რომეო ბექჰემი ინგლისის პრემიერ-ლიგის კლუბს შეუერთდა

ლეგენდარული ინგლისელი ფეხბურთელის, დევიდ ბექჰემის ვაჟი, რომეო ინგლისის პრემიერ-ლიგის კლუბის „ბრენტფორდის“ სარეზერვო გუნდს შეუერთდა. ამის შესახებ CNN-ი იტყობინება.

ტელეარხის ცნობით, 20 წლის ფეხბურთელი კლუბში იჯარით, „ინტერ მაიამიდან“ გადავიდა. ის ინგლისში სეზონის დასრულებამდე ითამაშებს.

„ძალიან მეამაყება და ბედნიერი ვარ აქ ყოფნით“, - განუცხადა 20 წლის ნახევარმცველმა „ბრენტფორდის“ ოფიციალურ ვებგვერდს.

რომეო ბექჰემი 2002 წელს, ლონდონში დაიბადა. ფეხბურთით 2014 წელს დაინტერესდა, თუმცა მალევე ყურადღება ჩოგბურთზე გადაიტანა. მაგრამ 5-წლიანი პაუზის შემდეგ კორტებიდან საფეხბურთო მოედანზე დაბრუნდა. 2021 წელს რომეომ მამის კლუბთან - „ინტერ მაიამისთან“ გააფორმა კონტრაქტი, სადაც ასევე სარეზერვო გუნდში თამაშობდა.