ვახტანგ ცინცაძე: საქართველოს აქვს გლობალურად ერთ-ერთი ყველაზე მიმზიდველი ბიზნეს და საინვესტიციო გარემო

საქართველოს აქვს გლობალურად ერთ-ერთი ყველაზე მიმზიდველი ბიზნეს და საინვესტიციო გარემო, – ამის შესახებ ეკონომიკისა და მდგრადი განვითარების მინისტრის მოადგილემ, ვახტანგ ცინცაძემ ჩენდლერის ინსტიტუტის 2026 წლის ანგარიშთან დაკავშირებით განაცხადა.

რეიტინგის მიხედვით, კერძო სექტორის განმავითარებელი მმართველობით, საქართველოს მთავრობა ევროპის საუკეთესო ოცეულშია.

ვახტანგ ცინცაძის განმარტებით, ერთი მხრივ, ეს განპირობებულია იმ სწორი ეკონომიკური პოლიტიკით, რასაც საქართველოს მთავრობა ატარებს, მეორე მხრივ, იმ მიმზიდველი რეგულირების ჩარჩოთი, რაც ქვეყანაში მოქმედებს და ხელს უწყობს როგორც ინვესტიციების შემოდინებას, ასევე ადგილობრივი წარმოების განვითარებას და კერძო სექტორის სწრაფ გაფართოებას.

„უნდა აღინიშნოს, რომ ქვეყანაში არის მინიმალური ბიუროკრატია, ქვეყანას აქვს ერთ-ერთი ყველაზე დაბალი საგადასახადო ტვირთი და ზოგადად ეფექტიანი მარეგულირებელი ჩარჩო. რა თქმა უნდა, ყოველივე ზემოაღნიშნული გავლენას ახდენს ბიზნეს სექტორის შედეგებზე და შედეგებიც საკმაოდ შთამბეჭდავია. რეკორდულია, ფაქტობრივად, ბიზნეს სექტორი ყველა მიმართულებით როგორც გამოშვების, ისე ბრუნვის მაჩვენებლებით. გლობალურად ქვეყანას აქვს ერთ-ერთი ყველაზე მაღალი ეკონომიკური ზრდის მაჩვენებლები. ბოლო 5 წლის განმავლობაში საშუალო ეკონომიკური ზრდა 9.3%-ს შეადგენს. ყოველივე ზემოაღნიშნული ასევე გავლენას ახდენს ახალი სამუშაო ადგილების შექმნაზე და ზოგადად ქვეყნის ეკონომიკის სწრაფ განვითარებაზე“, – აღნიშნა ვახტანგ ცინცაძემ.

გამოქვეყნებული ანგარიშის მიხედვით, კერძო სექტორის მხარდამჭერი მმართველობით საქართველოს მთავრობამ მაღალი შეფასება მიიღო, მსოფლიოში 31-ე ადგილზე გავიდა და ევროპის საუკეთესო ოცეულში მოხვდა. საქართველო უსწრებს ევროკავშირის კანდიდატ ყველა ქვეყანას, ევროკავშირის და ნატო-ს წევრ 17 სახელმწიფოს.

ინფორმაციას ეკონომიკისა და მდგრადი განვითარების სამინისტრო ავრცელებს.