეყნიდან გააძევა. Bellingcat-მა გამოაქვეყნა ჟურნალისტური გამოძიება, რომლის თანახმად, ხანგოშვილის მკვლელი ვინმე ვადიმ ნიკოლაევიჩ კრასიკოვია.ეს პიროვნება გერმანიაში ყალბი პასპორტით იმყოფებოდა. კრასიკოვს წარსულში ინტერპოლი ეძებდა, თუმცა საერთაშორისო ძებნა რუსეთის მოთხოვნით შეწყდა. სერგეი მაგნიტსკი 37 წლის ადვოკატი სერგეი მაგნიტსკი მას შემდეგ დააპატიმრეს, რაც მან პირადად ვლადიმერ პუტინი და მთავრობის ჩინოსნები კორუფციაში დაადანაშაულა.ის 2009 წლის ნოემბერში ციხეში მოკლეს. საინვესტიციო ფონდის მოხსენებაში, რომელსაც ხელს აწერს ამერიკელი ინვესტორი უილიამ ბროვდერი, ნათქვამია, რომ მაგნიტსკის სამედიცინო დახმარებაზე უარი ყველა სამთავრობო უწყებამ უთხრა.მოგვიანებით, აშშ-ს კონგრესმა დაამტკიცა და პრეზიდენტმა ობამამ ხელი მოაწერა ე.წ. მაგნიტსკის აქტს, რომლის მიხედვით რუსეთის ხელისუფლების წარმომადგენლებს სანქციები დაუწესდათ. ალექსანდრე ლიტვინენკო FSB-ს ყოფილი აგენტი, 44 წლის ალექსანდრე ლიტვინენკო დიდ ბრიტანეთში თავშესაფარს ითხოვდა მას შემდეგ, რაც ის ვლადიმერ პუტინის და რუსეთის სპეცსამსახურების უკანონო საქმიანობაზე ალაპარაკდა, მათ შორის ჟურნალისტ ანა პოლტიკოვსკაიას მკვლელობაზე.უზარმაზარი ინფორმაციის მატარებელი ყოფილი აგენტი რუსეთის სპეცსამსახურებმა ლონდონში მოკლეს – მომაკვდინებელი რადიაციული ნივთიერება პოლონიუმით, რომელიც ლიტვნინენკოს ჩაიში ჩაუსხეს.ბრიტანეთის გამოძიებამ დაასკვნა, რომ დანაშაულის უკან რუსეთის მთავრობა იდგა და ეს მკვლელობა, „სავარაუდოდ, ნებადართული იყო“ პრეზიდენტ ვლადიმირ პუტინის მიერ.ბრიტანელი მოსამართლის რობერტ ოუენის დასკვნის თანახმად, „დიდი ალბათობით“, ლიტვინენკო მოკლეს რუსეთის მოქალაქეებმა დმიტრი კოვტუნმა და ანდრეი ლუგოვოიმ, რუსეთის უშიშროების ფედერალური სამსახურის დავალებით.„ამასთან, დავასკვენი, რომ ბატონი ლიტვინენკოს მოსაკლავად ფეესბეს ოპერაცია, სავარაუდოდ, ნებადართული იყო ფეესბეს მაშინდელი ხელმძღვანელის, ბატონი პატრუშევის და, ასევე, პრეზიდენტ პუტინის მიერ“, – განაცხადა ოუენმა. ანა პოლიტკოვსკაია დიდი ალბათობით ვლადიმერ პუტინის ნებართვით მოკლეს ცნობილი ჟურნალისტი ანა პოლიტკოვსკაიაც 2006 წლის 7 ოქტომბერს საკუთარი სახლის სადარბაზოსთან.ჟურნალისტი აქტიურად და დაუფარავდა ამხელდა პირდად პუტინს და რუს მაღალჩინოსნებს სხვადასხვა დანაშაულში, მათ შორის კორუფციაში, ჩეჩნეთში უდანაშაულო ადამიანების დახოცვაში და ხელისუფლების დანაშაულზე ბესლანის ტრაგედიის დროს.მას ეკუთვნის წიგნი სახელწოდებით „პუტინის რუსეთი“, სადაც დეტალურად აღწერს თუ როგორ იმართება თანამედროვე რუსეთი.ჟურნალისტს ხშირად ემუქრებოდნენ სიცოცხლის მოსპობით, თუმცა ის თამამად განაგრძობდა მხილებას, რაც საბოლოოდ მისი მკვლელობით დასრულდა.2014 წელს პოლიტკოვსკაიას მკვლელობის ბრალდებით ეთნიკურად ჩეჩენი 5 მამაკაცი დააკავეს, თუმცა ცნობილია, რომ მათ მკვლელობისთვის 150 000 აშშ დოლარი გადაუხადეს. დამკვეთის ვინაობა, ცხადია დღემდე არ გამოვლენილა. პოლ კლებნიკოვი პოლ კლებნიკოვი კიდევ ერთი ჟურნალისტია, რომელიც ვლადიმერ პუტინს და რუს ოლიგარქებს ამხელდა. ის 2004 წლის 9 ივლისს მოკლეს მას შემდეგ, რაც გამოაქვეყნა ოლიგარქების სკანდალური სია, მათი კავშირები ვლადიმერ პუტინთან.კლებნიკოვი გახლდათ ჟურნალისტური გამოძიების ავტორი, რომელმაც რუსი მაღალჩინოსნები კორუფციაში ამხილა. იგი გახლდათ რუსული „ფორბსის“ რედაქტორი. მოკლეს რედაქციიდან გამოსვლის მომენტში. სერგეი იუშენკოვი პარტია „ლიბერალური რუსეთის“ ერთ-ერთი დამფუძნებელი სერგეი იუშენკოვი მოკლეს თავისივე სახლის სადარბაზოს წინ.ის მოკლეს 2003 წლის 16 აპრილს, რამდენიმე საათში მას შემდეგ, რაც განაცხადა, რომ მისი პარტია მონაწილეობას მიიღებდა საპარლამენტო არჩევნებში.ის გახლდათ პუტინის აშკარა მოწინააღმდეგე და ერთ-ერთი პირველი კრიტიკოსი. გარდაცვალებამდე იუშენკოვი ღიად მიანიშნებდა რამდენიმე გახმაურებულ მკვლელობასთან რუსეთის ხელისუფლების კავშირზე. ნატალია ესტემიროვა ჟურნალისტი, ადამიანის უფლებათა დაცვის ჩეჩენი აქტივისტი და ორგანიზაციის – Memorial – საბჭოს წევრი ნატალია ესტემიროვა 2009 წლის 15 ივლისს, 08:30 საათზე გაიტაცეს გროზნოში მდებარე საკუთარი სახლიდან.იმ დროისთვის ესტემიროვა ჩეჩნეთში ადამიანის უფლებათა დარღვევების „უკიდურესად მწვავე“ შემთხვევებზე მუშაობდა, სადაც რუსეთის ხელისუფლების დანაშაულებრივი ქმედებები იკვეთებოდა.ორი თვითმხილველის თქმით, მათ დაინახეს, როგორ ყვიროდა ესტემიროვა გატაცების მომენტში, როდესაც აქტივისტს მანქანაში ძალით ტენიდნენ.იმავე დღეს მისი ცხედარი თავისა და მკერდის არეში ტყვიისგან მიყენებული ჭრილობებით, კავკაზის ფედერალური გზიდან 100 მეტრის მოშორებით, ტყეში იპოვეს.მკვლელობამდე ცოტა ხნით ადრე ესტემიროვამ მიიღო მუქარის შეტყობინება პუტინის ახლო მოკავშირის, ჩეჩნეთის ლიდერის – რამზან კადიროვის სახელით. სტანისლავ მარკელოვი და ანასტასია ბაბუროვა 2009 წლის 19 იანვარს ადვოკატი სტანისლავ მარკელოვი მოსკოვში, კრემლის მახლობლად სეირნობდა, როდესაც ის ცეცხლსასროლი იარაღით მოკლეს.მასთან ერთად სიცოცხლეს გამოასალმეს „ნოვაია გაზეტას“ ჟურნალისტი ანასტასია ბაბუროვა, რომელიც ადვოკატის დახმარებას ცდილობდა.მარკელოვი სასამართლოში არაერთ გახმაურებულ საქმეს წარმოადგენდა, სადაც პირადად ვლადიმერ პუტინის ინტერესები იკვეთებოდა, მათ შორის ის იცავდა ჟურნალისტ ანა პოლიტკოვსკაიას ინტერესებს.ბოლოს, ის გახლდათ ჩეჩნეთში მოკლული ახალგაზრდა გოგონას, ელზა კუნგაევას ოჯახის ადვოკატი.კუნგაევა რუსეთის არმიის ყოფილმა პოლკოვნიკმა იური ბუდანოვმა მოკლა. 2003 წელს ბუდანოვს ათი წლით თავისუფლების აღკვეთა მიუსაჯეს, მაგრამ 2009 წლის იანვარში ვადამდე გაათავისუფლეს.სტანისლავ მარკელოვმა გაასაჩივრა რაიონული სასამართლოს უარი, განეხილა მისი განაცხადი ბუდანოვის გათავისუფლების გაუქმების შესახებ. საჩივრის შეტანიდან რამდენიმე საათში კი ადვოკატი მოკლეს. დენის ვორონენკოვი რუსეთის მხრიდან „სახელმწიფო ტერორიზმის აქტი“ – ასე შეაფასა უკრაინის მაშინდელმა პრეზიდენტმა, პეტრო პოროშენკომ კიევის ერთ-ერთ ცენტრალურ ქუჩაზე 2017 წლის 23 მარტს მომხდარი მკვლელობა.შეიარაღებული თავდასხმისას მოკლეს რუსეთის სახელმწიფო სათათბიროს ყოფილი წევრი, დენის ვორონენკოვი, რომელიც ერთი წლით ადრე გადასახლდა უკრაინაში და აკრიტიკებდა რუსეთის მიერ ყირიმის ანექსიას.ვორონენკოვის მკვლელობასთან დაკავშირებით უკრაინის პოლიცია განიხილავს მკვლელობასთან რუსეთის კავშირის ვერსიას. ამის შესახებ აცხადებს უკრაინის მთავარი საგამოძიებო სამმართველოს უფროსი ალექსანდრ ვაკულენკო.ვორონენკოვი მოკლეს, როცა მიდიოდა რუსეთის სახელმწიფო სათათბიროს ასევე ყოფილ წევრთან, ოპოზიციონერ ილია პონომარიოვთან შესახვედრად.როგორც იუწყებიან, თავდამსხმელმა, სულ ცოტა, რვაჯერ ესროლა 45 წლის ვორონენკოვს. მომხდარი სათვალთვალო კამერით არის გადაღებული.ვორონენკოვის მცველმა კი თავდამსხმელს ესროლა, დაჭრა ის, რის შემდეგაც თავდამსხმელი მეზობელ ქუჩაზე დააკავეს პოლიციელებმა და საავადმყოფოში გადაიყვანეს, მაგრამ მისი გადარჩენა ვერ მოხერხდა. ბორის ნემცოვი ცნობილი რუსი ოპოზიციონერი ბორის ნემცოვი 2015 წლის 27 თებერვალს, კრემლთან ახლოს მოკლეს. მას ზურგში ოთხი ტყვია ესროლეს.მის მკვლელობასთან ვლადიმერ პუტინის კავშირზე ყველაზე ნათლად თავად ნემცოვის ინტერვიუ მეტყველებს, რომელიც მკვლელობამდე რამდენიმე დღით ადრე რუსულმა გამოცემამ Собеседник გამოაქვეყნა.„როცა დედას ტელეფონზე ვესაუბრები, მეუბნება: როდის უნდა შეწყვიტო პუტინთან მტრობა? ის შენ მოგკლავს!.. და ამას სრული სერიოზულობით ამბობს…არასოდეს დამიფარავს ჩემი პოლიტიკური შეხედულებები. მიმაჩნია, რომ სწორედ მან, ვლადიმირ პუტინმა გააჩაღა ომი უკრაინაში. ახლა მისდამი ისეთი უარყოფითი დამოკიდებულება მაქვს, როგორც არასდროს. სერგეი და იულია სკრიპალები მართალია სკრიპალები სიკვდილს გადაურჩნენ, თუმცა ცხადია, კრემლი ამას არ ელოდა. რუსეთის სამხედრო დაზვერვის ყოფილი ოფიცრის სერგეი სკრიპალის მკვლელობის მცდელობა 2018 წლის 4 მარტს ინგლისის ქალაქ სოლსბერიში სცადეს.თავდასხმის შედეგად ასევე მოიწამლა მოსკოვიდან მამასთან სტუმრად ჩასული იულია სკრიპალი და დაზიანება მიიღო სულ მცირე 21-მა ადამიანმა.გამოძიების ინფორმაციით, მამა-შვილი ნევრულ-პარალიტიკური ნივთიერებით მოწამლეს.სერგეი სკრიპალი 20 წელზე მეტია რუსეთის თავდაცვის უწყებაში მუშაობდა, რის შემდეგაც, რუსეთის მთავარ სადაზვერვო სამსახურში გადავიდა.მისი მთავარი მოვალეობა სპეცსამსახურისთვის ახალი კადრების მოძიება და შერჩევა იყო. 1995 წლიდან მან ბრიტანეთის სადაზვერვო სამსახურთან საიდუმლო კავშირი დაამყარა.11 წლის განმავლობაში ის სწორედ ბრიტანეთის სპეცსამსახურთან თანამშრომლობდა. 2004 წელს მას სახელმწიფო ღალატში დასდეს ბრალი.სკრიპალმა პატიმრობაში 6 წელი გაატარა. ის, 2010 წელს, ვადაზე ადრე აშშ-სა და რუსეთს შორის ჯაშუშების გაცვლის შესახებ მიღწეული შეთანხმების შემდეგ გაათავისუფლეს. იმრან ალიევი 2020 წლის 30 იანვარს საფრანგეთში, ქალაქ ლილში მოკლეს რამზან კადიროვის მიმართ კრიტიკულად განწყობილი 44 წლის ბლოგერი იმრან ალიევი, ცნობილი, როგორც „მანსურ მოხუცი“.როგორც „გარდიანი“ წერს, ალიევი სასტუმროს ნომერში, დანით მიყენებული ჭრილობის შედეგად გარდაცვლილი ნახეს.გავრცელებული ინფორმაციით, ალიევი შეკვეთილი მკვლელობის მსხვერპლია, რომელსაც ადგილობრივი სამართალდამცავი ორგანოების მონაცემებით, პოლიტიკური მოტივის ნიშნების ახლავს. თუმსო აბდურაჰმანოვი26 თებერვალს, უცხო პირები თავს დაესხნენ ევროპაში მცხოვრებ ჩეჩენ ბლოგერს, თუმსო აბდურაჰმანოვს.ბლოგერმა თვდამსხმელის მოგერიება და პოლიციის გამოძახება მოახერხა. მის მიერ გადაღებულ ვიდეოში ჩანს იატაკზე გართხმული მამაკაცი, რომელიც ამბობს, რომ ის მოსკოველია და ბლოგერის „დაშინება“ მას ვინმე აბდურაჰმანმა დაავალა, გროზნოდან.თუმსო აბდურაჰმანოვი 2015 წლის ნოემბერში გაიქცა ჩეჩნეთიდან, სადაც ის ექსტრემისტულ გაერთიანება „ისლამურ სახელმწიფოსთან“ ურთიერთობასა და სირიაში ბრძოლაში დაადანაშაულეს.ბლოგერი ამტკიცებდა, რომ არასოდეს ყოფილა სირიაში და პოლიტიკურად მოტივირებულად მიიჩნევდა მისთვის წაყენებულ ბრალდებებს.ნანა ჩხაიძე ასევე ნახეთ:მოოქრული უნიტაზი, ცხენების კოლექცია, მილიონები და სასახლე ოქროს ნივთებით - რა ქონებას ფლობს რამზან კადიროვი„ჩვენ ვერ გავხდებით ერთი ასაკის, ვეღარ დამეწევი... შენ სულ პატარა ფერია იქნები... “ - გვანცა ბუბაშვილის მეგობრების ემოციები„ვეღარც მზის მოსვლით ვერ შეივსება, ეს შემზარავი სიცარიელე“ - ტარიელ ხარხელაური„ნაპოვნია ძვირფასეულობა, პირადობის მოწმობები, საყოფაცხოვრებო ნივთები...“ - უახლესი ინფორმაცია სტიქიის ზონიდან

1690261320

„მისი აზრით, შურისძიება კერძია, რომელიც ცივად უნდა მიირთვა...“ - პუტინი პრიგოჟინზე შურისძიებისთვის ემზადება?

რუსეთი სისხლისღვრას ალიაქსანდრ ლუკაშენკამ გადაარჩინა. მან დაარწმუნა “ვაგნერის” მეთაური, ევგენი პრიგოჟინი ამბოხი შეეწყვიტა. ეს ოფიციალური ვერსიაა, რომელიც ბევრს არაფერს გვეუბნება იმაზე, თუ რა მოხდა სინამდვილეში 23-24 ივნისს რუსეთში.“პუტინის მზარეულის” მოულოდნელად დაწყებული ამბოხი მოულოდნელადვე დასრულდა. მის წინააღმდეგ დაწყებული სისხლის სამართლის საქმე შეწყდა, “ვაგნერმა” კი სამხედრო ტექნიკა თავდაცვის სამინისტროს გადასცა. აშშ-ის პრეზიდენტი ჯო ბაიდენი დარწმუნებულია, რომ ვაგნერის აჯანყების შემდეგ, რუსეთის პრეზიდენტი ვლადიმერ პუტინი თავს "დასუსტებულად" გრძნობს. კითხვაზე, თუ რამდენად დასუსტდა პუტინი, ამერიკის პრეზიდენტმა უპასუხა: "ძნელი სათქმელია, მაგრამ ის აშკარად აგებს ომს. ის ომს აგებს სახლში. და ის გარიყულია მთელი მსოფლიოსგან. და ეს არ არის მხოლოდ ნატო, ეს არ არის მხოლოდ ევროკავშირი, არის იაპონიაც." - თქვა აშშ-ის პრეზიდენტმა.აშშ-ის პრეზიდენტს პრიგოჟინის შესაძლო ქმედებებზე ჰკითხეს წარუმატებელი აჯანყების შემდეგ, რაზეც ჯო ბაიდენმა უპასუხა: „ღმერთმა უწყის რისი გაკეთება შეუძლია… ისიც კი არ ვიცით თუ სად იმყოფება და რა სიტუაციაში“.„მის ადგილას ფრთხილად ვიქნებოდი იმასთან, თუ რას ვჭამ… დეტალურად შევისწავლიდი თუ რას მთავაზობენ სადილზე”, - განაცხადა ბაიდენმა.ევგენი პრიგოჟინი - ზედმეტსახელად “პუტინის მზარეული” 2000-იანების დასაწყისში კრემლისთვის ბანკეტებს აწყობდა.თითქმის ყველა, ვინც რუსეთის შიდა ამბებს აკვირდება, აღიარებს, რომ გაურკვევლობაშია. არაერთ სამხედრო დანაშაულში ბრალდებული კერძო ჯარი, “ვაგნერი” უკრაინაში 2022 წლის მარტიდან იბრძვის. ამისთვის პრიგოჟინმა საომრად ათასობით პატიმარი წაიყვანა.ამ ხნის მანძილზე “პუტინის მზარეული” აკრიტიკებდა თავდაცვის მინისტრს, სერგეი შოიგუს და გენშტაბის მეთაურს, ვალერი გერასიმოვს. პრიგოჟინი ამბობდა, რომ ისინი განგებ უჭიანურებენ ტყვია-წამლისა და ჭურვების მიწოდებას.ბოლო რამდენიმე კვირა ის აკეთებდა იმას, რაც რუსეთში კანონით ისჯება - ამბობდა, რომ უკრაინასთან ომის დაწყება საჭირო არ იყო და რომ რუსეთი ამ ომში წარუმატებელია. პირველ რიგში, გენერლების არაკომპტენტურობისა და კორუმპირებულობის გამო.10 ივნისს, სერგეი შოიგუმ უბრძანა “უკრაინაში მებრძოლ ყველა სამხედრო შენაერთს” დაემორჩილონ თავდაცვის სამინისტროს. პრიგოჟინმა უპასუხა, რომ "ვაგნერი" ამას არ გააკეთებს. სამი ამერიკული გამოცემა,( “ნიუ-იორკ ტაიმსი”, “ვაშინგტონ პოსტი” და “სიენენი”) წერს - რამდენიმე დღეში ამერიკულმა დაზვერვამ უკვე იცოდა, რომ ის ამბოხს გეგმავდა.რა ვიცით ამბოხზე?23 ივნისს საღამოს, “პუტინის მზარეულმა” თქვა, რომ თავდაცვის სამინისტრო “ვაგნერის” ბანაკს დაესხა და ის შურს იძიებს. 24 ივნისს, გამთენიისას, მათ თითქმის უბრძოლველად დაიკავეს ქალაქი დონის როსტოვი, საიდანაც უკრაინაში მებრძოლი რუსული ჯარი მარაგდება.შემდეგ კოლონა მოსკოვისკენ დაიძრა. გაცხადებული მიზანი ორი მეტოქის, თავდაცვის მინისტრის და გენშტაბის უფროსის დაკავება იყო.რუსეთის პრეზიდენტი, ვლადიმირ პუტინი ამბოხებულებს “მკაცრი სასჯელით” დაემუქრა. ცოტა ხანში გავრცელდა იფორმაცია, რომ მისმა თვითმფრინავმა მოსკოვი დატოვა. კრემლმა კი თქვა, რომ პრეიზდენტი მოსკოვში რჩება.ამასობაში, დედაქალაქისკენ მიმავალმა “ვაგნერმა” თავდაცვის სამინსიტროს რამდენიმე ვერტმფრენი ჩამოაგდო. დაიღუპა, სულ ცოტა, ათი მფრინავი. მოსკოვის მისადგომებთან ჯარისკაცები თხრიდნენ სანგრებს, გამოცხადდა “კონტრტერორისტული ოოპერაციის რეჟიმი“, ქალაქში შევიდა ჯავშანტექნიკა.მაგრამ ბრძოლა არ შედგა. საღამოს რვა საათისთვის ბელარუსის პრეზიდენტის, ალიაქსანდრ ლუკაშენკას პრეს-სამსახურმა გამოაცხადა, რომ ის პრიგოჟინს შეუთანხმდა - “ვაგნერის” კოლონა უკან გაბრუნდება, ყველას შეიწყალებენ, “პუტინის მზარეული” კი ბელარუსში წავა.იმავე საღამოს გავრცელდა კადრები, სადაც ჩანს, რომ დონის როსტოვის მოსახლეობა “ვაგნერელებს” ტაშით აცილებს და პრიგოჟინთან ფოტოებს იღებს. პრიგოჟინიც და პუტინიც დაახლოებით 48 საათით გაუჩინარდნენ. სიჩუმე პირველმა პრიგოჟინმა დაარღვია.26 ივნისს, საკუთარი ტელეგრამ არხით გავრცელებულ აუდიო-მიმართვაში, მან თქვა, რომ “ვაგნერმა” უკან დაიხია, როცა “ცხადი გახდა, რომ ბევრი რუსული სისხლი დაიღვრება”.რატომ მოაწყო “სამართლიანობის მარში”? იმიტომ, რომ “ინტრიგების შედეგად” ხელისუფლებამ “ვაგნერელებს” თავდაცვის სამინისტროს დაქვემდებარებაში გადასვლა მოსთხოვა. ეს კი მხოლოდ “1-2%-ს” უნდოდა.“სპეცოპერაციამ აჩვენა, რომ გამოცდილი მებრძოლები და მეთაურები საზარბაზნე ხორცი გახდებიან” - თქვა მან. “ვაგნერი” დასაშლელად მზად იყო, თუმცა მათ ბანაკზე სარაკეტო დარტყმას 30 ჯარისკაცი ემსხვერპლა და გეგმები მყისიერად შეიცვალეს.მაგრამ მათი მიზანი ხელისუფლების ჩამოგდება არ ყოფილა, ეს პროტესტი იყო. ამიტომ პრიგოჟინი ამბობს, რომ კმაყოფილია და რუსულ ჯარს “მასტერ-კლასი უჩვენეს”. მეტიც. ის ამტკიცებს, რომ ხალხი მხარს უჭერდა. “ზოგი იმედგაცრუებული იყო, რომ გავჩერდით”, რადგან “ვაგნერელებს” უყურებდნენ, როგორც მებრძოლებს კორუფციასთან და “რუსეთში არსებულ სხვა დაავადებებთან”.ამბოხიდან რამდენიმე საათში რუსეთის პრეზიდენტი გამოჩნდა. პუტინმა თქვა, რომ “ყველაფერი გაკეთდა სისხლისღვრის თავიდან ასაცილებლად” და აჯანყებას “ყველა შემთხვევაში ჩაახშობდნენ”. “ვაგნერელებს” ის კვლავ შეწყალებას დაჰპირდა და შესთავაზა სამი გამოსავალი - ან თავდაცვის სამინსიტროს დაქვემდებარებაში უნდა წავიდნენ, ან ბელარუსში, ანდაც სახლში.პრიგოჟინის სახელი არ უხსენებია, და მეტი არც არაფერი უთქვამს, იმისდა მიუხედავად, რომ პრეს-სპიკერმა, დმიტრი პესკოვმა მის გამოსვლას წინასწარვე “ისტორიული” უწოდა.27 ივნისს, პუტინმა მიმართა სამხედროებსაც და მადლობა გადაუხდა იმისთვის, რომ “ქვეყანა სამოქალაქო ომისგან იხსნეს”.ჩხრეკა ამბოხებული „მზარეულის“ სახლში და პრიგოჟინის "50 ელფერი"რუსეთის უსაფრთხოების სამსახურებმა „ვაგნერის" ხელმძღვანელის, ევგენი პრიგოჟინის პეტერბურგის სახლში, ასევე, ოფისში ჩხრეკა ჩაატარა. ამოღებულია სხვადასხვა ფერის პარიკები, წვერ-ულვაში, ყაბლი პასპორტები, ოქროს ზოდები.პასპორტებში მითითებული პირებიდან სულ მცირე ორი რეალურია. მედია ამბობს, რომ ერთ-ერთი დიმიტრი გეილერია, რომელმაც უარი თქვა კომენტარის გაკეთებაზე, მეორე ვლადიმერ ბობროვი, აგრესიული იყო და თქვა, რომ არაფერს იტყოდა.სახლში პრიგოჟინს აქვს პირადი სამედიცინო კაბინეტი, რომელიც სრულფასოვან საავადმყოფოს ჰგავს.ნანა ჩხაიძე

1689227160

ბრძოლა გავლენებისთვის თუ ყოფითი ინტოქსიკაცია? რა ვერსიებია მიტროპოლიტ შიო მუჯირის შესაძლო მოწამვლის საქმეში

სავარაუდო მოწამვლის შესახებ გავრცელებული ინფორმაციის შემდეგ, მიტროპოლიტი შიო მუჯირი დღეს სამების საკათედრო ტაძარში პირველად გამოჩნდა. საპატრიარქო ტახტის მოსაყდრემ პეტრე-პავლობის დღესასწაულთან დაკავშირებით საზეიმო წირვა-ლოცვა აღავლინა. ქადაგების შემდეგ კი, მედიასთან მცირე კომენტარით შემოიფარგლა - "ღვთის შეწევნით ვარ კარგად."მღვდელმთავარმა მრევლს ამბიონიდანაც მიმართა, თუმცა სავარაუდო მოწამვლის შესახებ არაფერი უთქვამს. სენაკისა და ჩხოროწყუს მიტროპოლიტის ნაცვლად გამოძიების მიმდინარეობაზე დღეს ანდრია ჯაღმაიძემ ისაუბრა. დეკანოზმა დაადასტურა, რომ შესაძლო დანაშაულის დეტალებზე გამოძიებამ უკვე გამოჰკითხა.გამოძიების შედეგებს ელოდებიან სხვა სასულიერო პირებიც. ბოდბელი ეპისკოპოსი იაკობი ამბობს, რომ საპატრიარქოში შიო მუჯირს მტერი არ ჰყავს. მღვდელმთავარი საყოფაცხოვრებო მიზეზით მოწამვლის ვერსიას არ გამორიცხავს.დეტალები არ დააზუსტა, თუმცა გამოძიების მიმდინარეობაზე ისაუბრა შინაგან საქმეთა მინისტრის მოადგილემაც. ალექსანდრე დარახველიძე ამბობს, რომ კრიმინალური პოლიცია აქტიურად მუშაობს ყველა ვერსიის გადამოწმებაზე.მიტროპოლიტ შიო მუჯირის შესაძლო მოწამვლის ფაქტზე გამოძიება განზრახ მკვლელობის მცდელობის მუხლით მიმდინარეობს. პირველადი ინფორმაციით, ორგანიზმში აღმოჩენილია მძიმე მეტალების კვალი. საპატრიარქო და საგამოძიებო ორგანოც ახლა უცხოეთიდან დამატებითი კვლევის პასუხებს ელოდება. ნანა ჩხაიძე