უკრაინული ბორშჩი ბევრი ჭარხლითა და ლობიოთი - გურამ ბაღდოშვილის რეცეპტით

უკრაინული სამზარეულო ჩვენთვის კარგად არის ნაცნობი და ქართველებს ძალიანაც გვიყვარს. მათ შორის გამორჩეულია: კიევური კოტლეტი, პელმენები არაჟნით, ღორის ლორი კიტრის მწნილით, სირნიკები, პამპუშკა (დონატი), სხვადასხვანაირი ვარენიკები, წამყვან ადგილზეა - ალუბლის ვარენიკი... თუმცა უკრაინული სამზარეულოს სათავეში, მაინც სისხლივით წითელი ბორშჩია.

შეფ-მზარეული გურამ ბაღდოშვილი, "პრაიმტაიმის" მკითხველს, უკრაინული წვნიანის რეცეპტს უზიარებს.

გურამ ბაღდოშვილი: უკრაინული ბორშჩი აუცილებლად მზადდება ძმრით, შაქრით, ბევრი ჭარხლითა და მჟავე კომბოსტოთი. შეგიძლიათ ცოცხალი კომბოსტოთი მომზადებაც. მთავარია, რომ მუქი სისხლისფერი უნდა იყოს. ამისთვის კი რამდენიმე, დაახლოებით ხუთი-ექვსი თავი ჭარხალი უნდა გახეხოთ. რაც უფრო დამჭკნარია ჭარხალი, მით მეტად აქვს შენარჩუნებული ტანინი.

გახეხილ ჭარხალს ვათავსებთ ზეთიან ტაფაზე, ვასხამთ ნახევარ ჭიქა ძმარს, ვაყრით სამ სუფრის კოვზ შაქარს და ძალიან დაბალ ცეცხლზე ვთუშავთ. (ეს არის ხუთი ლიტრი ბორშჩის პროპორციები)

მოვხარშავთ საქონლის ხორცს (უნდა იყოს გულმკრედის ძვლოვან-ხრტილოვანი ხორცი). ხორცი რომ უკვე თითქმის მოხარშულია, ქვაბში ვყრით ორ ჭიქა წითელ ლობიოს და ვხარშავთ. ლობიოს შეგიძლიათ მანამდე ცხელი წყალი დაასხათ. დაარბილებს მარცვალს და ხარშვისას არ ჩაიშლება. შემდეგ ქვაბში დაჭრილი კომბოსტო და კარტოფილი ჩაყარეთ. თუ მჟავე კომბოსტოთი აკეთებთ, ბოლოს ყრით მჟავეს. 

სტაფილოს და ხახვს მოვთუშავთ ერთი სუფრის კოვზ ტომატ-პასტაში. როცა კომბოსტო (თუ ცოცხალით აკეთებთ) და კარტოფილი მოიხარშება, მოთუშულ სტაფილოს და ხახვს ჩაუშვებთ ქვაბში. ვადუღებთ ათი წუთი. გამორთვის შემდეგ ვაყრით მოთუშულ ჭარხალს, კარგად მოვურევთ. წამოდუღება აღარ უნდა. ბოლოს დაჭრილი კამა, ოხრახუში... დაღერღილი წიწაკა და მარილი გემოვნებით.

გამოდის მუქი წითელი.

ბოსტნეული უნდა ხრაშუნობდეს, არ უნდა იყოს ჩახარშული, რადგან ამ წვნიანის დანიშნულება ბოსტნეულების ვიტანების კრებულია.