1737183130

უკრაინის დამოუკიდებლობა იარაღშია - ზელენსკი

უკრაინის პრეზიდენტმა ვოლოდიმირ ზელენსკიმ უკრაინის უმაღლესი მთავარსარდლის შტაბის სხდომა გამართა, სადაც განაცხადა, რომ ქვეყნის დამოუკიდებლობა იარაღშია, - ინფორმაციას უკრაინული მედია ავრცელებს.უკრაინის უმაღლესი მთავარსარდლის შტაბის სხდომაზე ასევე განხილული იყო დამოუკიდებლობის საკითხი იარაღის წარმოების კუთხით. კერძოდ, დრონები, სარაკეტო პროგრამა და ჯარისთვის განკუთვნილი რობოტიზირებული სისტემები.„გავმართე შტაბის სხდომა. საკითხები სხვადასხვა იყო, თუმცა მთლიანობაში ეხებოდა ჩვენს დამოუკიდებლობას იარაღის კუთხით - დრონების წარმოებას, სარაკეტო პროგრამას, ტექნოლოგიურ კომპონენტებს ჯარისთვის, კერძოდ, რობოტიზირებულ სისტემებს“, - განაცხადა ზელენსკიმ.ზელენსკის თქმით, უკრაინაში მუშაობენ დიდ შესყიდვებზე და მასშტაბურ წარმოებაზე.„მე მადლობელი ვარ ყველა პარტნიორის, რომელიც ჩვენ გვეხმარება“, - აღნიშნა ზელენსკიმ.

1737120456

უკრაინის პოლიცია ქვეყნის 19 რეგიონში სამხედრო ვალდებულების მქონე პირთა მიერ საზღვრის უკანონო კვეთის საქმეზე ჩხრეკას ატარებს

უკრაინის ეროვნული პოლიციის ინფორმაციით, ქვეყნის 19 რეგიონში, 200 -ზე მეტ მისამართზე, ჩხრეკა მიმდინარეობს.საგამოძიებო მოქმედებები უკავშირდება სამხედრო ვალდებულების მქონე პირთა მიერ, უკრაინის საზღვრის უკანონოდ კვეთის საქმეს.ეროვნული პოლიციის განმარტებით, საქმე ეხება დანაშაულებრივ სქემებს, რომელთა საშუალებითაც, მობილიზაციის ასაკის მამაკაცები, სამხედრო სამსახურსა და ომში წასვლას თავს არიდებდნენ.პოლიციის მიზანია თაღლითობის, ყალბი დოკუმენტაციის დამზადების, ელექტრონული რეესტრების მუშობაში არასანქცირებული ჩარევისა და თანამდებობის პირთა მოსყიდვის ფაქტებზე მტკიცებულებების შეკრება.

1737089782

კიევის ოლქში ჩამოგდებული დრონის ნამსხვრევებმა მოზარდი ბიჭი დააზიანა - უკრაინაში საჰაერო განგაში ჩაირთო

უკრაინაში საჰაერო განგაში რამდენიმე ოლქში, მათ შორის, დედაქალაქში საღამოს დრონების საფრთხის გამო ჩაირთო. გავრცელდა ინფორმაცია საჰაერო თავდაცვის მუშაობის შესახებ.კიევის ოლქში ჩამოგდებული დრონის ნამსხვრევებმა მოზარდი ბიჭი დააზიანა.უკრაინის გენერალური შტაბის ინფორმაციით, გასული 24 საათის განმავლობაში, ფრონტზე 130-ზე მეტი საბრძოლო შეტაკება განხორციელდა, მათ შორის, უმეტესობა პოკროვსკისა და კურსკის მიმართულებით იყო."დიფ სთეითის" რუკაზე დაყრდნობით, უკრაინული მედია იუწყება, რომ რუსულმა ჯარებმა დონეცკის ოლქში 3 დასახლების ოკუპირება შეძლეს და რამდენიმე მიმართულებით დაწინაურდნენ.რაც შეეხება ომში მყოფი ქვეყნის დახმარებას, ნიდერლანდების საგარეო საქმეთა მინისტრმა, უკრაინას ენერგეტიკული ქსელის გაძლიერებისთვის, 27 მილიონი ევროს დახმარების პაკეტი გამოუყო.

1737039660

ზელენსკი: აშშ-ს, გერმანიას, უნგრეთსა და სლოვაკეთს ჯერ არ სურთ ნატოში ჩვენი ხილვა

უკრაინის პრეზიდენტმა, ვოლოდიმირ ზელენსკიმ დაასახელა ის ქვეყნები, რომლებიც ამჟამად ეწინააღმდეგებიან უკრაინის ნატოში გაწევრიანებას. ინფორმაციას ამის შესახებ უკრაინული მედია ავრცელებს.„გულწრფელები იყვნენ აშშ, უნგრეთი, სლოვაკეთი და გერმანია და მათ არ სურდათ ჩვენი ხილვა ნატოში. ეს არის ღია საუბარი. და ვფიქრობ, რომ აქ არანაირი საიდუმლო არ არის, ეს ის ოთხი ქვეყანაა, რომლებსაც სხვადასხვა მიზეზის გამო ჯერ არ ხედავენ უკრაინას ნატოში“, - აღნიშნა ვოლოდიმირ ზელენსკიმ.

1737039000

ზელენსკი: ჯერჯერობით ევროპის ქვეყნების მხოლოდ ნაწილს ესმის ის რეალური საფრთხე, რომელსაც რუსეთი წარმოადგენს

უკრაინის პრეზიდენტი, ვოლოდიმირ ზელენსკი მიიჩნევს, რომ ჯერჯერობით ევროპის ქვეყნების მხოლოდ ნაწილს ესმის ის რეალური საფრთხე, რომელსაც რუსეთი წარმოადგენს. ინფორმაციას ამის შესახებ უკრაინული მედია ავრცელებს.„მე ვფიქრობ, რომ ეს არის ყველაზე მნიშვნელოვანი შეცდომა, რადგან ეს არის ყველა სხვა კითხვაზე პასუხის საფუძველი. იმიტომ, რომ თუ ზუსტად იცი, რომ რუსები უფრო შორს წავლენ და ამაში დარწმუნებული ხარ... რატომ არ გავაძლიეროთ უკრაინა მაქსიმალურად, რატომ არ გავზარდოთ წარმოება შეიარაღებული ძალებისთვის, რატომ არ შემოვიღოთ ტოტალური სანქციები? შეცდომაა, ბოლომდე ვერ გაიგო ვინ არის პუტინი“, - აღნიშნა ვოლოდიმირ ზელენსკიმ.უკრაინის პრეზიდენტის თქმით, უკრაინაში ომის დასრულება ან ცეცხლის შეწყვეტის პერსპექტივა დამოკიდებულია ევროპის სურვილზე, იყოს უფრო მკაცრი რუსეთის მიმართ.

1737027799

უკრაინაში ერთ-ერთი ბრიგადის მეთაურმა საკუთარი მეუღლე ფიქციურად ჯარისკაცად გააფორმა, რათა ფული მიეთვისებინა

უკრაინის გამოძიების სახელმწიფო ბიუროს წარმომადგენლებმა ქვეყნის შეიარაღებული ძალების ტერიტორიული თავდაცვის ერთ-ერთი ბრიგადის ყოფილ მეთაურს და მის სამ მოადგილეს ბრალი წარუდგინეს 922 ათასი გრივნის (62 ათასი ლარის) მითვისების გამო. ინფორმაციას უკრაინის გამოძიების სახელმწიფო ბიურო ავრცელებს.გამოძიების მტკიცებით, 2023 წლის ივლისის ბოლოს ბრალდებულმა საკუთარი მეუღლე მის ბრიგადაში მსროლელის პოზიციაზე გააფორმა, რათა მას ფულადი თანხა მიეღო. მეტი დამაჯერებლობისთვის, ბრიგადის ყოფილი მეთაური და მეუღლე ფიქციურად გაეყარნენ ერთმანეთს.მოგვიანებით, ბრიგადის ყოფილმა მეთაურმა საქმეში მისი მოადგილეები ჩართო. ისინი ყალბ ცნობებს ადგენდნენ იმის შესახებ, რომ მისი მეუღლე ფრონტის ხაზზე საბრძოლო მოქმედებებში იღებდა მონაწილეობას. ამრიგად, 2023 წლის ივლისიდან 2024 წლის აპრილამდე ქალმა უკანონოდ 922 ათასი გრივნა მიიღო.სინამდვილეში, მთელი ეს პერიოდი ქალი ქმართან იმყოფებოდა და სპეციალურ ფერმაზე ცხენებს უვლიდა. მან ასევე ორი კვირა პოლონეთში გაატარა.

1737010914

კირ სტარმერი უკრაინაში გაემგზავრა

დიდი ბრიტანეთის პრემიერ-მინისტრი, კირ სტარმერი უკრაინაში გაემგზავრა. ინფორმაციას „გარდიანი“ ავრცელებს.სტარმერი შეხვედრას გამართავს უკრაინის პრეზიდენტ, ვოლოდიმირ ზელენსკისთან, რა დროსაც ხელს მოაწერენ „100-წლიანი პარტნიორობის“ შეთანხმებას.ამასთან, როგორც სტარმერის ოფისის მიერ გავრცელებულ განცხადებაშია აღნიშნული, ეს არის ისტორიული მნიშვნელობის შეთანხმება, რომელიც გააძლიერებს საზღვაო უსაფრთხოების სფეროში სამხედრო თანამშრომლობას, რათა მოხდეს ბალტიის, შავი და აზოვის ზღვების უსაფრთხოების გაძლიერება და მიმდინარე რუსული აგრესიის შეჩერება.

1737005144

რუსულმა ძალებმა დნიპროპეტროვსკის ოლქში ნიკოპოლის რეგიონი დაბომბეს - შედეგად დაიღუპა ქალი და დაშავდა 1 მამაკაცი

ომი გრძელდება უკრაინაში - საჰაერო განგაში ღამით რამდენიმე ოლქში, დრონების საფრთხის გამო ჩაირთო.რუსულმა ძალებმა დნიპროპეტროვსკის ოლქში ნიკოპოლის რეგიონი დაბომბეს, შედეგად დაიღუპა ქალი და დაშავდა 1 მამაკაცი, დაზიანდა საცხოვრებელი შენობები და ელექტროგადამცემი ხაზი.დაიბომბა სუმის ოლქის სასაზღვრო დასახლებებიც.რუსეთში კი ვორონეჟის ოლქში დრონებით იერიშის შემდეგ ნავთობსაცავი იწვის - ინფორმაციას ოლქის გუბერნატორი ავრცელებს.უკრაინის გენერალური შტაბის ინფორმაციით, ცხელ წერტილად ამ დრომდე რჩება პოკროვის მიმართულება.პარალელურად, რუსეთმა და უკრაინამ ტყვეები გაცვალეს. უკრაინული მხარე ავრცელებს ვიდეო-კადრებს, სადაც სამშობლოში დაბრუნებული ჯარისკაცები ჩანან. 25-25 სამხედრო ტყვის გაცვლა არაბთა გაერთიანებული საამიროების შუამავლობით შედგა.ვოლოდიმირ ზელენსკიმ გაწეული დახმარებისთვის შუამავალ ქვეყანას მადლობა გადაუხადა.აშშ-ის მომავალი ადმინისტრაციის სახელმწიფო მდივნის, მარკო რუბიოს თქმით, უკრაინაში ომის დასასრულებლად რუსეთსაც და უკრაინასაც დათმობაზე წასვლა დასჭირდებათ და "ეს რთული სამუშაო იქნება".

1736951700

ზელენსკიმ ტრამპთან მოახლოებული შეხვედრის წინ უსაფრთხოების სასურველი გარანტიები დაასახელა

უკრაინის პრეზიდენტმა, ვოლოდიმირ ზელენსკიმ დონალდ ტრამპთან მოახლოებული შეხვედრის წინ უსაფრთხოების სასურველი გარანტიები დაასახელა. ინფორმაციას ამის შესახებ უკრაინული მედია ავრცელებს.კერძოდ, სასურველ გარანტიებს შორის ვოლოდიმირ ზელენსკიმ დაასახელა ევროკავშირსა და ნატოში წევრობა, შეიარაღების სერიოზული პაკეტები და უკრაინის არმიის მხარდაჭერა, ასევე უკრაინის ტერიტორიაზე უცხო სახელმწიფოების სამხედრო კონტინგენტის განლაგება.მისი თქმით, ის მოელის, რომ აშშ-ის ახალი ადმინისტრაცია გააგრძელებს უკრაინის გაძლიერების პოლიტიკას.„ჩვენ გვინდა დავასრულოთ ომი სამართლიანი მშვიდობით, ამისთვის გვჭირდება ვიყოთ დარწმუნებულნი, რომ რუსეთი აღარ დაბრუნდება უკრაინის წინააღმდეგ ომით. ჩვენ გვჭირდება უსაფრთხოების ძლიერი გარანტიები“, - დასძინა უკრაინის პრეზიდენტმა.

1736950500

უკრაინის საგარეო საქმეთა მინისტრი: უკრაინა ნატოში გაწევრიანებას უსაფრთხოების ერთადერთ საიმედო გარანტიად მიიჩნევს

უკრაინის საგარეო საქმეთა მინისტრმა, ანდრიი სიბიგამ განაცხადა, რომ უკრაინა ნატოში გაწევრიანებას უსაფრთხოების ერთადერთ საიმედო გარანტიად მიიჩნევს.უკრაინის საგარეო უწყების ხელმძღვანელმა აღნიშნა, რომ კიევის პოზიცია ნატოში გაწევრიანების სურვილთან დაკავშირებით მტკიცეა.„უკრაინის ერთადერთი ეფექტური გარანტია ნატოში გაწევრიანებაა. უფრო მეტიც, უკრაინის გაწევრიანება არის ნატოს უსაფრთხოების გარანტია. მეტიც, უკრაინის სრულუფლებიანი წევრობა ნატოსთვის ასევე ყველაზე იაფი ვარიანტია ევროპის უსაფრთხოების უზრუნველსაყოფად“, - აღნიშნა ანდრიი სიბიგამ.

1736948232

ზელენსკი პოლონეთში ჩავიდა

უკრაინის პრეზიდენტი ვოლოდიმირ ზელენსკი პოლონეთში ჩავიდა. ინფორმაციას უკრაინული მედია ავრცელებს.ზელენსკი ვარშავაში პოლონეთის პრემიერ-მინისტრს დონალდ ტუსკს შეხვდა. მოლაპარაკებების ძირითადი თემა უკრაინაში ომი და ევროკავშირის მომავალი სამხედრო დახმარების გაგრძელება იყო.როგორც შეხვედრის შემდეგ გამართულ პრესკონფერენციაზე ზელენსკიმ განაცხადა, უკრაინის აღდგენის საკითხებისადმი მიძღვნილი მორიგი კონფერენცია 2026 წელს პოლონეთში ჩატარდება.მედიის ცნობით ლიდერებმა ასევე განიხილეს ვოლინის ტრაგედიის მსხვერპლთა ექსჰუმაციის საკითხიც. ზელენსკი ვარშავაში ასევე შეხვდება პოლონეთის პრეზიდენტს ანდჟეი დუდას.

1736947222

Reuters: ტრამპის მრჩევლები მიიჩნევენ, რომ უკრაინაში კონფლიქტის მოგვარებას თვეები დასჭირდება

აშშ-ის არჩეული პრეზიდენტის დონალდ ტრამპის მრჩევლები მიიჩნევენ, რომ უკრაინაში კონფლიქტის მოგვარებას თვეები, ან უფრო დიდი დრო დასჭირდება. ინფორმაციას Reuters-ი ავრცელებს.როგორც სააგენტო აღნიშნავს, ტრამპის ორი მრჩეველი, რომელიც არჩეულ პრეზიდენტთან უკრაინის კრიზისს განიხილავდა, დარწმუნდა, რომ პრობლემის მოგვარებას რამდენიმე თვე დასჭირდება, ვიდრე ერთი დღე, როგორც ამას ტრამპი მის წინასაარჩევნო კამპანიის დროს ამბობდა.მათი თქმით, ერთ დღეში კონფლიქტის მოგვარება გამოწვეული იყო კონფლიქტის არასათანადო შეფასებით.Reuters-ის მტკიცებით, ტრამპის სპეციალურმა წარმომადგენელმა უკრაინასა და რუსეთში, გადამდგარმა გენერალ-ლეიტენანტმა კიტ კელოგმა რამდენიმე დღის წინ Fox News-ის ეთერში განაცხადა, რომ მას სურს კონფლიქტის გადაწყვეტის გზები 100 დღეში იპოვოს.კელოგის მიერ დასახელებული თარიღიც კი „ძალიან, ძალიან ოპტიმისტურად“ ჟღერს ჯონ ჰერბსტისთვის, რომელიც აშშ-ის ყოფილი ელჩია უკრაინაში და ახლა ვაშინგტონში ატლანტიკურ საბჭოში მუშაობს.