1779204991

ბაქო-სუფსის ნავთობსადენის აღდგენისა და ეფექტიანი ოპერირების შესახებ მიღწეული შეთანხმება მნიშვნელოვანია როგორც ეკონომიკური, ისე გეოსტრატეგიული თვალსაზრისით - თამარ იოსელიანი

ბაქო–სუფსის ნავთობსადენის აღდგენისა და ეფექტიანი ოპერირების შესახებ მიღწეული შეთანხმება მნიშვნელოვანია როგორც ეკონომიკური, ისე გეოსტრატეგიული თვალსაზრისით, - აცხადებს ეკონომიკისა და მდგრადი განვითარების მინისტრის მოადგილე თამარ იოსელიანი.მინისტრის მოადგილის ინფორმაციით, აღნიშნულ გადაწყვეტილებას წინ უძღოდა რამდენიმეთვიანი სამუშაო პროცესი, რომელიც ორმხრივი ხელშეკრულების გაფორმებით დასრულდა. საქართველოს ნავთობისა და გაზის კორპორაციასა და აზერბაიჯანულ მხარეს (SOCAR და SOCAR Midstream Operation LLC) შორის მიღწეული შეთანხმება ბაქო-სუფსის მაგისტრალის ქართული სეგმენტის მართვას ეხება.თამარ იოსელიანის თქმით, საუბარია ინფრასტრუქტურაზე, რომელიც საქართველოს უკვე ათწლეულებია აკავშირებს კასპიის რეგიონთან, შავ ზღვასთან და ევროპულ ბაზრებთან.„ბოლო 3 წელია აღნიშნული მილსადენით ტრანსპორტირება ფაქტობრივად შეწყვეტილი იყო და სუფსის ნავსადგურში მხოლოდ რამდენიმე გემთშემოსვლა დაფიქსირდა. დღეს, როდესაც ენერგოუსაფრთხოება, სტაბილური სატრანზიტო მარშრუტები და მიწოდების ჯაჭვების მდგრადობა განსაკუთრებულ მნიშვნელობას იძენს, მსგავსი პროექტები კიდევ ერთხელ უსვამს ხაზს საქართველოს როლს, როგორც სანდო და პროგნოზირებადი დამაკავშირებელი დერეფნის ევროპასა და აზიას შორის“, - აღნიშნა თამარ იოსელიანმა.მინისტრის მოადგილის თქმით, გარდა ეკონომიკური სარგებლისა, ეს არის მნიშვნელოვანი გზავნილი, რომ რეგიონში თანამშრომლობა, დაკავშირებადობა და ფუნქციონირებადი ინფრასტრუქტურა კვლავ რჩება საქართველოს ერთ-ერთ მთავარ სტრატეგიულ უპირატესობად.

1779197040

აჭარის ტურიზმის დეპარტამენტის 2025 წლის ანგარიში უმაღლესს საბჭოში წარადგინეს

აჭარის ტურიზმის  დეპარტამენტის ხელმძღვანელმა უწყების ანგარიში აჭარის უმაღლესს საბჭოში წარადგინა. საფინანსო-საბიუჯეტო კომიტეტზე გამოსვლისას, თინათინ ზოიძემ რეგიონის პოპულარიზაციის, ტურისტული პროდუქტების განვითარებისა და სერვისების გაუმჯობესების მიმართულებით გატარებულ ღონისძიებებზე ისაუბრა.გასულ წელს, რეგიონში  4.8  მილიონზე მეტი შიდა და საერთაშორისო ვიზიტი განხორციელდა. +11,75%-ით გაიზარდა ვიზიტები  აჭარის მთიან მუნიციპალიტეტებშიც (471,822  ვიზიტი).აქტიურად მიმდინარეობს რეგიონის ცნობადობის გაზრდა და ტურისტული შესაძლებლობების  პუპულარიზაცია 25-ზე მეტ სამიზნე ქვეყანაში. აჭარის რეგიონი წარმოდგენელი იყო  25-მდე საერთაშორისო ტურისტულ გამოფენაზე როგორც ევროპაში, ისე აზიასა და მეზობელ ქვეყნებში.მედია ტურების ფარგლებში რეგიონს სტუმრობენ ცნობილი ბლოგერები, წამყვანი მედიისა და პრესის წარმომადგენლები სამიზნე ქვეყნებიდან. ინფო და მეტიატურების ფარგლებში გასულ წელს რეგიონს 350-ზე მეტი უცხოელი ინლუენსერი, ჟურნალისტი და ტურისტული სააგენტოს წარმომადგენელი ეწვია.მთიან აჭარაში 26 მარკირებული ტურისტული ბილიკი და ახალი ტურისტული პროდუქტია მზად ტურისტების მისაღებად. მათ შორისაა ხიხანის განახლებული ტურისტული ბილიკი და ინფრასტრუქტურა, ჯვარიმინდორის ტურისტული თავშესაფრები, ქობულეთის ტორფნარის ახალი ტურისტული ბილიკი, მირვეთის ბილიკი განახლებული ინფრატრუქტურით და საპიკნიკე სივრცეები ყველა მუნიციპალიტეტში.

1778701274

აქ ყველაფერი იქნება, რაც ადამიანს კომფორტული ცხოვრებისთვის ან ვიზიტისთვის შეიძლება დასჭირდეს - შიო ხეცურიანი „თბილისი ტრამპ თაუერის“ შესახებ

„თბილისი ტრამპ თაუერის“ პროექტის დეტალებთან დაკავშირებით სამშენებლო კომპანია "არქის" გენერალურმა დირექტორმა გადაცემაში „ღამის კურიერი“ ისაუბრა.შიო ხეცურიანის განცხადებით, კომპლექსი გათვლილია როგორც ტურისტებისთვის, ასევე ადგილობრივი მცხოვრებლისთვის, შესაბამისად ტერიტორიაზე მულტიფუნქციური ობიექტებიც განთავსდება."ეს იქნება თბილისის DownTown-ი , "ტრამპ თაუერი" იქნება ერთი მთავარი შენობა ამ კომპლექსში, კომპლექსი შედგება რამდენიმე შენობისგან, მათ შორის, იქნება სხვა ბრენდირებული შენობები, მოლი განსაკუთრებული და მაღალი ბრენდებისთვის, სარესტორნო სივრცეები, კაფეები, საერთო სამუშაო სივრცეები და კარგი გარემო, რომელიც მოიზიდავს ნებისმიერ ტურისტს. მათთვის იქნება ერთ-ერთი პირველი ადგილი, რომ მივიდნენ და ნახონ. ადგილობრივებისთვის იქნება ძალიან კარგი ადგილი, სადაც შეუძლიათ მივიდნენ და თავისუფალი დრო გაატარონ ან ბიზნეს შეხვედრა ჩაატარონ.ექვსი შენობაა, ცენტრალური პარკის გვერდით, შესაბამისად, ლოკაცია კარგია და ერთ სივრცედ შეკრავს გარემოს. აქ ყველაფერი იქნება, რაც ადამიანს კომფორტული ცხოვრებისთვის ან ვიზიტისთვის შეიძლება დასჭირდეს."გენსლერი" - მსოფლიოში ცნობილი და ყველაზე დიდი არქიტექტურული კომპანია, ტრამპის ორგანიზაციის რეკომენდაციით შეირჩა. ისინი ზუსტად იმისთვის მუშაობენ, რომ  "თბილისი ტრამპ თაუერი" იყოს ადგილი, სადაც ნებისმიერი ადამიანი სიამოვნებით მივა, რა თქმა უნდა, პირველ რიგში საცხოვრებლად, შემდეგ ნებისმიერი სხვა სახის ვიზიტისთვის", - აღნიშნა შიო ხეცურიანმა.

1778697660

მოლაპარაკებების დროს რამდენჯერმე აღინიშნა, რომ თბილისი აღმოსავლეთ ევროპის დუბაი ხდება. ეს მნიშვნელოვანი მესიჯია ნებისმიერი ინვესტორისთვის - „არქის“ გენერალური დირექტორი თბილისში „ტრამპ თაუერის“ პროექტზე

„ნამდვილად შეგვიძლია დავადასტუროთ, რომ მოლაპარაკებები წარმატებით დასრულდა, ხელშეკრულება გაფორმდა აპრილში და უკვე ოფიციალურად ტრამპის ორგანიზაციამ და ჩვენ დავიწყეთ საუბარი ამაზე ღიად და საჯაროდ," - ამის შესახებ სამშენებლო კომპანია „არქის" გენერალურმა დირექტორმა, შიო ხეცურიანმა "ღამის კურიერის" ეთერში, თბილისში „ტრამპ თაუერის" აშენებასთან დაკავშირებით განაცხადა.როგორც მან განაცხადა, ტრამპის ორგანიზაციას ქვეყანაში უძრავი ქონების ბაზრის განვითარებასთან დაკავშირებით თავიდანვე პოზიტიური განწყობა ჰქონდა."მოლაპარაკებები რეალურად ტრამპის ორგანიზაციასთან დაიწყო 2025 წლის ნოემბერში. თავიდანვე აღსანიშნავია მათი კეთილგანწყობა ჩვენი ქვეყნისადმი, უძრავი ქონების ბაზრის განვითარებაზე, საქართველოზე. მათ თავიდანვე ძალიან კარგი დამოკიდებულება და შეხედულება ჰქონდათ ჩამოყალიბებული კვლევების საფუძველზე, ჩვენს ქვეყანაზე. ეს პოზიტიური დამოკიდებულება მალევე აისახა იმაში, რომ მოლაპარაკებების დაწყებიდან მალევე გამომდინდა მემორანდუმი. შემდეგ უკვე გადავიდა კონკრეტულ ხელშეკრულებებზე და ტექნიკურ პირობებზე საკითხი და აპრილში როგორც იცით, უკვე საჯარო გახდა და ჩვენ მოვაწერეთ ხელი ამ ხელშეკრულებას ტრამპის ორგანიზაციასთან. მოხარულები ვართ, რომ ასეთ უნიკალურ და გამორჩეულ პროექტს ერთად ვახორციელებთ," - აღნიშნა შიო ხეცურიანმა.კითხვაზე, როდესაც 14 წლის წინ ტრამპის ორგანიზაციის პროექტი საქართველოში შეჩერდა, დღეს რა გახდა განმაპირობებელი ფაქტორი იმისა, რომ აღნიშნული ორგანიზაცია კვლავ დაინტერესდა ქართული ბაზრით, შიო ხეცურიანმა აღნიშნა, რომ მთავარი მიზეზი ქვეყნის ეკონომიკური განვითარებაა."მნიშვნელოვანია ეკონომიკური ფაქტორები, ფაქტობრივად 10%-იანი ზრდა არის ბოლო წლები ეკონომიკაში და ეს მათაც აღნიშნეს მოლაპარაკებების დროს. ასევე, ძალიან მნიშვნელოვანია სტაბილურად მზარდი უძრავი ქონების ბაზარი. აღსანიშნავია, რამდენჯერმე იყო ხსენებული, რომ თბილისი აღმოსავლეთ ევროპის დუბაი ხდება. ეს ძალიან მნიშვნელოვანი მესიჯი ხდება ნებისმიერი ინვესტორისთვის. აქედან გამომდინარე, ეს განწყობები და ბიზნესის სწორი ანალიზი იყო იმის საფუძველი, რომ ტრამპის ორგანიზაცია ასე აქტიურად საქართველოში შემოსვლით," - განაცხადა შიო ხეცურიანმა.

1778665561

Conde Nast Traveller მკითხველს საქართველოში მოგზაურობას ურჩევს

გავლენიანი საერთაშორისო გამოცემის Conde Nast Traveller-ის ინდურმა რედაქციამ საქართველო 4 საუკეთესო ტურისტულ მიმართულებას შორის დაასახელა.„საქართველო წელიწადის ამ დროს მთის ჰაერის, ვენახებით დაფარული ველებისა და კომპაქტური ქალაქების ნაზავია, სადაც ჩამოსვლის შემდეგ მოგზაურობას დიდი დაგეგმვა არ სჭირდება. მაისში ქვეყანაში უკვე ნამდვილი გაზაფხულია: თბილისში ტემპერატურა 15–25°C-ია, კავკასიონის მაღალმთიან რეგიონებში კი უფრო გრილა და თოვლის დნობისგან ყველაფერი მწვანეშია ჩაფლული,“ - წერს Conde Nast Traveller-ის ჟურნალისტი.სტატიაში აღწერილია თბილისი, ქალაქის ისტორიული უბნები და ტურისტული მარშრუტები. საქართველოს დედაქალაქთან ერთად Conde Nast Traveller მკითხველს რეგიონებში მოგზაურობასაც ურჩევს.„თბილისიდან მოგზაურები ხშირად მიემართებიან ჩრდილოეთით, ყაზბეგის მიმართულებით. მაისში ხეობა მთლიანად გამწვანებულია, ტემპერატურა 10–20°C-ის ფარგლებშია, რაც კომფორტულ პირობებს ქმნის ლაშქრობისთვის. გერგეტის სამების ტაძრამდე ასასვლელი სალაშქრო ბილიკი ერთ-ერთი მთავარი მარშრუტია, სადაც ცვალებადი ღრუბლოვანი პეიზაჟები იშლება“,- აღნიშნულია სტატიაში.პუბლიკაციაში ასევე აღწერილია კახეთის რეგიონში მდებარე საოჯახო მარნები ღვინის დეგუსტაციებით და საქართველოს კულტურული მემკვიდრეობის ძეგლები - მცხეთა და უფლისციხე.პუბლიკაციაში, საქართველოსთან ერთად, ნეპალი, შრი-ლანკა და ბუტანია დასახელებული.https://www.cntraveller.in/story/4-international-destinations-under-25c-for-a-last-minute-break/ 

1778486621

ქართველი მზარეულები ბასკეთის კულინარიის ცენტრში გადამზადდებიან

საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაცია საქართველოში მოქმედ მზარეულებს,  უკვე მეორედ, მსოფლიოს ერთ-ერთ წამყვან სასწავლებელში გადამზადების კურსს სთავაზობს.ტურიზმის ეროვნული ადმინისტრაციის პროექტის ფარგლებში ქართველი მზარეულები ესპანეთში, სან-სებასტიანში, Basque Culinary Center-ში  საერთაშორისო კულინარიულ გამოცდილებას მიიღებენ.სასწავლო კურსი მოიცავს: პროფესიონალური კულინარიის საფუძვლებს, კერძების დამზადების პრაქტიკულ მეცადინეობას, ტრადიციული და რეგიონული სამზარეულოს ტექნოლოგიების დაუფლებას, მსოფლიო ტენდენციების გაცნობას.სასწავლო კურსი 29 ივნისიდან  10 ივლისის ჩათვლით გაიმართება.  პროგრამას სრულად აფინანსებს საქართველოს ტურიზმის ეროვნული ადმინისტრაცია.კურსის დასრულების შემდგომ მონაწილეებს გადაეცემათ Basque Culinary Center -ის ოფიციალური სერტიფიკატი.ტურიზმის ეროვნული ადმინისტრაციის ორგანიზებით, გასულ წელს,  ქართველმა მზარეულებმა საფრანგეთში, დიჟონში, მსოფლიოს ერთ-ერთ ყველაზე პრესტიჟულ კულინარიულ სასწავლებელში Ferrandi Paris გადამზადების კურსი გაიარეს.პროექტის ფარგლებში, 10 მოქმედმა მზარეულმა ინტენსიურ სასერტიფიკატო კულინარიულ სასწავლო კურსში მიიღო მონაწილეობა. კურსი მოიცავდა კერძების მომზადების პრაქტიკულ მეცადინეობასა და ახალი ტექნოლოგიების დაუფლებას, მსოფლიო ტრენდების გაცნობას, სამზარეულოს აღჭურვასა და მართვას.

1778483433

„კარგი მასპინძლის“ სტატუსის მქონე საოჯახო სასტუმროებს ტრენინგები ჩაუტარდათ

აჭარაში „კარგი მასპინძლის“ სტატუსის მქონე საოჯახო სასტუმროებს სერვისის ამაღლების მიზნით ტრენინგები ჩაუტარდათ. ტრენინგის მონაწილეებმა თეორიულ-პრაქტიკული სწვალება დასუფთავების სტანდარტების და ჰიგიენის მართვის, სერვირების და მომსახურების სტანდარტების, HACCP-ის სტანდარტებისა და სურსათის უვნებლობის სისტემის მიმართულებით გაიარეს. ისინი ასევე დაესწრნენ კულინარიულ მასტერკლასებს, შეისწავლეს დღის მენიუს შედგენა და სწორად კალკულაცია. ტრენინგები აჭარის ტურიზმის დეპარტამენტის ტურისტული პროდუქტების განვითარების სააგენტოს ორგანიზებით და კურორტ „გოდერძიზე“ სასტუმრო „ამბასადორის“ მენეჯმენტის ჩართულობით განხორციელდა.ამ ეტაპზე, „კარგი მასპინძლის“ სტატუსს აჭარაში 15-მდე საოჯახო სასტუმრო ფლობს. პროექტი ევროპული მოდელის „Good Host“-ის ანალოგია და მიზნად ისახავს, ქალაქგარეთ გამორჩეული სტუმართმასპინძლობის, ავთენტური გარემოს, ვიზუალის მქონე საოჯახო-სასტუმროების პოპულარიზაციასა და სტიმულირებას განავითარონ ტურისტული ბიზნესი. პროექტი აჭარაში 2024 წელს დაიწყო და მასში ჩართვა ნებაყოფლობითია. ,,კარგი მასპინძლის” სტატუსის მისაღებად მასპინძელი უნდა ფლობდეს მოწესრიგებულ საოჯახო-სასტუმრო სახლს, ქმნიდეს დასვენებისთვის საჭირო პირობებსა და კომფორტულ გარემოს, ზრუნავდეს სერვისის გაუმჯობესებასა და ავთენტიკური გარემოს შენარჩუნებაზე. პროექტისა და კრიტერიუმების შესახებ ინფორმაციის მიღება მსურველებს აღნიშნულ ლინკზე https://infoajara.com/ka/good-host  შეუძლიათ.პროექტი აჭარის ტურიზმის დეპარტამენტის ტურისტული პროდუქტების განვითარების სააგენტომ ევროპის სოფლის ტურიზმის ფედერაციასა და ესტონეთის სოფლის ტურიზმის ორგანიზაციასთან თანამშრომლობით მოამზადა. სააგენტო „კარგი მასპინძლის“ სტატუსის მქონე საოჯახო-სასტუმრო სახლებს ეხმარება ობიექტების პოპულარიზაციაში, რაც მოიცავს ფოტო-ვიდეო მასალების შექმნას, მანიშნებლების დადგმას, ტრენინგებს სერვისის მიმართულებით, გამოცდილების გაზიარების მიზნით ინფოტურებში ჩართულობასა და ბრენდირებული სუვენირებით უზრუნველყოფას.

1778255255

ლონდონის სხვადასხვა ცენტრალურ ადგილზე საქართველოს შესახებ გარე რეკლამები განთავსდა

საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ორგანიზებით, დიდ ბრიტანეთში მასშტაბური მარკეტინგული კამპანია მიმდინარეობს.ტურიზმის ეროვნული ადმინისტრაციის ინფორმაციით, კამპანიის ფარგლებში ლონდონის ცენტრალურ ქუჩებსა და მთავარ მოედნებზე საქართველოს ტურისტული მიმართულების შესახებ სარეკლამო ბილბორდები განთავსდა.მათივე ცნობით, საერთო ჯამში, 46 გარე სარეკლამო ბანერი, რომელიც მოიცავს როგორც ციფრულ, ასევე სტატიკურ რეკლამას.„კამპანიის მიზანია საქართველოს, როგორც ტურისტულად მრავალფეროვანი და კონკურენტუნარიანი მიმართულების პოპულარიზაცია ბრიტანულ ბაზარზე. კამპანიის ფარგლებში, ერთი წლის განმავლობაში ლონდონში საქართველოს შესახებ საიმიჯო ვიდეორგოლებსა და ფოტოკოლაჟებს 17 მილიონზე მეტი ადამიანი იხილავს“, – ნათქვამია ტურიზმის ეროვნული ადმინისტრაციის ინფორმაციაში.მათივე ცნობით, დიდი ბრიტანეთი საქართველოსთვის მნიშვნელოვან ტურისტულ ბაზარს წარმოადგენს. 2026 წლის პირველ კვარტალში, გაერთიანებული სამეფოდან საქართველოში +45.7%-ით მეტი ვიზიტი შედგა, 2025 წლის ანალოგიურ პერიოდთან შედარებით.თბილისსა და ლონდონს შორის პირდაპირ ფრენებს ასრულებენ ავიაკომპანიები: British Airways და Easyjet. 

1778221282

26-28 მაისს საქართველო ჩინეთის ერთ-ერთ უმსხვილეს გამოფენაზე პარტნიორი ქვეყნის სტატუსით წარდგება

საქართველო წელს ჩინეთში, შანხაიში, აზიაში ერთ-ერთ უდიდეს ტურისტულ გამოფენაზე ITB China პარტნიორი ქვეყნის სტატუსით წარდგება. გამოფენა მაღალი რანგის სტუმრების მიერ საქართველოს სტენდის დათვალიერებით დაიწყება. მათ საშუალება ექნებათ, გაეცნონ ქართულ კულტურასა და ტურისტულ პოტენციალს, დააგემოვნონ ქართული კერძები და ღვინო.ITB China-ს დაწყებამდე რამდენიმე კვირით ადრე, საქართველოს ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ საერთაშორისო გამოფენაში მონაწილე ქართულ კომპანიებთან სამუშაო შეხვედრა გამართა. სამუშაო შეხვედრას ტურიზმის ეროვნული ადმინისტრაციის ხელმძღვანელი მაია ომიაძე უძღვებოდა.30-მდე ქართული კერძო და საჯარო სექტორის წარმომადგენელი ITB China-ზე საორგანიზაციო საკითხებს, ტურიზმის ეროვნული ადმინისტრაციის მიერ მომზადებული ეროვნული სტენდის დიზაინს, კონცეფციასა და გალა ვახშმის დეტალებს გაეცნო.ქვეყნის  ეროვნულ სტენდს შანხაიში 400 კვადრატული მეტრი დაეთმობა. მოეწყობა სამუშაო სივრცე, სადაც მონაწილე ქართულ კომპანიებს საშუალება ექნებათ გამართონ შეხვედრები პოტენციურ პარტნიორებთან. გამოფენის ფარგლებში გაიმართება საქართველოს ტურისტული პოტენციალის ამსახველი პრეზენტაციები და სამუშაო შეხვედრები. გარდა ამისა, საქართველოს ეროვნული სტენდის სტუმრებს, სამი დღის განმავლობაში, საშუალება ექნებათ გაეცნონ ქართულ კულტურას, ფოლკლორს, გასტრონომიას, ღვინოს.ITB CHINA 2026-ზე საქართველოს პარტნიორი ქვეყნის სტატუსით წარდგენა ქვეყნის ცნობადობის ამაღლებასა და ტურისტული ნაკადების მოზიდვას შეუწყობს ხელს.საქართველოს შესახებ მომზადებული ვიდეორგოლები ჩინური მედიითა და ციფრული არხებით გაშუქდება.გამოფენის გახსნამდე, 25 მაისს საქართველოს სახელით სპეციალური გალა მიღება გაიმართება, რომელსაც 700-მდე მაღალი რანგის სტუმარი დაესწრება. სტუმრებს საშუალება ექნებათ დააგემოვნონ ქართული კერძები, გაეცნონ ქართული გასტრონომიის ისტორიას, კულტურასა და საქართველოს ტურისტულ მიმართულებას. ანსამბლი „რუსთავი“ დამსწრე საზოგადოებისთვის კულტურულ ღონისძიებას გამართავს.

1778056669

საქართველოს ეროვნული ბანკი მონეტარული პოლიტიკის განაკვეთს, 0.25 პროცენტული პუნქტით, 8.25 პროცენტამდე ზრდის

 საქართველოს ეროვნული ბანკის მონეტარული პოლიტიკის კომიტეტმა 2026 წლის 6 მაისის სხდომაზე მონეტარული პოლიტიკის განაკვეთი (რეფინანსირების განაკვეთი) 0.25 პროცენტული პუნქტით (პპ) გაზარდა. მონეტარული პოლიტიკის განაკვეთი 8.25 პროცენტს შეადგენს.ახლო აღმოსავლეთში გამწვავებული გეოპოლიტიკური ვითარებისა და ჰორმუზის სრუტის გავლით ტრანსპორტირების მნიშვნელოვანი შეფერხებების გახანგრძლივებამ გლობალურად ინფლაციის მორიგი მიწოდების შოკი წარმოქმნა. საერთაშორისო ბაზრებზე ნედლეული ენერგორესურსების ფასების მკვეთრი ზრდა გლობალურად ინფლაციის ზრდაში უკვე აისახა. ამავდროულად, გეოპოლიტიკური მდგომარეობა საერთაშორისო ტრანსპორტირებას აფერხებს და მიწოდების ჯაჭვების რღვევის რისკებს აძლიერებს. ეს კი, თავის მხრივ, წარმოების ხარჯებს აძვირებს, რაც დამატებითი ინფლაციის წყარო შესაძლოა გახდეს. ზემოაღნიშნული ნავთობის ფასების გაძვირების პირდაპირი ეფექტი საქართველოს ბაზარზეც საწვავის ფასებში უკვე აისახა. აღნიშნული მიწოდების შოკების პირდაპირი და არაპირდაპირი ეფექტების ერთობლიობის შედეგად, აპრილში, მთლიანი ინფლაცია მიზნობრივი 3 პროცენტიანი დონიდან გადაიხარა და 5.9 პროცენტი შეადგინა. ამავდროულად, შედარებით ხისტი ფასების ინდიკატორები, რომლებიც უკეთ ასახავს გრძელვადიან ინფლაციურ პროცესებსა და ინფლაციურ მოლოდინებს, ბოლო პერიოდში დაჩქარდა, რამაც მეორე რაუნდის რისკები უფრო საყურადღებო გახადა. თუმცა დაჩქარების მიუხედავად, ინდიკატორები კვლავ მიზნობრივ მაჩვენებელთან ახლოს არის. კერძოდ, საბაზო ინფლაციამ (სურსათის, ენერგომატარებლებისა და თამბაქოს გამორიცხვით) აპრილში 3.2 პროცენტი, ხოლო მომსახურების ინფლაციამ 3.7 პროცენტი შეადგინა.მიუხედავად მწვავე გეოპოლიტიკური შოკებისა, საქართველოს ეკონომიკა ინარჩუნებს მდგრადობას და ეკონომიკური ზრდა კვლავ მაღალ დონეზე რჩება. წინასწარი მონაცემებით, 2026 წლის მარტში ეკონომიკური აქტივობის ზრდამ 10.7 პროცენტი, ხოლო პირველ კვარტალში 9.1 პროცენტი შეადგინა. ამასთანავე, ეკონომიკური ზრდის მნიშვნელოვანი მამოძრავებელი კვლავ მაღალპროდუქტიული სექტორებია, რაც მოთხოვნის მხრიდან მომდინარე ინფლაციურ წნეხს ნაწილობრივ აბალანსებს.სებ-ის განახლებული ცენტრალური სცენარი მოიაზრებს ახლო აღმოსავლეთში მიმდინარე ომის მეორე კვარტალში დასრულებას. თუმცა აღნიშნული დაშვება პირობითია და მაღალი გაურკვევლობით ხასიათდება. ამასთან, იმ შემთხვევაშიც კი, თუ გეოპოლიტიკური ვითარების დეესკალაცია აღნიშნულ პერიოდში მართლაც განხორციელდა, გლობალური მიწოდების სიმძლავრეების აღდგენის ხანგრძლივობა დამატებით გაურკვევლობასთან არის დაკავშირებული. შესაბამისად, ინფლაციაზე ზრდის მიმართულებით მოქმედი რისკები უფრო მეტად გამოკვეთილია. თუმცა, ასევე, ნარჩუნდება ცენტრალურ სცენართან შედარებით გეოპოლიტიკურის ვითარების უფრო სწრაფად დეესკალაციის შესაძლებლობაც. აქედან გამომდინარე, მონეტარული პოლიტიკის კომიტეტმა (მპკ) ცენტრალურ სცენართან ერთად განიხილა როგორც მაღალინფლაციური, ისე დაბალინფლაციური რისკების სცენარები.მაღალინფლაციური რისკის სცენარის რეალიზების შემთხვევაში ფუნდამენტური პროცესები მონეტარული პოლიტიკის განაკვეთის უფრო მაღალ ტრაექტორიას მოითხოვს, ვიდრე ცენტრალური სცენარი. მაღალინფლაციური სცენარი მოიაზრებს, გეოპოლიტიკური ვითარების უფრო მეტად გახანგრძლივებასა და გამწვავებას. ამის ფონზე, საერთაშორისო ბაზარზე სასაქონლო ფასები უფრო მეტად გაიზრდება და მიწოდების ჯაჭვების რღვევა ფართომაშტაბიანი გახდება. შედეგად საქართველოშიც მიწოდების მხრიდან მომდინარე ინფლაციური შოკი გაძლიერდება, რაც მეორე რიგის ეფექტებს გაამწვავებს და საბოლოოდ ინფლაცია ცენტრალურად სცენართან შედარებით მაღალი იქნება.მეორე მხრივ, მონეტარული პოლიტიკის კომიტეტის მიერ განხილული დაბალინფლაციური სცენარით გათვალისწინებული რისკების რეალიზაცია მონეტარული პოლიტიკის განაკვეთის, ცენტრალურ სცენართან შედარებით, უფრო სწრაფად ნორმალიზების შესაძლებლობას მოიაზრებს. ახლო აღმოსავლეთში მიმდინარე მწვავე გეოპოლიტიკური ვითარების სწრაფი დეესკალაციის პირობებში, საერთაშორისო სასაქონლო ბაზრებზე ფასებზე წნეხი შერბილდება. ამასთანავე, გლობალური მიწოდების ჯაჭვებში არსებული შეფერხებების რისკები მნიშვნელოვნად შემცირდება, რაც საერთაშორისო ტრანსპორტირების ხარჯების კლებაში აისახება და, საბოლოოდ, გლობალურ ინფლაციურ წნეხს შეარბილებს.მიმდინარე მაკროეკონომიკური ანალიზისა და არსებული რისკების განხილვის შედეგად, მპკ-მ ოპტიმალურად მიიჩნია პოლიტიკის განაკვეთის 0.25 პპ-ით 8.25 პროცენტამდე ზრდა. აღნიშნული გადაწყვეტილება მიმართულია ინფლაციური მოლოდინების მიზნობრივ მაჩვენებელთან სტაბილურად შენარჩუნებისკენ. მონეტარული პოლიტიკის ზომიერი გამკაცრება, თავის მხრივ, ამცირებს მეორე რიგის ეფექტების რისკებს და მიზნად ისახავს, რომ, მიწოდების მხრიდან მოქმედი შოკის ამოწურვის შემდგომ, ინფლაცია მიზნობრივ სამპროცენტიან დონეს სწრაფად დაუბრუნდეს. სებ აქტიურად განაგრძობს დაკვირვებას მიმდინარე მოვლენებსა და მათი ადგილობრივ ბაზარზე გადმოცემის ინტენსივობაზე. იმ შემთხვევაში, თუ გეოპოლიტიკური ვითარების შედეგად გამოწვეული ინფლაციური შოკები კიდევ უფრო გახანგრძლივდება და/ან მათი მასშტაბი მეორე რაუნდის ეფექტების რისკებს გააძლიერებს, მპკ მონეტარული პოლიტიკის განაკვეთის ზომიერ ზრდას გააგრძელებს. ხოლო მას შემდგომ, რაც ინფლაციური შოკი ამოიწურება, სებ ეტაპობრივად დაიწყებს პოლიტიკის ნორმალიზებას.მონეტარული პოლიტიკის კომიტეტის შემდეგი სხდომა 2026 წლის 17 ივნისს ჩატარდება.

1777550940

ბათუმი საერთაშორისო ტურისტულ გამოფენას მასპინძლობს

ბათუმი სასტუმრო აღჭურვილობისა და ტურიზმის საერთაშორისო გამოფენა გაიხსნა. გამოფენაზე ტურიზმის სფეროს 100-ზე მეტი ადგილობრივი და საერთაშორისო კომპანია ვიზიტორებს ტურისტულ სერვისებს, პროდუქტებსა და მიმართულებებს სთავაზობს. საქართველოს სხვადასხვა რეგიონთან ერთად გამოფენაზე სპეციალური სტენდითაა წარმოდგენილი აჭარის ტურისტული პროდუქტებიც, სადაც ვიზიტორებს რეგიონის სხვადასხვა ტურისტული მიმართულებების შესახებ ამომწურავი ინფორმაციის მიღება შეუძლიათ.ტურიზმისა და სასტუმრო აღჭურვილობის მე-17 საერთაშორისო გამოფენაში  მონაწილეობას აჭარის ტურიზმის დეპარტამენტი, ტურიზმის ეროვნული ადმინისტრაცია, დაცული ტერიტორიების სააგენტო, ტურისტული კომპანიები, სასტუმროები და რესტორნები, სასტუმრო აღჭურვილობის მომწოდებლები, ღვინის მწარმოებელი კომპანიები, სადაზღვევო კომპანიები, მუნიციპალიტეტები,  ტურიზმის DMO-ები, აჭარის მუზეუმი და ასოციაციები ღებულობენ. გამოფენის  ფარგლებში დაგეგმილია სხვადასხვა სახის ღონისძიება და მასტერკლასი. ტურისტული გამოფენა, რომელიც საგამოფენო კომპანია Expo Batumi-ის ორგანიზებით იმართება დღეს სასტუმრო „შერატონში“ გაიხსნა და 2 მაისს დასრულდება.  მასზე დასწრება თავისუფალია.

1776959963

მსოფლიოში მიმდინარე მოვლენების გათვალისწინებით, ძალიან მნიშვნელოვანია ამ ფორუმში მონაწილეობა - ლევან ბერიძე „დელფოსის ეკონომიკურ ფორუმზე“

მსოფლიოში მიმდინარე მოვლენების გათვალისწინებით, ძალიან მნიშვნელოვანია ამ ფორუმში მონაწილეობა - ამის შესახებ, საქართველოს ელჩმა საბერძნეთში ლევან ბერიძემ, „დელფოსის ეკონომიკურ ფორუმზე“ საუბრისას განაცხადა.მისივე თქმით, ფორუმზე იქნება შესაძლებლობა, მონაწილეებმა საქართველო და მისი პოტენციალი უკეთ გაიცნონ:„მსოფლიოში მიმდინარე მოვლენების გათვალისწინებით, ძალიან მნიშვნელოვანია ამ ფორუმში მონაწილეობა. ყველა ის საკითხი, რომელიც დღეს რელევანტურია იქნება განხილული რამდენიმე დღის განმავლობაში. დარწმუნებული ვარ, რომ ამ ფორუმზე მონაწილეებთან გვექნება შესაძლებლობა განვიხილოთ ჩვენი ორმხრივი ურთიერთობების კიდევ უფრო გაფართოება. გავაცნოთ დამსწრეებს საქართველო და ის პოტენციალი, რაც ქვეყანაში არსებობს“, - აცხადებს ლევან ბერიძე.