ფინეთის პრეზიდენტი: მზად უნდა ვიყოთ იმისთვის, რომ საბოლოო სამშვიდობო შეთანხმების გარკვეული ნაწილები შესაძლოა არ შეესაბამებოდეს სამართლიანობის ჩვენს აღქმას

ფინეთის პრეზიდენტმა, ალექსანდრ სტუბმა საახალწლო მიმართვაში განაცხადა, რომ უკრაინასა და რუსეთს შორის სამშვიდობო შეთანხმება, სავარაუდოდ, ყველაფერში სამართლიანი არ იქნება.

„უკვე თითქმის ოთხი წელია, რაც რუსეთი უკრაინაში აგრესიულ ომს აწარმოებს. მისი ქმედებები უკანონო და ამორალურია. ომის შედეგად, მილიონზე მეტი ადამიანი დაიღუპა ან დაშავდა. გასული წლის განმავლობაში, უკრაინასთან და ჩვენს მოკავშირეებთან ერთად, ჩვენ დაუღალავად ვმუშაობდით მშვიდობის მისაღწევად. ახლა ჩვენ უფრო ახლოს ვართ მშვიდობასთან, ვიდრე ომის ნებისმიერ სხვა ეტაპზე. ამავდროულად, ჩვენ არ შეგვიძლია ვიყოთ დარწმუნებულნი, რომ რუსეთი მშვიდობისთვის მზადაა. მშვიდობა ხშირად კომპრომისია. ჩვენ მზად უნდა ვიყოთ იმისთვის, რომ საბოლოო სამშვიდობო შეთანხმების გარკვეული ნაწილები შესაძლოა არ შეესაბამებოდეს სამართლიანობის ჩვენს აღქმას“, - აღნიშნა ალექსანდრ სტუბმა.

მისი თქმით, „თუმცა, ჩვენ ყველაფერს გავაკეთებთ, რაც ჩვენს ძალებშია, რათა უზრუნველვყოთ უკრაინის დამოუკიდებლობის, სუვერენიტეტისა და ტერიტორიული მთლიანობის შენარჩუნება“.

„ჩვენ გავაგრძელებთ უკრაინის მხარდაჭერას. კვლავაც გავაგრძელებთ გამოსავლის ძიებას. ჩვენს მოკავშირეებთან ერთად, ჩვენ უზრუნველვყოფთ იმას, რომ რუსეთი საკუთარ მეზობლებზე თავდასხმას ვეღარასდროს გაბედავს“, - დასძინა მან.