1794152997

ეგვიპტეში მატარებლების შეჯახებას მსხვერპლი მოჰყვა - არიან დაშავებულებიც

ეგვიპტეში მატარებლების შეჯახების შედეგად, სულ მცირე, ოთხი ადამიანი დაიღუპა და 88 დაშავდა.არსებული ინფორმაციით, ინციდენტი გიზის მახლობლად მოხდა. ავარიის შედეგად რამდენიმე ვაგონი ლიანდაგიდან გადავიდა. მატარებლების შეჯახების ადგილზე სასწრაფო დახმარების 72 ბრიგადა გაიგზავნა.ეგვიპტის პრეზიდენტმა, აბდელ ფათაჰ ალ-სისიმ განაცხადა, რომ კაიროს სამხრეთით მომხდარ შეჯახებას „დიდი ინტერესით“ ადევნებს თვალს. სოციალურ ქსელში გამოქვეყნებულ განცხადებაში ეგვიპტის პრეზიდენტი აღნიშნავს, რომ სახელმწიფო უწყებებს დაევალათ, დაზარალებულებს საჭირო სამედიცინო დახმარება გაუწიონ.მისივე თქმით, გაცემულია განკარგულება, გამოიძიონ შემთხვევის გარემოებები და „პასუხისგებაში მისცენ ყველა ის პირი, რომლის დაუდევრობაც დადასტურდება“.

1794151201

ადამიანის პოლიტიკური შეხედულებები შეიძლება მისი სუნით განისაზღვროს... – მეცნიერები

ადამიანებს ძალუძთ სხვათა ემოციური მდგომარეობის ქვეცნობიერად აღქმა მათი სხეულის მიერ გამოყოფილი ქიმიური სიგნალების მეშვეობით. უფრო მეტიც, სუნის თავისებურებები შესაძლოა დაკავშირებული იყოს თუნდაც პოლიტიკურ შეხედულებებთან და გარკვეულ დაავადებებთან. ამის შესახებ გამოცემა Indian Defence Review სამეცნიერო კვლევებზე დაყრდნობით წერს.ადამიანის ორგანიზმი ქიმიურ მოლეკულებს ოფლის, ცრემლებისა და სუნთქვის საშუალებით გამოყოფს. სხვათა შორის, გამოიყოფა ეგრეთ წოდებული ემოციური ქიმიური სიგნალებიც, რომლებსაც ადამიანის ემოციური მდგომარეობის შესახებ ინფორმაციის გადაცემა ძალუძს. ამასთან, ტვინს მათზე რეაგირება შეუძლია მაშინაც კი, როდესაც ადამიანი რაიმე კონკრეტულ სუნს ვერ აცნობიერებს.ფილადელფიის ქიმიური შეგრძნებების ცენტრის მკვლევარი პამელა დალტონი განმარტავს, რომ მსგავსი კომუნიკაცია უპირატესად ქვეცნობიერად ხდება: ქიმიურ სიგნალებს შეუძლიათ იმოქმედონ გარშემომყოფების განწყობაზე, აღქმასა და ფიზიკურ რეაქციებზე. საინტერესო შედეგები იქნა მიღებული ყნოსვასა და პოლიტიკურ შეხედულებებს შორის კავშირის შესწავლისას. კერძოდ, კვლევამ, რომელიც American Journal of Political Science-ში გამოქვეყნდა, აჩვენა, რომ მონაწილეებს უფრო მოსწონდათ იმ ადამიანების სხეულის სუნი, რომელთა პოლიტიკური შეხედულებებიც მათ საკუთართან ახლოს იდგა. ამასთან, ისინი ვერ ხედავდნენ იმ პირებს, რომელთა სუნსაც აფასებდნენ.კვლევების კიდევ ერთი მიმართულება დაავადებების გამოვლენას ეხება. ავტორი ახსენებს ჯოი მილნს, რომელსაც უკიდურესად მგრძნობიარე ყნოსვა აქვს და სხვადასხვა დაავადებასთან დაკავშირებული სუნის ამოცნობა ძალუძს. 2019 წელს პარკინსონის დაავადების მქონე პირებისა და ჯანმრთელი მონაწილეების მაისურებით ჩატარებული ექსპერიმენტის დროს მან თითქმის ყველა ნიმუში სწორად განსაზღვრა. განსაკუთრებით აღსანიშნავია, რომ ერთ-ერთი მაისური, რომელიც მან შეცდომით დაავადებულთა კატეგორიას მიაკუთვნა, ეკუთვნოდა ადამიანს, რომელსაც მოგვიანებით პარკინსონის დაავადება დაუდგინდა. იელის უნივერსიტეტის სოციოლოგის, ნიკოლას ქრისტაკისის აზრით, მსგავს მექანიზმებს ევოლუციური მნიშვნელობა შეიძლებოდა ჰქონოდა და ადამიანებისთვის საფრთხის შესახებ ერთმანეთის გაფრთხილებაში ეხმარებოდა.

1794149100

მეცნიერები მოჩვენებების არსებობის ახსნას ცდილობდნენ, თუმცა გაცილებით შემაშფოთებელი რამ აღმოაჩინეს

მეცნიერებმა შეისწავლეს ფენომენი, რომლის დროსაც ადამიანები გრძნობენ, რომ მათ გვერდით ვიღაც იმყოფება, მიუხედავად იმისა, რომ რეალურად ვერავის ხედავენ. კვლევამ აჩვენა, რომ ერთმანეთისგან სრულიად განსხვავებული გამოცდილებისა და მდგომარეობის მქონე ადამიანები მსგავს შეგრძნებებს აღწერენ.ამის შესახებ გამოცემა Popular Mechanics სამეცნიერო ჟურნალ Psychological Medicine-ში გამოქვეყნებულ კვლევაზე დაყრდნობით წერს.ფენომენს, რომელსაც მეცნიერები „უხილავი არსების სიახლოვის შეგრძნებას“ უწოდებენ, ფსიქოლოგები და ნევროლოგები წლების განმავლობაში სწავლობენ. ის შეიძლება გამოიხატებოდეს განცდით, თითქოს ადამიანს ვიღაც აკვირდება, მის უკან დგას ან ახლოს იმყოფება.მკვლევრების განმარტებით, მსგავსი შეგრძნებები შესაძლოა დაკავშირებული იყოს ახლობელი ადამიანის გარდაცვალებით გამოწვეულ ემოციურ მდგომარეობასთან, ძილსა და სიფხიზლეს შორის გარდამავალ პერიოდთან ან გარკვეულ ნევროლოგიურ და ფსიქიკურ მდგომარეობებთან. თუმცა ფენომენის ერთიანი მიზეზი ამ დრომდე დადგენილი არ არის.კვლევის ფარგლებში მეცნიერებმა სამი ერთმანეთისგან განსხვავებული ჯგუფი შეისწავლეს.პირველ ჯგუფში შედიოდნენ ადამიანები, რომლებსაც ხმების გაგონების გამოცდილება ჰქონდათ ან ისეთი ფსიქიკური და ნევროლოგიური მდგომარეობები აღენიშნებოდათ, როგორიცაა შიზოფრენია.მეორე ჯგუფი სულიერი პრაქტიკებით დაინტერესებული ადამიანებისგან შედგებოდა. ზოგიერთი მათგანი აცხადებდა, რომ უხილავ არსებებს გრძნობდა, ხედავდა ან მათ ხმებს ისმენდა.მესამე ჯგუფში კი ექსტრემალური სპორტისა და გამძლეობაზე ორიენტირებული შეჯიბრებების მონაწილეები იყვნენ, რომლებსაც მსგავსი გამოცდილება მძიმე ფიზიკური დატვირთვის დროს ჰქონდათ.მონაწილეებს ონლაინ კითხვარების საშუალებით სთხოვეს, დეტალურად აღეწერათ საკუთარი შეგრძნებები.შედეგებმა აჩვენა, რომ მიუხედავად ჯგუფებს შორის მნიშვნელოვანი განსხვავებებისა, მათი გამოცდილება ხშირად ერთმანეთს ემთხვეოდა.მონაწილეთა დაახლოებით ნახევარი უხილავ არსებობას ადამიანის მსგავსად აღიქვამდა. დაახლოებით ნახევარი მას შეხების საშუალებით გრძნობდა, თითქმის ამდენივე კი ხმებთან აკავშირებდა.უმეტეს შემთხვევაში ადამიანები აღწერდნენ შეგრძნებას, თითქოს ვიღაც მათ უკან ან უშუალოდ სიახლოვეს იმყოფებოდა.ზოგიერთი მონაწილე ამ არსებობას ანგელოზს ან დემონს უკავშირებდა, სხვები კი გარდაცვლილი ახლობლების სიახლოვეს გრძნობდნენ.შეგრძნებების ინტენსივობაც განსხვავებული იყო. ზოგისთვის ეს მხოლოდ განცდა იყო, თითქოს ვიღაც აკვირდებოდა, სხვებისთვის კი ძლიერ შიშსა და საფრთხის შეგრძნებას იწვევდა.კვლევაში აღწერილია უჩვეულო შემთხვევებიც. ერთ-ერთი მონაწილე ჰყვებოდა, რომ ახალგაზრდა ქალის მსგავს მოჩვენებით ფიგურას ხედავდა, რომლის არსებობასაც საკუთარ ცხოვრებასთან დაკავშირებულად აღიქვამდა.ექსტრემალური სპორტის ერთ-ერთმა მონაწილემ კი გაიხსენა, რომ შეჯიბრების დროს, როდესაც ჰიპოთერმიის საფრთხის წინაშე აღმოჩნდა, წინ მოულოდნელად ძლიერი სინათლე დაინახა. მისი თქმით, სწორედ ამ სინათლემ უბიძგა გზის გაგრძელებისკენ და შეჯიბრების დასრულებაში დაეხმარა.მკვლევრებმა დაადგინეს, რომ უხილავი არსების სიახლოვის შეგრძნება უფრო ხშირად იმ ადამიანებში გვხვდებოდა, რომლებსაც ჰალუცინაციებისკენ მიდრეკილება ჰქონდათ. ასეთ გამოცდილებას ზოგჯერ პარანოიაც ახლდა.ამასთან, სულიერი პრაქტიკებით დაინტერესებული ადამიანები მსგავს შეგრძნებებს ხშირად მედიტაციის დროს აღწერდნენ, ხოლო ძილისა და სიფხიზლის გარდამავალ მდგომარეობაში ასეთი გამოცდილება სამივე ჯგუფის მონაწილეებს ჰქონდათ.მიუხედავად გამოვლენილი მსგავსებებისა, მეცნიერებმა ფენომენის გამომწვევი ერთი კონკრეტული მიზეზის დადგენა ვერ შეძლეს.მკვლევრების შეფასებით, საჭიროა დამატებითი კვლევები იმის გასარკვევად, როგორ და რატომ ქმნის ადამიანის ტვინი სხვისი სიახლოვის შეგრძნებას მაშინ, როდესაც მის გვერდით არავინ იმყოფება.

1794149065

ილია ჭავჭავაძის ფენომენი, ყველა პატრიოტი ქართველისთვის ეროვნული თვითშეგნების მასაზრდოებელი განსაკუთრებული ფუძე და ღერძია - დავით მათიკაშვილი

ყვარელში სახალხო დღესასწაული ილიაობა აღინიშნება. წელს ილია ჭავჭავაძის დაბადებიდან 189 წელი შესრულდა. საიუბილეო ღონისძიებები იმართება ილია ჭავჭავაძის მუზეუმის ეზოში. ყვარელში იმყოფებიან პრემიერ-მინისტრი, აღმასრულებელი და საკანონმდებლო ხელისუფლების წარმომადგენლები.ილიაობის დღესასწაულთან დაკავშირებით ყვარელში დილიდან მიმდინარეობს სხვადასხვა ღონისძიება - ადგილობრივი მეწარმეების პროდუქციის გამოფენა-გაყიდვა, კულინარიული სივრცეები და ბავშვთა გასართობი ზონები.პარლამენტის საპროცედურო საკითხთა კომიტეტის თავმჯდომარის, დავით მათიკაშვილის განცხადებით, ილიაობა ეროვნული იდენტობისა და ქართული სულიერების ზეიმია, ხოლო ილიას მიერ ჩამოყალიბებული ეროვნულ-პოლიტიკური ხედვა დროსა და ეპოქას უძლებს."ილია ჭავჭავაძის ფენომენი, ყველა პატრიოტი ქართველისთვის ეროვნული თვითშეგნების მასაზრდოებელი განსაკუთრებული ფუძე და ღერძია. ამიტომაც, ილიაობა ჩვენი იდენტობის, ამაყი და უკვდავი ქართული სულიერების ხილული და ხელშესახები ზეიმია. მისმა მოღვაწეობამ შექმნა ეროვნულ-პოლიტიკური დოქტრინა, რომელიც უძლებს ნებისმიერ დროსა და ეპოქას", - განაცხადა დავით მათიკაშვილმა. 

1794149040

VIDEO: ჭინჭრის ციება, კვინკეს შეშუპება და ანაფილაქსია - ზაზა თელია გამომწვევ მიზეზებსა და საფრთხის ნიშნებზე საუბრობს

ალერგიული რეაქციები ყოველთვის მხოლოდ მსუბუქი გამონაყრითა და ქავილით არ შემოიფარგლება. ზოგჯერ ისინი გაცილებით მძიმე ფორმით ვლინდება და ზოგჯერ ადამიანის სიცოცხლესაც კი უქმნის საფრთხეს.გადაცემაში „დილა მშვიდობისა საქართველო“ დერმატო-ვენეროლოგმა ზაზა თელიამ ალერგიული რეაქციის სამ მნიშვნელოვან ფორმაზე, ჭინჭრის ციებაზე, კვინკეს შეშუპებასა და ანაფილაქსიურ შოკზე.„ჭინჭრის ციება იმიტომ ჰქვია, რომ კანის ზედაპირიდან ამოწეული გაწითლებული, როგორც ჭინჭარი დაგსუსხავს, ეგეთი ტიპის ელემენტები ჩნდება კანზე. ძალიან ხშირი ხშირი დაავადებაა, ხშირად არის გამოვლინება და შეიძლება ნებისმიერ ადამიანს დაემართოს ცხოვრების რაღაც ეტაპზე, მათ შორის მწერის ნაკბენზე.ეს არის ანთებითი პასუხი ორგანიზმის რაღაცა ტრიგერზე, რაღაცა გამაღიზიანებელ ფაქტორზე და უნდა ვიცოდეთ, რომ არის ორი ტიპის, ეს არის მწვავე და ქრონიკული, ნუ კრიტიკულად გადამწყვეტი მნიშვნელობა აქვს რომელია. მწვავე არის, რომ ექვს კვირაზე ნაკლები პერიოდით გრძელდება, თუ ექვს კვირას ასცდა ეს არის უკვე ქრონიკული ურტიკარია და აქ, გარკვეულწილად რაღაცები იცვლება. ანგიოკვინკეს შეშუპების დროს შეიძლება შეშუპდეს თვალები, ტუჩი შორს წასულ შემთხვევებში შეიძლება სასუნთქი გზების შეშუპებაც მოხდეს“, - ამბობს ზაზა თელია.

1794148993

ილიას გზა, ანდერძი, მოღვაწეობა - არ არის მხოლოდ ის, რასაც ჩვენ პატივი უნდა მივაგოთ, ეს არის ის დღევანდელობა და ხვალინდელი დღე, რომელზეც ჩვენ განუხრელად უნდა ვიაროთ - ირაკლი ქადაგიშვილი

ყვარელში სახალხო დღესასწაული ილიაობა აღინიშნება. წელს ილია ჭავჭავაძის დაბადებიდან 189 წელი შესრულდა. საიუბილეო ღონისძიებები იმართება ილია ჭავჭავაძის მუზეუმის ეზოში. ყვარელში იმყოფებიან პრემიერ-მინისტრი, აღმასრულებელი და საკანონმდებლო ხელისუფლების წარმომადგენლები. იყო სიტყვით გამოსვლებიც.სიტყვით გამოსვლისას, პარლამენტის რეგიონული პოლიტიკის კომიტეტის თავმჯდომარემ, ირაკლი ქადაგიშვილმა ილია ჭავჭავაძის მოღვაწეობაზე ისაუბრა და აღნიშნა, რომ მისი იდეები არა მხოლოდ წარსულის მემკვიდრეობა, არამედ ქვეყნის დღევანდელობისა და მომავლის საფუძველია."ილიას გზა, ილიას ანდერძი, ილიას მოღვაწეობა - ეს არ არის მხოლოდ ის, რასაც ჩვენ პატივი უნდა მივაგოთ, ეს არის ის დღევანდელობა და ის ხვალინდელი დღე, რომელზეც ჩვენ უნდა ვიაროთ განუხრელად. ამიტომ, ილია, ეს არის ჩვენი მომავალი. ილია ყვარელში დაბადებული მარგალიტია, რომელიც მთელი საქართველოს უგვირგვინო მეფე იყო, არის და იქნება", - აცხადებს პარლამენტის რეგიონული პოლიტიკის კომიტეტის თავმჯდომარე ირაკლი ქადაგიშვილი.ილიაობის დღესასწაულთან დაკავშირებით ყვარელში დილიდან სხვადასხვა ღონისძიება მიმდინარეობს - ადგილობრივი მეწარმეების პროდუქციის გამოფენა-გაყიდვა, კულინარიული სივრცეები და ბავშვთა გასართობი ზონები.

1794148892

ილია ჭავჭავაძემ ნათლად დაგვანახა, რომ სამშობლოს სამსახური უდიდესი პასუხისმგებლობაა, ჩვენი პასუხისმგებლობაა ეს ფასდაუდებელი მემკვიდრეობა არა მხოლოდ შევინარჩუნოთ, არამედ მომავალ თაობებსაც გაუზიაროთ - გივი მიქანაძე​

ყვარელში სახალხო დღესასწაული ილიაობა აღინიშნება. წელს ილია ჭავჭავაძის დაბადებიდან 189 წელი შესრულდა. საიუბილეო ღონისძიებები იმართება ილია ჭავჭავაძის მუზეუმის ეზოში. ყვარელში იმყოფებიან პრემიერ-მინისტრი, აღმასრულებელი და საკანონმდებლო ხელისუფლების წარმომადგენლები. იყო სიტყვით გამოსვლებიც.განათლების მინისტრის, გივი მიქანაძის განცხადებით, ილია ჭავჭავაძემ მნიშვნელოვანი წვლილი შეიტანა ეროვნული თვითშეგნების გაძლიერებაში, ქართული ენის, განათლებისა და კულტურის განვითარებაში. მისივე თქმით, მნიშვნელოვანია ილიას მემკვიდრეობის შენარჩუნება და მისი ღირებულებების მომავალი თაობებისთვის გაზიარება:"ილია ჭავჭავაძემ უდიდესი როლი შეასრულა ეროვნული თვითშეგნების გაძლიერების, სახელმწიფოებრივი აზროვნებისა და ჩვენი სამშობლოს საზოგადოებრივი განვითარების საქმეში. მან ქართული ენის, განათლებისა და კულტურის განვითარება ეროვნული გადარჩენისა და ქვეყნის წინსვლის მთავარ საფუძვლად აქცია. თავისი ცხოვრებითა და მოღვაწეობით ილია ჭავჭავაძემ ნათლად დაგვანახა, რომ სამშობლოს სამსახური უდიდესი პასუხისმგებლობაა. ჩვენი პასუხისმგებლობაა მისი დანატოვარი, ეს ფასდაუდებელი მემკვიდრეობა არა მხოლოდ შევინარჩუნოთ, არამედ მომავალ თაობებსაც გაუზიაროთ და ყოველდღიურ საქმიანობაში გავაგრძელოთ მისი ღირებულებების დამკვიდრება", - განაცხადა განათლების მინისტრმა, გივი მიქანაძემ.ილიაობის დღესასწაულთან დაკავშირებით ყვარელში დილიდან სხვადასხვა ღონისძიება მიმდინარეობს - ადგილობრივი მეწარმეების პროდუქციის გამოფენა-გაყიდვა, კულინარიული სივრცეები და ბავშვთა გასართობი ზონები.

1794146984

ტრაგედია, რომელიც საბჭოთა ხელისუფლებამ დამალა - რა მოხდა სინამდვილეში 60-იან წლებში თბილისის აბანოებში

1960-იანი წლების დასაწყისში (1961 წელს) თბილისის აბანოთუბანში დატრიალებული ტრაგედია უკავშირდება წავკისისწყლის (ლეღვთახევის) უეცარ და დამანგრეველ ღვარცოფულ ადიდებას, რამაც ათეულობით ადამიანის სიცოცხლე შეიწირა.საბჭოთა პერიოდში ეს კატასტროფა მკაცრად გასაიდუმლოვდა და პრესაში არ გაშუქებულა, თუმცა ძველი თბილისელების მეხსიერებაში ის ერთ-ერთ ყველაზე მძიმე ეპიზოდად დარჩა.როგორ დაიწყო სტიქია?ტრაგედიის დღეს თბილისის შემოგარენში, კოჯორ-ტაბახმელას მიდამოებში, უეცრად დაიწყო უპრეცედენტო სიძლიერის თავსხმა წვიმა და სეტყვა. მთებიდან წამოსულმა უზარმაზარმა წყლის მასამ თან წამოიღო მიწა, ქვა-ღორღი, მოგლეჯილი ხეები და ვიწრო ლეღვთახევის ხეობაში მძლავრ ღვარცოფად ჩამოწვა.სანამ ქალაქის ცენტრალურ ნაწილში საფრთხეს გააცნობიერებდნენ, ნიაღვარი ლეღვთახევის კალაპოტიდან გადმოვიდა და პირდაპირ აბანოთუბნისკენ დაიძრა.რატომ აღმოჩნდნენ ადამიანები სასიკვდილო ხაფანგში?თბილისის გოგირდის აბანოების არქიტექტურა თავისებურია: ისინი მიწისქვეშა ნაგებობებია, რომლებიც ზემოდან მხოლოდ აგურის გუმბათებითა და სავენტილაციო/სანათური ღიობებით ჩანს, ხოლო შესასვლელები და თავად სააბაზანო ოთახები ქუჩის დონეზე ბევრად დაბლა, ჩაღრმავებულ სივრცეში მდებარეობს.როდესაც ღვარცოფული ტალღა აბანოებს დაატყდა თავს, წყალი, შლამი და ლოდები წამებში ჩავარდა როგორც შესასვლელი კარებიდან, ისე გუმბათოვანი ღიობებიდან. აბანოებში მყოფმა ადამიანებმა (როგორც დამსვენებლებმა, ისე მომსახურე პერსონალმა) ამოსვლა ფიზიკურად ვეღარ მოასწრეს. ვიწრო დერეფნები და კიბეები წყლისა და ნაშალი მასალის მორევმა დაბლოკა. რამდენიმე წუთში აბანოების მიწისქვეშა დარბაზები ჭერამდე აივსო წყლითა და ტალახით, რის გამოც შიგნით მყოფი ხალხი დაიხრჩო.სტიქიის შეჩერების შემდეგ დაიწყო სამაშველო და გაწმენდითი სამუშაოები. ტალახით ამოვსებული აბანოებიდან ცხედრები რამდენიმე დღის განმავლობაში გამოჰყავდათ.საბჭოთა რეჟიმის პოლიტიკის გამო, ადამიანურ მსხვერპლზე ოფიციალური ინფორმაცია დაიბლოკა, რათა მოსახლეობაში პანიკა და სისტემის მიმართ უნდობლობა არ გაჩენილიყო.არაოფიციალური ცნობებითა და თვითმხილველთა მონათხრობით, ტრაგედიას ათეულობით ადამიანი ემსხვერპლა (ზოგიერთი შეფასებით, 30-დან 50-მდე ადამიანი).ტრაგედიის შემდეგ ლეღვთახევის ხეობის კალაპოტი რკინა-ბეტონის მასიურ კოლექტორში მოაქციეს და მიწით დაფარეს. ათწლეულების განმავლობაში ლეღვთახევი ფაქტობრივად დახურული იყო და ქალაქის მცხოვრებლებს აღარ ახსოვდათ, რომ იქ ბუნებრივი კანიონი და ჩანჩქერი არსებობდა.მხოლოდ 2010-იან წლებში, აბანოთუბნისა და ლეღვთახევის მასშტაბური რეკონსტრუქციისას, ხეობა გაიხსნა და მოეწყო თანამედროვე უსაფრთხოების სანიაღვრე სისტემები.

1794146945

ადვოკატთა ასოციაციას 200 ახალი ადვოკატი შეუერთდა

ადვოკატთა ასოციაციას 200 ახალი ადვოკატი შეუერთდა. ადაპტაციის პროგრამის კურსდამთავრებულებმა პროფესიული ფიცი დადეს.ასოციაციის თავმჯდომარემ, ირაკლი ყანდაშვილმა მათ პროფესიულ საქმიანობაში წარმატება უსურვა.„მე მიხარია, რომ ადვოკატთა ასოციაციის რიგები ივსება, იზრდება ახალგაზრდა წევრებით, ჩვენ კი პროფესიული განვითარების ფერხულში მათ ვახვედრებთ განვითარებულ პროფესიას", - აღნიშნა ყანდაშვილმა.8 ნოემბერი საქართველოში ადვოკატის პროფესიული დღეა. ასოციაციის ფორმირების საკანონდებლო პროცესი 2001 წელს დაიწყო, ხოლო 2005 წელს ორგანიზაცია დაფუძნდა, რომელიც დღეისთვის 12 ათასამდე ადვოკატს აერთიანებს.

1794146767

ილია ჭავჭავაძის დაბადებიდან 189 წელი საგურამოში, მწერლის სახელმწიფო მუზეუმში აღნიშნეს

ილია ჭავჭავაძის დაბადებიდან 189 წელი საგურამოში, მწერლის სახელმწიფო მუზეუმში აღნიშნეს.ტრადიციულად, დააჯილდოვეს პრემია „საგურამოსა“ და ილიას მედლის 2026 წლის ლაურეატები.ქართული კულტურისა და სულიერების წინაშე განსაკუთრებული დამსახურებისთვის, ილიას მედალი „მარად და ყველგან, საქართველო, მე ვარ შენთანა“ - მერაბ კოკოჩაშვილს გადაეცა.

1794146504

ილია ჭავჭავაძემ დაგვიტოვა ქართველთა უმთავრესი ანდერძი - „მამული, ენა, სარწმუნოება“, რაც არა მხოლოდ ჩვენი ეროვნული ცნობიერების საფუძველია, არამედ - მოქმედების გეგმა, რომელიც დღესაც ისეთივე აქტუალურია, როგორც ილია ჭავჭავაძის მოღვაწეობის დროს - ირაკლი კობახიძე

ირაკლი კობახიძე  - ილია ჭავჭავაძემ დაგვიტოვა ქართველთა უმთავრესი ანდერძი - „მამული, ენა, სარწმუნოება“, რაც არა მხოლოდ ჩვენი ეროვნული ცნობიერების საფუძველია, არამედ - მოქმედების გეგმა, რომელიც დღესაც ისეთივე აქტუალურია, როგორც ილია ჭავჭავაძის მოღვაწეობის დროს ჩვენი წარსული მდიდარია თვალსაჩინო საერო თუ სასულიერო მოღვაწეებით, თუმცა ილია ჭავჭავაძე იყო ერთადერთი, რომელსაც ქართველმა ხალხმა სიცოცხლეშივე, დამსახურებლად და დიდი სიყვარულით უწოდა „ერის მამა“, - ამის შესახებ საქართველოს პრემიერ-მინისტრმა ირაკლი კობახიძემ ყვარელში, ილიაობის დღესასწაულთან დაკავშირებით გამართულ ღონისძიებაზე სიტყვით გამოსვლისას განაცხადა.პრემიერის თქმით, ილია ჭავჭავაძემ ქვეყნისათვის ურთულეს ეპოქაში გააერთიანა ყველაფერი, რაც მაშინდელ საქართველოს სჭირდებოდა.„გილოცავთ ილიაობას, ჩვენი ქვეყნისთვის უმნიშვნელოვანეს დღესასწაულს. ილია ჭავჭავაძის დაბადების დღე გამორჩეულია ისტორიული სიმბოლიზმითა და მნიშვნელობით. ჩვენ შევიკრიბეთ მის მშობელ კუთხეში, რათა კიდევ ერთხელ მივაგოთ პატივი იმ გამორჩეულ მემკვიდრეობას, რომელმაც ქართველი ერის თვითშეგნება, სულიერი სიმტკიცე და მომავლის რწმენა განსაზღვრა.როდესაც ილია ჭავჭავაძეზე ვსაუბრობთ, ბუნებრივია, პირველ რიგში ვფიქრობთ იმ საწყისებზე, რაზეც თანამედროვე ქართული სახელმწიფოებრიობა, კულტურა და ერის ერთობა დგას. ილიამ თითქმის შეუძლებელი შეძლო - ქვეყნისათვის ურთულეს, გარდამტეხ ეპოქაში მან გააერთიანა ყველაფერი, რაც მაშინდელ საქართველოს სჭირდებოდა - საზოგადო მოღვაწე,  მწერალი, პუბლიცისტი, ბანკის დამფუძნებელი, ქართული თეატრის აღმშენებელი და რაც მთავარია, ერის წინამძღოლი. თანამედროვე საქართველოში არ მოიძებნება საზოგადოებრივი ცხოვრების არც ერთი სფერო, რომელიც მის ნააზრევს არ ეყრდნობა. ასეთი მრავალმხრივი მოღვაწეობის მაგალითი მსოფლიო ისტორიაშიც კი იშვიათობაა - ეს არის საყოველთაო მნიშვნელობის მოვლენა, როდესაც ერთი ადამიანის ცხოვრებამ ერის განვითარების გზა განსაზღვრა.საბედნიეროდ, ჩვენი წარსული მდიდარია თვალსაჩინო საერო თუ სასულიერო მოღვაწეებით, თუმცა ილია ჭავჭავაძე იყო ერთადერთი, რომელსაც ქართველმა ხალხმა სიცოცხლეშივე, დამსახურებლად და დიდი სიყვარულით უწოდა „ერის მამა“, - განაცხადა პრემიერმა.მთავრობის მეთაურის თქმით, ილია ჭავჭავაძემ დატოვა ქართველთა უმთავრესი ანდერძი - „მამული, ენა, სარწმუნოება“, რაც არა მხოლოდ ქართული ეროვნული ცნობიერების საფუძველია, არამედ, მოქმედების გეგმა, რომელიც დღესაც ისეთივე აქტუალურია, როგორც ილია ჭავჭავაძის მოღვაწეობის დროს.„წლევანდელი თარიღი განსაკუთრებულ დატვირთვას ატარებს. წელს ჩვენ ვზეიმობთ საქართველოში ქრისტიანობის სახელმწიფო რელიგიად გამოცხადების 1700 წლის იუბილეს. ასეთ ღირსშესანიშნავ დროს, შეუძლებელია, არ გავიხსენოთ ის უდიდესი ძალისხმევა, რაც ილია ჭავჭავაძემ გასწია დედაეკლესიის ავტოკეფალიის აღდგენისთვის. მრავალ სხვა დიდ საქმესთან ერთად, სწორედ ამ ღვაწლისთვისაც შერაცხა იგი წმინდანად ქართულმა ეკლესიამ.ილია ჭავჭავაძემ დაგვიტოვა ქართველთა უმთავრესი ანდერძი - „მამული, ენა, სარწმუნოება“, რაც არა მხოლოდ ჩვენი ეროვნული ცნობიერების საფუძველია, არამედ - მოქმედების გეგმა, რომელიც დღესაც ისეთივე აქტუალურია, როგორც ილია ჭავჭავაძის მოღვაწეობის დროს.კიდევ ერთხელ გილოცავთ ილიაობას! მჯერა, ჩვენთვის და ყველა მომავალი თაობისათვის, წმინდა ილია მართლის ცხოვრება მუდამ დარჩება მაგალითად, თუ როგორ უნდა უყვარდეს ადამიანს საკუთარი სამშობლო და არა მხოლოდ სიტყვით, არამედ ყოველდღიური შრომით იზრუნოს მის უკეთეს ხვალინდელ დღეზე“, - განაცხადა პრემიერმა.

1794144252

როგორ იცვლება თავის ტვინი ლოცვისას - მეცნიერებმა სულიერი მდგომარეობის ბიოლოგიური მექანიზმები ახსნეს

ლოცვა საუკუნეების განმავლობაში რწმენის, სულიერებისა და შინაგანი სიმშვიდის წყაროდ მიიჩნეოდა. თუმცა თანამედროვე ნეირომეცნიერება სულ უფრო მეტ ყურადღებას უთმობს იმასაც, თუ რა პროცესები მიმდინარეობს ადამიანის ტვინში ლოცვისა და მედიტაციის დროს. კვლევები აჩვენებს, რომ ღრმა სულიერ გამოცდილებას ტვინის სხვადასხვა უბნის აქტივობის ცვლილება ახლავს თან და შესაძლოა გავლენას ახდენდეს ყურადღებაზე, ემოციებსა და საკუთარი თავის აღქმაზე.ამ საკითხს ნეიროთეოლოგია შეისწავლის - მეცნიერების მიმართულება, რომელიც რელიგიურ და სულიერ გამოცდილებას ტვინის ფუნქციონირებასთან აკავშირებს.2026 წლის 30 აგვისტოს სამეცნიერო ჟურნალ Brain and Behavior-ში გამოქვეყნდა სისტემური მიმოხილვა, რომელშიც 1998-2026 წლებში ჩატარებული 105 კვლევის შედეგებია გაანალიზებული. მეცნიერებმა სხვადასხვა რელიგიური და სულიერი პრაქტიკის, მათ შორის ლოცვის, მედიტაციის, რელიგიური ტექსტების კითხვისა და გალობის დროს ტვინში მიმდინარე პროცესები შეისწავლეს.კვლევის ავტორების დასკვნით, ამ პრაქტიკებს ტვინის იმ სისტემებთან კავშირი აქვს, რომლებიც ყურადღებას, ემოციების რეგულირებას, საკუთარი თავის აღქმასა და მოტივაციას განაპირობებს.რა ემართება ტვინს ლოცვის დროს?1. შუბლის წილი - ყურადღება და კონცენტრაციაშუბლის წილი მნიშვნელოვან როლს ასრულებს ყურადღების მართვაში, დაგეგმვასა და გადაწყვეტილებების მიღებაში.ამერიკელი ნეირომეცნიერის, ენდრიუ ნიუბერგის კვლევებში, რომლებშიც ტვინის სისხლის მიმოქცევას SPECT-ტექნოლოგიით აკვირდებოდნენ, აღმოჩნდა, რომ მედიტაციის დროს შუბლის წილის აქტივობა იზრდებოდა. მსგავსი ცვლილებები დაფიქსირდა ფრანცისკანელი მონაზვნების ლოცვის დროსაც.მეცნიერის განმარტებით, ეს შეიძლება უკავშირდებოდეს იმ ფაქტს, რომ ლოცვა და მედიტაცია ყურადღების კონცენტრაციასა და გონებრივ ფოკუსირებას მოითხოვს.2. თხემის წილი - სივრცისა და საკუთარი თავის აღქმატვინის თხემის წილი მონაწილეობს სივრცეში ორიენტაციასა და საკუთარი სხეულის გარემოსგან გამიჯვნის პროცესში.ნიუბერგის კვლევებში ტიბეტელი ბუდისტი მედიტანტებისა და ფრანცისკანელი მონაზვნების ტვინის სკანირებამ აჩვენა, რომ ღრმა მედიტაციისა და ლოცვის დროს თხემის წილის გარკვეულ უბნებში აქტივობა მცირდებოდა.მეცნიერები ვარაუდობენ, რომ ამ ცვლილებას შესაძლოა უკავშირდებოდეს ის განცდა, რომელსაც ადამიანები ღრმა სულიერი გამოცდილებისას აღწერენ. დროისა და სივრცის შეგრძნების შესუსტება და საკუთარ თავსა და გარემოს შორის საზღვრის გაქრობა.3. ტვინის ემოციური ქსელები - შფოთვა და შინაგანი სიმშვიდელოცვისა და მედიტაციის კვლევებში განსაკუთრებული ყურადღება ეთმობა იმ ნერვულ ქსელებსაც, რომლებიც ემოციურ რეაქციებსა და სტრესის რეგულირებაში მონაწილეობენ.2026 წლის სისტემური მიმოხილვის მიხედვით, სულიერი და რელიგიური პრაქტიკები დაკავშირებულია ტვინის რამდენიმე მნიშვნელოვან უბანთან, მათ შორის ამიგდალასთან, რომელიც შიშისა და ემოციური საფრთხის აღქმაში მონაწილეობს.ეს მონაცემები მკვლევრებს აძლევს საფუძველს, შეისწავლონ, როგორ შეიძლება უკავშირდებოდეს რეგულარული სულიერი პრაქტიკა ემოციური მდგომარეობისა და შფოთვის რეგულირებას. თუმცა ლოცვის შედეგად ამიგდალას აქტივობის შემცირება ყველა ადამიანისთვის დადასტურებულ უნივერსალურ ეფექტად ჯერ ვერ ჩაითვლება.4. ნეიროპლასტიურობა - შეუძლია თუ არა ლოცვას ტვინის შეცვლა?ადამიანის ტვინს მთელი სიცოცხლის განმავლობაში აქვს ცვლილებისა და ადაპტაციის უნარი, რასაც ნეიროპლასტიურობა ეწოდება. განმეორებადი გამოცდილება და პრაქტიკა ნერვული ქსელების მუშაობაზე გავლენას ახდენს.მკვლევრები ვარაუდობენ, რომ ხანგრძლივმა მედიტაციურმა და სულიერმა პრაქტიკამ შესაძლოა ტვინის გარკვეულ სტრუქტურებსა და მათ შორის კავშირებზეც იმოქმედოს.თუმცა მნიშვნელოვანია, განვასხვაოთ ტვინის დროებითი აქტივობის ცვლილება მისი სტრუქტურული გარდაქმნისგან. არსებული კვლევები არ იძლევა საფუძველს, ვამტკიცოთ, რომ ყოველდღიური ლოცვა აუცილებლად ზრდის შუბლის წილის რუხი ნივთიერების სიმჭიდროვეს ან იცავს ადამიანს ასაკობრივი ცვლილებებისგან.2021 წელს გამოქვეყნებულმა სისტემურმა მიმოხილვამ ლოცვის დროს მიმდინარე ფიზიოლოგიური ცვლილებების შესახებ რვა ექსპერიმენტული კვლევა გააანალიზა. ხუთი მათგანი ტვინის აქტივობას, სამი კი ორგანიზმის ფიზიოლოგიურ მაჩვენებლებს შეისწავლიდა.მკვლევრებმა დააფიქსირეს ცვლილებები ნერვულ აქტივობასა და ზოგიერთ ფიზიოლოგიურ მაჩვენებელში, მათ შორის გულისცემასა და სუნთქვასთან დაკავშირებულ პროცესებში. ამასთან, ავტორები ხაზს უსვამენ, რომ კვლევების რაოდენობა ჯერ კიდევ შეზღუდულია და დამატებითი მტკიცებულებებია საჭირო.