როგორ მოქმედებს ცილებით მდიდარი საკვები ჩვენს ჯანმრთელობაზე

ცილის მიღება უმთავრესი მიზანია ფიტნესში. თუ გსურთ გაზარდოთ კუნთები, გაძლიერდეთ ფიზიკურად, აკონტროლოთ წონა, ზოგადი რჩევა ხშირად ცილების მიღების საჭიროებამდე დადის.

შესაბამისად, სულ უფრო და უფრო მოთხოვნადი ხდება ისეთი პროდუქტები, რომლებიც კონკრეტულად ცილების შემცველობის გამო იყიდება. ამ ყველაფრის ფონზე ჩვენი ენთუზიაზმი ცილებისადმი შეიძლება ძალიან შორს წავიდეს. ცილები ნამდვილად მნიშვნელოვანია ჯანმრთელობისთვის, მაგრამ ზოგ ჩვენგანს კვების რაციონში ცილების ასეთი მაღალი შემცველობა არ სჭირდება.

მთლიანობაში, ამან შეიძლება ე.წ. "ჰალოს ეფექტი" გამოიწვიოს — როდესაც ადამიანები ცილის ძალიან მაღალ შემცველობას საერთო კვებით ღირებულებასთან აიგივებენ. ჩნდება აღქმა, რომ ცილებით მდიდარი საკვები არსებითად ნოყიერია, მიუხედავად იმისა, რომ ნაწილი მათგანი სულაც არაა ასეთი.

ზოგადად, ცილა ფუნდამენტია კუნთოვანი მასისა და იმუნური ფუნქციის შესანარჩუნებლად. ექსპერტების ნაწილი ადამიანებს ურჩევს, რომ დაახლოებით 0.75 გრამი ცილა მიიღონ სხეულის ყოველ კილოგრამზე. არის სხვა ვერსიებიც, რის მიხედვითაც, ეს მაჩვენებელი ყოველ კილოგრამზე 1.2-დან 1.6 გრამამდე უნდა იყოს.

ასევე არსებობს მტკიცებულება, რომ საჭირო ცილების რაოდენობა ცვალებადია და დამოკიდებულია ჩვენს ჯანმრთელობაზე. მაგალითად, როდესაც ადამიანი დაავადებისგან გამოჯანმრთელების პროცესშია, მას მეტი ცილა სჭირდება. რაც შეეხება ხანდაზმულებს, კუნთის მასის არ დასაკარგად, მათ სხეულის თითო კილოგრამზე სულ მცირე 1.2 გრამი ცილა უნდა მიიღონ.

სპორტსმენების შემთხვევაში, მათ კიდევ უფრო დიდი რაოდენობით ცილის მიღება ესაჭიროებათ. წონის დაკლების დროსაც, საჭიროა დიდი რაოდენობით ცილის მიღება, რათა თავიდან ავიცილოთ კუნთის მასის დაკარგვა.

მეორე მხრივ, ეს სულაც არ ნიშნავს იმას, რომ რაც მეტ ცილას მივიღებთ უკეთესია. კვლევების თანახმად, როდესაც ძალიან დიდი რაოდენობით ცილას მოვიხმართ, სხეული მის მხოლოდ ნაწილს იყენებს.

არსებობენ ფიტნეს-ინფლუენსერები, რომლებიც სხეულის ყოველ კილოგრამზე 3 გრამი ცილას მიღებას უწევენ რეკომენდაციას.

მიუხედავად ამისა, უფრო მნიშვნელოვანია რა ხარისხის ცილას მოვიხმართ და რამდენად დაყოფილად ხდება ეს. მაგალითად, ადამიანმა შეიძლება ერთ ჭამაზე მიიღოს 60 გრამი ცილა, ან ის ორ ჭამაზე დაყოს. ბოლო კვლევების თანახმად, ერთ ჯერზე ცილების შედარებით მცირე რაოდენობით მიღება ჯობია. ეს ნიშნავს, რომ თითო ჭამაზე 20-30 გრამი ცილას მიღება იდეალური გამოსავალია.

რაც შეეხება ცილის წყაროს, მას ნედლი საკვებიდან უნდა ვიღებდეთ (თხილეული, რძე, კვერცხი, პარკოსნები), მაგრამ არსებობს საკვებ დანამატებიც, რომლებიც საქმეს გვიადვილებს.

ულტრა დამუშავებული პროდუქტები
სუპერმარკეტები სავსეა ცილებით გამდიდრებული პროდუქტებით. მეორე მხრივ, ეს პროდუქტები შეიძლება შეიცავდეს დამატებით შაქარსა და ნახშირწყლებს. მაგალითად, ცილით მდიდარი რძე ხშირად ორჯერ მეტ ცილას შეიცავს, ვიდრე ჩვეულებრივი რძე. ამისათვის, ამ პროდუქტს გამოცლილი აქვს წყალი და დამატებულია მშრალი რძე.

პროტეინის ბარები (შოკოლადები) კიდევ ერთი ასეთი მაგალითია. ეს პროდუქტებიც დამატებით შემცველობასთან ერთად, ასევე შეიძლება შეიცავდეს შაქარს.

ცილებით გამდიდრებული პროდუქტების კიდევ ერთი მახასიათებელი ისაა, რომ ისინი შეიძლება ულტრადამუშავებული საკვების კატეგორიას მივაკუთვნოთ. ეს არის კომერციულად დამზადებული პროდუქტები, რომლებიც შეიცავს ისეთ ინგრედიენტებს, რომელთაც ვერ იპოვით ტრადიციულ სამზარეულოში.

კვლევების თანახმად, ასეთი საკვები შეიძლება დაკავშირებული იყოს გულ-სისხლძარღვთა დაავადებებთან და დიაბეტთან. მეცნიერებმა ჯერ ზუსტად არ იციან, ეს უარყოფითი გავლენა ჯანმრთელობაზე დაკავშირებულია ულტრა დამუშავებასთან, ამ საკვების მწირი კვებით ღირებულებასთან, თუ ორივესთან ერთად.

არის კიდევ ერთი პრობლემა, ასეთ საკვებს შეიძლება აკლდეს ბოჭკო, ვიტამინები და სხვა ძირითადი ელემენტები.

შეგვიძლია ვთქვათ, რომ ცილის ნაკლებობა ორგანიზმისთვის ცუდია, თუ თქვენ ფიზიკურად აქტიური ხართ (ვარჯიშობთ), მეტი ცილა გჭირდებათ, მაგრამ აქცენტის მხოლოდ ცილაზე გაკეთება არასწორია. ისევე როგორც ვარჯიშისთვის, ასევე ზოგადად ჯანმრთელობისთვის აუცილებელია, რომ საკვები იყოს მრავალფეროვანი, დაბალანსდეს როგორც ჯანმრთელი ნახშირწყლები, ისე ცხიმები.

დაბოლოს, უნდა ვიზრუნოთ იმაზე, რომ ცილა მაქსიმალურად სხვადასხვა საკვებიდან მივიღოთ და არ ვკონცენტრირდეთ რომელიმე ერთ წყაროზე. წყარო