„მეგობარი გოგო სათამაშოს გამო მოკლა... ახლა სასჯელს უვადოდ იხდის“ - რეალური ისტორია, რომელმაც ბრიტანეთი შეძრა

ჰასან სენტამუ 2006 წელს უგანდაში დაიბადა და ბავშვობიდანვე ოჯახური ძალადობის მსხვერპლი იყო. მამა არა მხოლოდ მას, არამედ დედასაც სცემდა.

დედა ლონდონში გაიქცა, რათა მოძალადე ქმრისგან თავი დაეღწია. მაგრამ ბრიტანეთის დედაქალაქში ცხოვრება ისე რთული აღმოჩნდა, რომ შვილთან ერთად თავს ვერ ირჩენდა. როცა ბავშვი 11 წლის გახდა, უგანდაში დააბრუნა და სკოლა-ინტერნატში მიაბარა.

თუმცა, იქაც არაერთი პრობლემის წინაშე დადგა – მასზე ისევ ძალადობდნენ, რეგულარულად სცემდნენ, რის გამოც დედა იძულებული გახდა, კვლავ წაეყვანა ლონდონში.

ვინაიდან ბავშვი ბინაში ხშირად მარტო იყო, ის სოცმუშაკების ყურადღების ცენტრი მოექცა და მალევე მეურვეების ოჯახში გადაიყვანეს, სადაც მან აგრესია გამოავლინა.

ჰასან სენტამუსთვის, სკოლაში ყოფნა განსაკუთრებით რთული აღმოჩნდა. მას ქცევისა და სწავლის სერიოზული პრობლემები ჰქონდა – ხშირად ჩხუბობდა, ცუდად სწავლობდა, სკანდალებს აწყობდა და ვერ აკონტროლებდა გაბრაზების შეტევებს. 

მასწავლებლებმა სენტამუ ფსიქიატრთან გაგზავნეს, რომელმაც მას აუტისტური სპექტრის აშლილობა (ΑΣΑ) დაუდგინა. მას თერაპია დაუნიშნეს და კვირაში სამჯერ ექიმთან ვიზიტი, თუმცა მკურნალობამ განსაკუთრებული შედეგი ვერ გამოიღო.

მკვლელობა, რომელმაც ბრიტანეთი შეძრა

2023 წლის ივნისში 17 წლის სენტამუს ურთიერთობა დაიწყო თანაკლასელ გოგონასთან, თუმცა სამ თვეში დაშორდნენ. დაშორების მიზეზი ისევ ჰასანის მძიმე ხასიათი გახდა.

სექტემბერში წყვილმა შეხვედრა დაგეგმა, რათა ერთმანეთისთვის ნაჩუქარი ნივთები დაებრუნებინათ. გოგონამ უსაფრთხოების მიზნით თან მეგობარი, 15 წლის ელიანა ანდამი წაიყვანა.

შეხვედრა ლონდონის კროიდონის ცენტრში შედგა. საუბარი მალევე დაიძაბა – ჰასანი არ აპირებდა თავისი ნივთების, მათ შორის, სათამაშო დათვის დაბრუნებას. მაშინ ელიანამ მას ჩანთა გამოსტაცა და გაქცევა სცადა. სენტამუ გაცოფდა, დანა ამოიღო, გოგონას დაეწია და ზურგში სასიკვდილო ჭრილობა მიაყენა. 

პოლიციამ ის მალევე დააკავა. 2025 წლის მარტში ლონდონის სასამართლომ ჰასან სენტამუს უვადო პატიმრობა მიუსაჯა.