Euphoria-ს მესამე სეზონის გადაღებები 2025 წლის იანვარში დაიწყება

დიდი ხანია, სერიალების მოყვარულები HBO-ს ცნობილი შოუს, Euphoria-ს ახალ, მესამე სეზონს ელოდებიან. სერიალის მეორე სეზონი 2022 წლის იანვარში გამოვიდა. მას შემდეგ ახალი ეპიზოდების გადაღებები რამდენჯერმე გადაიდო. საერთაშორისო პრესაში გავრცელდა ისიც, რომ HBO სერიალის დახურვას გეგმავდა.

ამჯერად უკვე ოფიციალურად დადასტურებულია, რომ HBO შოუს აგრძელებს და ახალი სეზონის გადაღებები 2025 წლის იანვარში დაიწყება. ცნობილია ისიც, რომ მე-3 სეზონი 8 სერიას გააერთიანებს.

„ჩვენ გავეცანით სცენარს. გვიხარია, რომ წინ მივდივართ. ყველა მსახიობი შოუს შემადგენლობაში რჩება,” – აღნიშნა HBO-ს აღმასრულებელმა დირექტორმა, ქეისი ბლოისმა პრეს კონფერენციაზე.

 Euphoria-ს მაყურებელმა პირველად 2019 წელს იხილა. სერიალი საშუალო კლასის წარმომადგენელი ამერიკელი თინეიჯერების ცხოვრების შესახებ გვიყვება. სიუჟეტი ფოკუსირებულია ისეთ საკითხებზე, როგორიც არის: ნარკოდამოკიდებულება, სექსუალური ორიენტაცია, ბულინგი, მენტალური აშლილობები და ასე შემდეგ.შოუს რეჟისორი სემ ლევინსონია. სერიალმა ჰოლივუდის ახალი თაობის არაერთი მსახიობის წარმატება განაპირობა. მათ შორის არის: ზენდეია, სიდნი სვინი, ჯეიკობ ელორდი და ჰანტერ შაფერი.