ვისთვისაა განკუთვნილი 1090 ბინა, რომლებსაც სახელმწიფო უპრეცენდენტოდ შეღავათიანი პირობებით გადასცემს

“1090 სამხედრო პირს სახელმწიფოსგან უპრეცენდენტოდ შეღავათიანი პირობებითა და შიდა განვადებით რამდენიმე თვეში საცხოვრებელი ბინები გადაეცემა” – ეს განცხადება საქართველოს პრემიერ-მინისტრმა ირაკლი ღარიბაშვილმა მთავრობის საქმიანობის 2021 წლის ანგარიშის წარდგენისას რამდენიმე დღის წინ გააკეთა.

“უკვე გაისად დასრულდება “ჯარის ქალაქის – Army City” მშენებლობა. პროექტის მიხედვით, მახათას მთაზე 7-სართულიანი 39 კორპუსი უკვე აშენდა და სრულდება ძალიან მალე, რამდენიმე თვეში და დაახლოებით 1090 სამხედროს გადაეცემა ბინები, უპრეცენდენტოდ შეღავათიანი პირობებითა და შიდა განვადებით.

ჩვენ ბოლო 2 წელიწადში თითქმის ყველა სამხედრო ბაზის თანამედროვე სტანდარტების შესაბამისად აღჭურვა და რეაბილიტაცია მოვახერხეთ. დაიწყო სამხედრო ავიაციის აღდგენის პროცესი და წარმატებით მიმდინარეობს არსებული საფრენი აპარატების აღდგენა-რეაბილიტაცია-მოდერნიზაციის სამუშაოები.” – განაცხადა პრემიერმა.

გარდა ამისა, ირაკლი ღარიბაშვილმა სამხედრო პირების ხელფასების ზრდაც 10-დან 20 პროცენტამდე დააანონსა.