ჯემალ ლეონიძის ადვოკატი: „გადახდისუუნარობის კანონი“, რომელიც 2007 წელს მიიღეს, ბენდუქიძის კანონს ვეძახი, მიმართული იყო, რომ მოკლე ვადაში ბანკს და შემოსავლების სამსახურს როგორ ჩაეგდოთ ხელში ის ბიზნესები, რომლებიც საინტერესო იყო მათთვის

ბატონ ჯემალს ქონდა ისეთი ბიზნესი, რომელიც ძალიან მნიშვნელოვანი და ღირებული ბიზნესია, შესაბამისად სახელმწიფო ამ ბიზნესს ხელიდან არ გაუშვებდა. მე როცა სახელმწიფოს ვამბობ, ვგულისხმობ სახელმწიფოს თანამდებობის პირებს, რომლებიც იმ პერიოდში ბიზნესში იყვნენ ჩართული. უბრალოდ მას არ შეარჩინეს, ჩამოართვეს ის ბიზნესი, რომელიც იყო ძალიან ღირებული და მნიშვნელოვანი ბიზნესი შემოსავლის თვალსაზრისით და კერძო პირს უბრალოდ არ მიცემდნენ ამ ბიზნესის გაკეთების უფლებას, ეს უნდა ყოფილიყო აუცილებლად ჩინოვნიკების, მათი კონტროლის ქვეშ და ა.შ. მე რა თქმა უნდა ეს შთაბეჭდილება დამრჩა და ბატონი ჯემალი უბრალოდ გახდა მსხვერპლი ამ ბიზნესების ჩამორთმევის მოვლენის, - განაცხადა ადვოკატმა როინ მიგრიაულმა პარლამენტის დროებითი საგამოძიებო კომისიის სხდომაზე, სადაც ბიზნესზე ზეწოლის ერთ-ერთი საქმის (ჯემალ ლეონიძე, შპს „მაგნატი“) განხილვა მიმდინარეობს.

მან ასევე ბიზნესის წართმევის საქმეში იმ პერიოდის ბანკებისა და შემოსავლების სამსახურის როლზეც ისაუბრა და აღნიშნა, რომ სწორედ მათი მეშვეობით ხდებოდა მოკლე დროში ბიზნესის ხელში ჩაგდება.

„ძალიან ბევრი გამიგია კიდევაც და ზოგიერთი ფაქტის მონაწილეც ვყოფილვარ, როდესაც ბანკებს მაგალითად კრედიტი მიუციათ იმისათვის, რომ მერე საკრედიტო მარწუხებში ჩაეგდოთ სუბიექტი და ბიზნესი წაერთმიათ. მე ჩემი 25 წლიანი პრაქტიკის განმავლობაში არაერთხელ შემხვედრია და არაერთხელ მომისმენია, ასე რომ ეს ჩემთვის ჩვეულებრივი მოვლენა იყო, ისევე როგორც შემოსავლების სამსახური, საგადასახადო ინსპექცია იყო ერთ-ერთი ბერკეტი იმისათვის, რომ შესულიყვნენ, გამოგონილი გადასახადები დაეწერათ და შემდეგ ამ გადასახადების მეშვეობით ხელში ჩაეგდოთ ბიზნესი და ის კანონი, რომელიც 2007 წელს მიიღეს „გადახდისუუნარობის კანონი“, მე ამას ბენდუქიძის კანონს ვეძახი, სწორედ იქითკენ იყო მიმართული, ძალიან მოკლე ვადაში ბანკს და შემოსავლების სამსახურს როგორ ჩაეგდოთ ხელში ის ბიზნესები, რომლებიც საინტერესო იყო მათთვის. ორი ძირითადი კრედიტორისთვის დაიწერა ეს კანონი - ბანკებისათვის და შემოსავლებისათვის“, - განაცხადა როინ მიგრიაულმა.