„მარტო გამარჯობას იძახდა და გარეთ არ გამოდიოდა...“ - თავდამსხმელის ახლობელი

6 დაღუპული და 5 დაშვებული - უმძიმესი ღამე საგარეჯოში. რუსთაველისა და კოსტავას ქუჩების კვეთაზე მდებარე საცხოვრებელი კორპუსის აივნიდან სროლა ღამის პირველი საათისთვის დაიწყო.

თავდამსხმელმა, ყოფილმა სამხედრომ ცეცხლი რამდენიმე მხრიდან გახსნა. დაღუპულთა შორის არის საპატრულო პოლიციის თანამშრომელი. კრიტიკულია ერთ-ერთი დაშავებულის მდგომარეობა. მის გადარჩენას ექიმები ამ წუთებში ცდილობენ. რაც შეეხება, თავდამსხმელს - სპეცოპერაციის დაწყებიდან მალევე მან თავი მოიკლა.

სროლის შედეგად მოკლულთა ცხედრები ექსპერტიზის ბიუროში გადაასვენეს - მათ შორის არის თავად ყოფილი სამხედროც, რომელმაც მეზობლებს, ადგილზე მისულ ექიმებსა და პოლიციას ცეცხლი გაუხსნა.

ირკვევა, რომ თავდამსხმელი სოფელ მანავიდან იყო, სადაც მისი საცხოვრებელი სახლი 5 წლის წინ გაყიდა და საგარეჯოში გადავიდა. მანავიდან ჩამოსული მისი ახლობლები „კურიერთან“ ამბობენ, რომ ის ყოველთვის კარჩაკეტილი ცხოვრებით ცხოვრობდა და ფაქტობრივად მათ არასდროს ეკონტაქტებოდა.

"ბავშვობიდან რაღაცები ახასიათებდა, მარტო გამარჯობას იძახდა და გარეთ არ გამოდიოდა. არავისთან ურთიერთობა არ ჰქონდა," - ამბობს ერთ-ერთი ახლობელი.

ადგილობრივების თქმით, ახალგაზრდები მეზობლების გადარჩენას ცდილობდნენ და  დაჭრილებს ეფარებოდნენ, თუმცა თავდამსხმელი პერიოდულად ხსნიდა ცეცხლს და არ აძლევდა მოქალაქეებს ადამიანების გადარჩენის საშუალებას. მოტივთან დაკავშირებით მათ საუბარი უჭირთ.