„გამარჯობა... წერტილი“ - ჯო ბაიდენი კიმ ჩენ ინს ბირთვულ იარაღზე საუბრისას მიესალმა

აშშ-ს პრეზიდენტ ჯო ბაიდენმა იაპონიაში გამგზავრებამდე სამხეთ კორეის დედაქალაქ სეულიდან ჩრდილოეთ კორეის კიმ ჩენ ინს მარტივი გზავნილით მიმართა: „გამარჯობა... წერტილი“.

ბაიდენმა თქვა, რომ ჩრდილოეთ კორეის ახალი ბალისტიკური რაკეტების სატესტო ცდები „არ აშფოთებს“, ვინაიდან აშშ ჩრდილოეთ კორეის ნებისმიერი ნაბიჯისთვის მზად არის.

„ჩვენ მზად ვართ ყველაფრისთვის, რასაც ჩრდილოეთ კორეა გააკეთებს“, - განაცხადა ბაიდენმა.

21 მაისს ჯო ბაიდენი და მისი სამხრეთ კორეელი კოლეგა, პრეზიდენტი იუნ სუკ იოლი აშშ-სა და სამხრეთ კორეას შორის სამხედრო თანამშრომლობის გაღრმავებასა და აქტიური სამხედრო წვრთნების წარმართვაზე შეთანხმდნენ. ასევე, საჭიროების შემთხვევაში ჩრდილოეთ კორეისთვის საპასუხოდ, ქვეყნებმა რეგიონში ამერიკული ბირთვული იარაღის შესაძლო განთავსების საკითხზე ისაუბრეს.