„მაგთიკომი“ გაფიცულ თანამშრომლებთან დაკავშირებით განცხადებას ავრცელებს

„როცა კოვიდპანდემია დაიწყო, „მაგთიკომში“ ხელფასები მინიმუმ 10%-ით გაიზარდა და რეგიონის ინჟინერ-ტექნიკოსებს ხელფასები გაეზარდათ 23%-ით“, - ასე ეხმაურება კომპანია „მაგთიკომი“ საპროტესტო აქციას, რომელსაც კომპანიის თანამშრომლები ხელფასების მომატების მოთხოვნით მართავენ.

„მაგთიკომის თანამშრომლების გარკვეული ჯგუფი ითხოვს სამუშაო პირობების გადახედვას. მაქსიმალურად ვცდილობთ სიტუაციის განმუხტვას გონივრულობის ფარგლებში. მნიშვნელოვანია, რომ როდესაც კოვიდპანდემია დაიწყო, „მაგთიკომში“ ხელფასები მინიმუმ 10%-ით გაიზარდა და ეს შეეხო უკლებლივ ყველა თანამშრომელს. რეგიონის ინჟინერ-ტექნიკოსებს კი, ხელფასები გაეზარდათ 23%-ით.

„მაგთიკომში“ გარკვეულ ჯგუფებზე მოქმედებს საბონუსე სისტემა. ბონუსები მიიღეს იმ თანამშრომლებმაც, რომლებიც დღეს სამუშაო პირობების გადახედვას ითხოვენ. კოვიდპანდემიის პერიოდში კონკრეტულად ინჟინერ-ტექნიკოსების ჯგუფებზე „მაგთიკომის“ მიერ გაცემულმა ბონუსმა თითქმის 3 მილიონი ლარი შეადგინა.

აქვე გვინდა აღვნიშნოთ, რომ „მაგთიკომის“ ოპერირების ისტორიაში არ ყოფილა არცერთი პრეცედენტი იმისა, რომ თანამშრომელს ხელფასი დანიშნულ დღეს არ მიეღოს. „მაგთიკომი“ გადადგამს შესაბამის სამართლებრივ ნაბიჯებს სიტუაციის სამართლებრივ ჩარჩოებში დასაბრუნებლად”, - ნათქვამია კომპანიის განცხადებაში.