„ნაპოლიში“ სერიოზული კონფლიქტი წარმოიშვა - ოსიმენი კლუბისგან ბოდიშს ელოდება და შესაძლოა, უჩივლოს

„ნაპოლის“ ფორვარდმა, ვიქტორ ოსიმენმა სოციალურ ქსელებში კლუბის პრესსამსახურის მოქმედებებით  უკმაყოფილება გამოთქვა.

როგორც იტალიელი ჟურნალისტი ნიკოლო სკირა წერს, ნიგერიელი ოფიციალურ ბოდიშს ელოდება კლუბისგან იმ ვიდეოს გამო, რომელიც TikTok-ში ნეაპოლელთა ოფიციალურ გვერდზე გამოქვეყნდა.

„ნაპოლის“ პრესსამსახურმა დაამონტაჟა ვიდეო, რომელშიც ოსიმენი ბავშვის ხმით სთხოვს მსაჯს 11-მეტრიანის დანიშვნას და შემდეგ აცილებს პენალტს.

„ის, რაც დღეს მოხდა TikTok-ში კლუბის ოფიციალურ გვერდზე, მიუღებელია. ეს ძალიან სერიოზულ ზიანს აყენებს მოთამაშეს. ჩვენ ვიტოვებთ უფლებას იურიდიული მოქმედებებისთვის ვიქტორის დასაცავად“, – მოჰყავს ოსიმენის აგენტის სიტყვები სკირას.  

აღსანიშნავია, რომ ფეხბურთელმა „ინსტაგრამიდან“ ყველა ფოტო წაშალა, სადაც კლუბის მაისურით იყო.