უკრაინას სჭირდება მშვიდობა ძალის მეშვეობით, ევროპას სურს მშვიდობა ძალის მეშვეობით, უკრაინას უნდა მიეცეს მყარი უსაფრთხოების გარანტიები - ურსულა ფონ დერ ლაიენი

უკრაინას სჭირდება მშვიდობა ძალის მეშვეობით, ევროპას სურს მშვიდობა ძალის მეშვეობით, უკრაინას უნდა მიეცეს მყარი უსაფრთხოების გარანტიები, – ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.

მისივე თქმით, წარუმატებელი უკრაინა დაასუსტებდა ევროპას, მაგრამ ის ასევე დაასუსტებს შეერთებულ შტატებს.

„მზად ვართ ვიპოვოთ შეთანხმებები, რომლებიც ყველასთვის მუშაობს, ვითანამშრომლოთ, რომ ერთმანეთი უფრო წარმატებული და უსაფრთხო გავხადოთ. ამის გულში, რა თქმა უნდა, არის უკრაინის, ჩვენი კონტინენტისა და უფრო ფართო მსოფლიოს თავდაცვა და უსაფრთხოება. ამ დარბაზში ყველას გვესმის, რა დევს სასწორზე, ეს ისტორიული მომენტია. კიდევ უფრო დიდი გამოწვევები იკვეთება. ბოლო დღეებში ბევრი საუბარი იყო, მაგრამ ყოველთვის სასარგებლოა, სიტყვების მიღმა შევხედოთ და ვაღიაროთ, რომ ჩვენ მხოლოდ ამ პროცესის დასაწყისში ვართ. მოდით, შევაფასოთ საწყისი პოზიციები, შევადაროთ პრეზიდენტ ზელენსკის მიდგომა პრეზიდენტ პუტინის მიდგომას. ყველაზე რთულ გარემოებებში პრეზიდენტი ზელენსკი მზადაა იმუშაოს მშვიდობისკენ, რომელიც პატივს სცემს მისი ქვეყნისა და დაღუპული თანამემამულეების მსხვერპლს. როგორც ვოლოდიმირ ზელენსკიმ თავიდანვე თქვა, უკრაინას ყველაზე მეტად სურს მშვიდობა. ისეთი, რომელიც სამართლიანი და მდგრადია, რათა ბოლო წლების საშინელებები აღარასდროს განმეორდეს. მეორე მხრივ, პრეზიდენტი პუტინი ამბობს, რომ მზადაა შეხვედრისთვის, მაგრამ რა პირობებით? პუტინის საქმეა აჩვენოს, რომ მისი ინტერესი არ არის ამ ომის გახანგრძლივება; მისი საქმეა აჩვენოს, რომ უარი თქვა უკრაინის განადგურების ამბიციაზე. ნება მიბოძეთ ძალიან მკაფიო ვიყო, წარუმატებელი უკრაინა დაასუსტებდა ევროპას, მაგრამ ის ასევე დაასუსტებს შეერთებულ შტატებს. ეს გააძლიერებს გამოწვევებს ინდო-წყნარ ოკეანეში და საფრთხეს შეუქმნის ჩვენს საერთო ინტერესებს. რაც ჩვენ ვნახეთ არის ის, რომ მსოფლიოს ავტორიტარები ყურადღებით აკვირდებიან, არის თუ არა რაიმე დაუსჯელობა, თუ შენს მეზობელს დაიპყრობ და საერთაშორისო საზღვრებს დაარღვევ. ან არსებობს თუ არა რეალური შემაკავებელი ფაქტორები. ისინი გვაკვირდებიან, რა ქმედებებს ვირჩევთ. სწორედ ამიტომაა ასე მნიშვნელოვანი, რომ ეს სწორად გავაკეთოთ.

უკრაინას სჭირდება მშვიდობა ძალის მეშვეობით. ევროპას სურს მშვიდობა ძალის მეშვეობით. როგორც პრეზიდენტმა ტრამპმა ნათლად განაცხადა, შეერთებული შტატები მტკიცედ არის ერთგული მშვიდობისა ძალის მეშვეობით. ასე რომ, მჯერა, ერთად მუშაობით ჩვენ შეგვიძლია, მივაღწიოთ ამ სამართლიან და მდგრად მშვიდობას. ევროპამ უკვე ბევრი რამ შეიტანა მაგიდაზე, ისტორიული ოდენობები. ფინანსურად და სამხედრო თვალსაზრისით საერთო მხარდაჭერა 134 მილიარდ ევროს შეადგენს. ეს უფრო მეტია, ვიდრე ვინმეს შეუტანია. ეს მოიცავს 52 მილიარდ დოლარს სამხედრო დახმარებაში, აშშ-ის თანაბრად. ჩვენ დავაწესეთ მძიმე სანქციები, რომლებმაც მნიშვნელოვნად დაასუსტა რუსეთის ეკონომიკა. ჩვენ ტაბუ ერთიმეორის მიყოლებით დავარღვიეთ და დავამსხვრიეთ ჩვენი დამოკიდებულება რუსულ გაზზე, რამაც სამუდამოდ უფრო მედეგი გაგვხადა. ჩვენ მზად ვართ მეტი გავაკეთოთ. ჩვენ ვმუშაობთ უკრაინასთან მათ ევროკავშირში გაწევრიანებაზე, რადგან უკრაინა ჩვენი ევროპული ოჯახის ნაწილია, აქ არის მათი მომავალი“, – აღნიშნა ფონ დერ ლაიენმა.

როგორც ევროკომისიის პრეზიდენტმა აღნიშნა, საქმე როდესაც ევროპის უსაფრთხოებას ეხება, ევროპამ მეტი უნდა გაიღოს და საჭიროა ევროპული თავდაცვის დაფინანსების მკვეთრი ზრდა.

„ეს მიმიყვანს იმ განხილვებთან, რომლებიც ევროპაში ბოლო რამდენიმე კვირის განმავლობაში გვქონდა. ევროპის უსაფრთხოების წრეებში ბევრი დაბნეული იყო, ზოგიერთი კი შეშფოთებული აშშ-ს მაღალჩინოსნების მიერ ამ კვირაში გაკეთებული კომენტარებით. თუმცა აქ გულწრფელები უნდა ვიყოთ და თავი უნდა ავარიდოთ აღშფოთებასა და პროტესტს. თუ ჩავუღრმავდებით ნათქვამის არსს, არა მხოლოდ გავიგებთ საიდან მოდის ეს, არამედ ვაღიარებთ, რომ არის გარკვეული მოსაზრებები, რომლებსაც შეგვიძლია დავეთანხმოთ. დიახ, როგორც ევროკავშირს, ისე აშშ-ს სურს სისხლისღვრის დასრულება. ჩვენ გვსურს სამართლიანი და ხანგრძლივი მშვიდობა, რომელიც მიგვიყვანს სუვერენულ და აყვავებულ უკრაინამდე. უკრაინას უნდა მიეცეს მყარი უსაფრთხოების გარანტიები, მაგრამ ალბათ ყველაზე მეტად ის მხვდება გულზე, რომ ევროპამ არა მხოლოდ გულწრფელად უნდა ისაუბროს, არამედ შესაბამისად უნდა იმოქმედოს კიდეც. ამიტომ, არ დავტოვოთ ადგილი რაიმე ეჭვისთვის. მჯერა, რომ როდესაც საქმე ევროპის უსაფრთხოებას ეხება, ევროპამ მეტი უნდა გააკეთოს. ევროპამ მეტი უნდა გაიღოს და ამის მისაღწევად, საჭიროა ევროპული თავდაცვის დაფინანსების მკვეთრი ზრდა. ამჟამად ევროკავშირის 27 ქვეყანა მშპ-ს დაახლოებით 2%-ს ხარჯავს თავდაცვაზე. ჩვენი თავდაცვის ხარჯები ომამდელი 200 მილიარდ ევროზე მეტიდან გასულ წელს 320 მილიარდ ევრომდე გაიზარდა. ეს რიცხვი კიდევ ერთხელ მნიშვნელოვნად უნდა გავზარდოთ, რადგან 2%-ზე ნაკლებიდან 3%-ზე მეტამდე გაზრდა ყოველწლიურად ასობით მილიარდით მეტ ინვესტიციას ნიშნავს. გვჭირდება გაბედული მიდგომა“, – განაცხადა ფონ დერ ლაიენმა.