1780607061
ევროკავშირმა და მისმა წევრმა სახელმწიფოებმა საქართველოს სუვერენიტეტისა და ტერიტორიული მთლიანობის მიმართ ურყევი მხარდაჭერა კიდევ ერთხელ დაადასტურეს.გაეროს გენერალური ასამბლეის სხდომაზე ერთობლივ განცხადებას, რომელიც საერთაშორისოდ აღიარებულ საზღვრებში საქართველოს მხარდაჭერას ეხება, ევროკავშირის კანდიდატი ქვეყნები - ჩრდილოეთ მაკედონია, მონტენეგრო, ალბანეთი, უკრაინა, მოლდოვა და ბოსნია-ჰერცეგოვინა, ასევე ანდორა და სან-მარინოც შეუერთდნენ.„მაქვს პატივი გამოვიდე ევროკავშირისა და მისი წევრი სახელმწიფოების სახელით. კანდიდატი ქვეყნები: ჩრდილოეთ მაკედონია, მონტენეგრო, ალბანეთი, უკრაინა, მოლდოვის რესპუბლიკა და ბოსნია-ჰერცეგოვინა, ასევე ანდორა და სან-მარინო უერთდებიან ამ განცხადებას.ევროკავშირი კიდევ ერთხელ ადასტურებს თავის ურყევ ერთგულებასა და მხარდაჭერას საქართველოს სუვერენიტეტისა და ტერიტორიული მთლიანობის მიმართ, მის საერთაშორისოდ აღიარებულ საზღვრებში. ევროკავშირი კვლავინდებურად ერთგული რჩება საქართველოში კონფლიქტების მშვიდობიანი მოგვარების მხარდაჭერის, კერძოდ, ევროკავშირის სპეციალური წარმომადგენლის მუშაობის საშუალებით, რომელიც თანათავმჯდომარეობს ჟენევის საერთაშორისო დისკუსიებს, ასევე საქართველოში ევროკავშირის სადამკვირვებლო მისიის მეშვეობით.ევროკავშირი გამოხატავს შეშფოთებას ადამიანის უფლებების დარღვევის გამო საქართველოს ოკუპირებულ რეგიონებში - აფხაზეთსა და სამხრეთ ოსეთში, ასევე იმ მუდმივ ჰუმანიტარულ პრობლემებზე, რომლებსაც აწყდება კონფლიქტისგან დაზარალებული მოსახლეობა. ევროკავშირი მოუწოდებს, უზრუნველყოფილ იქნას სრული, უსაფრთხო და დაბრკოლების გარეშე ჰუმანიტარული წვდომა ამ მოსახლეობის დასახმარებლად, განსაკუთრებით ოკუპირებულ სამხრეთ ოსეთის რეგიონში. ევროკავშირი ხაზს უსვამს, რომ წვდომა გათვალისწინებულია 2008 წლის 12 აგვისტოს ექვსპუნქტიანი შეთანხმებით.ევროკავშირი ხაზს უსვამს ლტოლვილთა და იძულებით გადაადგილებულ პირთა უფლების მნიშვნელობას, აირჩიონ მდგრადი გადაწყვეტილებები, მათ შორის ნებაყოფლობითი დაბრუნება, ასევე ჰქონდეთ შესაძლებლობა განახორციელონ საკუთრების უფლება. ევროკავშირი წუხს, რომ ვერ მოხერხდა პროგრესის მიღწევა ამ ფუნდამენტურ უფლებებთან დაკავშირებით და შეახსენებს [ასამბლეას], რომ დევნილთა და ლტოლვილთა საკითხის გადაჭრა არის ჟენევის საერთაშორისო დისკუსიების ერთ-ერთი მთავარი ამოცანა. ამიტომ, ევროკავშირი მოუწოდებს ჟენევის მოლაპარაკებების მონაწილეებს, აწარმოონ რეალური დიალოგი ბოლო სამი ათწლეულის განმავლობაში განხორციელებულ სხვადასხვა გადაადგილებებზე, მათ შორის დევნილთა ნაწილობრივ დაბრუნებაზე.ევროკავშირი დადებითად აფასებს საქართველოს მთავრობის ძალისხმევას დევნილთა საცხოვრებლით უზრუნველყოფისა და მათი სოციალურ-ეკონომიკური ინტეგრაციის მიმართულებით. ამასთან, ხაზს უსვამს, რომ ნამდვილი ინტეგრაცია უზრუნველყოფილ უნდა იქნას ხანგრძლივი პერიოდის განმავლობაში, და ამის მიღწევა შესაძლებელია მხოლოდ ხელისუფლების მხრიდან რესურსებისა და ერთგულების მობილიზებით, კერძოდ, იმისთვის, რომ შემცირდეს მუდმივი წყვეტა დედაქალაქსა და საქართველოს პერიფერიაში მდებარე სხვა რეგიონებს შორის. ამრიგად, ევროკავშირი მოუწოდებს ხელისუფლებას, ჩართოს დევნილები და უფრო ღრმად მიანიჭოს პრიორიტეტი მათ საჭიროებებს განვითარების ეროვნულ გეგმაში, რათა გააქტიურდეს ძალისხმევა მთელ ქვეყანაში ცხოვრების პირობებისა და საარსებო წყაროების გასაუმჯობესებლად“, - აღნიშნა გაეროში ევროკავშირის დელეგაციის წარმომადგენელმა.
