მადლობა ჩვენს საამაყო ნაკრებს შესანიშნავი თამაშისთვის! ეს გამარჯვება კიდევ ერთხელ ადასტურებს ჩვენი გუნდის სიძლიერესა და თავდადებას - მიხეილ ყაველაშვილი

გილოცავთ! საქართველოს ეროვნულმა ნაკრებმა სომხეთის ნაკრები განმეორებით შეხვედრაში ანგარიშით 6:1 დაამარცხა - ორმატჩიან დაპირისპირებაში გამარჯვების შედეგად, ჯვაროსნები ერთა ლიგის 2026-2027 წლების სეზონზე B ლიგაში გააგრძელებენ ასპარეზობას, - წერს საქართველოს პრეზიდენტი სოციალურ ქსელში.

„საქართველოს პრემიერ-მინისტრ ირაკლი კობახიძესთან და სომხეთის პრემიერ-მინისტრ ნიკოლ ფაშინიანთან ერთად, „დინამო არენაზე“ საქართველოსა და სომხეთის ეროვნული ნაკრებების მატჩს დავესწარი და ჩვენს ბიჭებს ვუგულშემატკივრე.

მადლობა ჩვენს საამაყო ნაკრებს ამ შესანიშნავი თამაშისთვის! ეს გამარჯვება კიდევ ერთხელ ადასტურებს ჩვენი გუნდის სიძლიერესა და თავდადებას.

წარმატებები ჩვენს ნაკრებს მომდევნო თამაშებში! მთელი საქართველო თქვენ გვერდით დგას - წინ დიდი გამარჯვებებისკენ!“, - წერს მიხეილ ყაველაშვილი.

საქართველოს ნაკრებმა ერთა ლიგის B დივიზიონის პლეი ოფის საპასუხო მატჩში „დინამო არენაზე“ სომხეთის ნაკრებს უმასპინძლა, 6:1 სძლია და კვლავ B დივიზიონში ითამაშებს.