vaxtang gomelauri

1674178248

ძალიან მძიმე შემთხვევაა, 5 ადამიანია გარდაცვლილი, აქედან ერთი ჩვენი თანამშრომელია - ვახტანგ გომელაური

საგარეჯოში შს მინისტრი ვახტანგ გომელაური ჩავიდა. ჟურნალისტებთან საუბრისას მინისტრმა აღნიშნა, რომ ჯერჯერობით დანაშაულის მოტივი უცნობია.„ძალიან მძიმე შემთხვევაა - 5 ადამიანია გარდაცვლილი, აქედან ერთი ჩვენი თანამშრომელია. მინდა ოჯახებს მივუსამძიმრო. 5 ადამიანია ასევე დაჭრილი, ერთ-ერთს ოპერაცია უტარდება და ექიმები ვერ გვეუბნებიან გადარჩება თუ არა. ვერავინ ვერ ვხსნით რა მოხდა. მოქალაქემ ცეცხლსასროლი იარაღიდან დაიწყო სროლა ჯერ ერთი მხრიდან, მერე აივნის მეორე მხრიდან, სახლში იყო იმ პირის შვილიც, რომელიც სახლიდან გაიქცა.ეს პირი სამხედრო პირი იყო, როგორც უკვე ვიცით 2021 წელს არის წამოსული სამსახურიდან. მანამდე მუშაობდა ჯარში და ავღანეთშიც ნამყოფია. სპეცდანიშნულების რაზმი ჩამოვიდა და მოუწოდეს, მაგრამ ვერაფერი... გასროლა გააკეთა ამ პირმა მაშინ, როდესაც სპეცრაზმი შევიდა. სპეცრაზმმა ნახა, რომ თავიდან სისხლი მოსდიოდა და გვერდით იარაღი ედო.სახელს და გვარს ამ ეტაპზე ვერ ვიტყვი, შვილი ვერაფერს გვეუბნება ამბობს, რომ გამოვედი და გვამები ძირს ეყარა, მე კი გამოვიქეციო,“- განაცხადა ვახტანგ გომელაურმა.

პოლიცია

1674177181

დამატებითი დეტალები პირზე, რომელმაც საგარეჯოში ცეცხლი გახსნა

საგარეჯოში მომხდართან დაკავშირებით ახალი დეტალები ხდება ცნობილი.ადგილობრივების ინფორმაციით, პირი, რომელმაც რამდენიმე ადამიანი მოკლა და დაჭრა, 49 წლის ნ.ა. არის.არსებული ინფორმაციით ის თვითლიკვიდირებულია. გავრცელებული ინფორმაციით, ყოფილი სამხედრო, აღნიშნულ კორპუსში, ქირით ცხოვრობდა. 

policia danashaulis adgilze

1674176348

პირი, რომელმაც საგარეჯოში ცეცხლი გახსნა სავარაუდოდ, თვითლიკვიდირებულია

შსს საგარეჯოში მომხდართან დაკავშირებით ახალი ინფორმაციას ავრცელებს, რომელსაც „პრაიმტაიმი“ უცვლელად გთავაზობთ:„შინაგან საქმეთა სამინისტროს შესაბამისი დანაყოფების თანამშრომლები მობილიზებული არიან საგარეჯოს რაიონში და საგამოძიებო მოქმედებებს ატარებენ.გამოძიების ინფორმაციით, საცხოვრებელი კორპუსის ერთ-ერთი ბინის აივნიდან, 1974 წელს დაბადებულმა ნ.ა.-მ რამდენიმე გასროლა განახორციელა, რის შედეგადაც გარდაიცვალა 4 და დაიჭრა კორპუსის ეზოში მყოფი 5 ადამიანი.ბრალდებულმა პირმა ასევე, ცეცხლი გაუხსნა ადგილზე გამოძახებულ შინაგან საქმეთა სამინისტროს თანამშრომლებს, რომელთაგანაც ერთ-ერთი გარდაიცვალა.შემთხვევის ადგილზე მოხდა პოლიციის დამატებითი ჯგუფების მობილიზება, ასევე ადგილზე გამოძახებულ იქნა შინაგან საქმეთა სამინისტროს სპეცდანიშნულების რაზმი, რომელთა მისვლისთანავე, ბრალდებულმა ცეცხლსასროლი იარაღიდან გასროლით სავარაუდოდ თვითლიკვიდაცია განახორციელა.ადგილზე მუშაობას იწყებენ გამნაღმველები და დამატებითი ინფორმაცია მოგვიანებით გავრცელდება.გამოძიება სისხლის სამართლის კოდექსის 109-ე მუხლის „ლ“ ქვეპუნქტით და 236-ე მუხლის მესამე ნაწილით მიმდინარეობს, რაც დამამძიმებელ გარემოებაში ჩადენილ განზრახ მკვლელობას და ცეცხლსასროლი იარაღისა და საბრძოლო მასალის უკანონო შეძენა-შენახვისა და ტარებას გულისხმობს.“- ნათქვამია გაცხადებაში.

პოლიცია

1674175927

საგარეჯოდან ერთ-ერთი დაშავებული თბილისში გადმოჰყავთ

ამ წუთებში საგარეჯოდან ერთ-ერთი დაჭრილი სასწრაფო სამედიცინო დახმარების ჯგუფს თბილისში გადმოჰყავს.ადგილობრივების ინფორმაციით, დაშავებულ ქალს თვალი აქვს დაზიანებული.შეგახსენებთ, ცოტა ხნის წინ, საგარეჯოში შეიარაღებულმა პირმა ერთ-ერთი კორპუსის მაღალი სართულიდან ცეცხლი მოქალაქეების მისამართით გახსნა. არიან დაჭრილები და გარდაცვლილები.პირდაპირი ეთერი შემთხვევის ადგილიდან 

პოლიცია

1674175240

ფოტოები შემთხვევის ადგილიდან - რა ხდება საგარეჯოში

ცოტა ხნის წინ, საგარეჯოში შეიარაღებულმა პირმა ერთ-ერთი კორპუსის მაღალი სართულიდან ცეცხლი მოქალაქეების მისამართით გახსნა. არიან დაჭრილები და გარდაცვლილები.გავრცელებული ინფორმაციით პირი, რომელმაც მოქალაქეების მისამართით ცეცხლი გახსნა, ყოფილი სამხედრო მოსამსახურეა.ვრცელდება ფოტოები შემთხვევის ადგილიდან.მომხდარს შინაგან საქმეთა სამინისტრო ეხმაურება.

პოლიცია

1674173861

LIVE - რა ხდება ამ წუთებში საგარეჯოში

ცოტა ხნის წინ, საგარეჯოში შეიარაღებულმა პირმა ერთ-ერთი კორპუსის მაღალი სართულიდან ცეცხლი მოქალაქეების მისამართით გახსნა.გავრცელებული ინფორმაციით, არიან დაჭრილები და გარდაცვლილები.ვრცელდება ინფორმაცია იმ პირის შესახებ, რომელმაც მოქალაქეების მისამართით ცეცხლი გახსნა. ერთი ვერსიით ის ყოფილი პოლიციელია, მეორე ვერსიით კი ყოფილი სამხედრო მოსამსახურე.ადგილობრივები შემთხვევის ადგილიდან ფოტოებს ავრცელებენ. მომხდარს შინაგან საქმეთა სამინისტრო ეხმაურება:

პოლიცია

1674171423

შსს საგარეჯოში მომხდარზე განცხადებას ავრცელებს - არიან დაჭრილები და გარდაცვლილები

რამდენიმე წუთის წინ, საგარეჯოში შეიარაღებულმა პირმა ერთ-ერთი კორპუსის მაღალი სართულიდან ცეცხლი მოქალაქეების მისამართით გახსნა.როგორც ადგილობრივები წერენ, არიან დაჭრილები და გარდაცვლილები.მომხდარს შინაგან საქმეთა სამინისტრო ეხმაურება:"შინაგან საქმეთა სამინისტროს შესაბამისი დანაყოფების თანამშრომლები მობილიზებული არიან საგარეჯოს რაიონში და სპეციალურ ოპერატიულ-საგამოძიებო ღონისძიებებს ახორციელებენ.პირველადი ინფორმაციით, საცხოვრებელი კორპუსის ერთ-ერთი ბინის აივნიდან მოქალაქის მხრიდან განხორციელდა რამდენიმე გასროლა, რის შედეგადაც გარდაიცვალა და დაიჭრა კორპუსის ეზოში მყოფი რამდენიმე ადამიანი.ბრალდებულმა პირმა ასევე, ცეცხლი გაუხსნა ადგილზე გამოძახებულ შინაგან საქმეთა სამინისტროს თანამშრომლებს, რომელთაგანაც ერთ-ერთი გარდაიცვალა.ამ წუთებში, შემთხვევის ადგილზე პოლიციის დამატებითი ჯგუფები არიან მობილიზებული და ბრალდებულის დაკავების მიზნით ოპერატიულ-საგამოძიებო ღონოსძიებებს ატარებენ. სპეციალური ოპერაციის დეტალების შესახებ და ასევე დაჭრილების და გარდაცვლილების შესახებ, დამატებითი ინფორმაციას მოგვიანებით გავავრცელებთ." - განმარტავენ უწყებაში. 

ვასილ ბუჩუკური

1670836140

ორჯერ ცოცხლად დამარხული ბიჭის ისტორია - „ქალს შეუნიშნავს, რომ მიწის ზედაპირი ინძრეოდა. გათხარა და 16 წლის დაუძლურებული ბიჭი ამოიყვანა“

ბოლშევიკების შემოსვლამ ბევრი დაუჯერებელი ისტორია შექმნა. როცა ბედისწერა ამა თუ იმ ადამიანის მხარეს იყო, ტირანიით განთქმული ჩეკისტებიც კი უძლური იყვნენ.მთიულეთში, დუშეთის რაიონის სოფელ ქვეშეთში, იზრდებოდა ვასილ ბუჩუკური. ჯერ კიდევ პატარა, გამოირჩეოდა სწავლის მიმართ დიდი ინტერესით. მას ბედმა მძიმე ბავშვობის ხვედრი 5 წლის ასაკში არგუნა.ვასილი, ოჯახის უფროსი შვილი დაობლდა. მას უმცროსი, 4 წლის ძმა, გიორგი და ერთი და, 3 წლის ოლია ჰყავდა. ბავშვებს მამა, ივანე ზრდიდა.რა ვითარებაში ცხოვრობდნენ საუკუნის წინ ჩვენი თანამემამულეები, რას ნიშნავდა კომუნისტური მარწუხები და როგორ იწერებოდა მათი განაჩენი, ამ დღესაც აქტუალურ კითხვებს 94 წლის ოლია პასუხობს. მიუხედავად ასაკისა, ის მძიმე წლები დეტალურად ახსოვს. მტკივნეულ, თუმცა საამაყო თავგადასავალში ბოლშევიკური რეჟიმის სიმძიმე ნათლად ჩანს. ალბათ, სულ რამდენიმე ადამიანია შემორჩენილი, რომლებსაც გაწითლებული საქართველოს, ჯერ ფინეთისა და შემდეგ მეორე მსოფლიო ომების ამბები მთელი სიმძაფრით აქვთ აღბეჭდილი მეხსიერებაში.იმ ავბედით დროს მისი უფროსი ძმა ორჯერ ცოცხლად დამარხეს ჩეკისტებმა, მერე ორი ომი გამოიარა და სასწაულებრივად გადარჩა. მაინც დაუბრუნდა სამშობლოს, სოფელს, ოჯახს... ვასიკა ბუჩუკურის ისტორია პირველი დამოუკიდებელი რესპუბლიკის გამოცხადებისთანავე დაიწყო. 1918 წელს დუშეთის რაიონის სოფელ ქვეშეთში ბუჩუკურების ოჯახში უფროსი ვაჟის, ვასილის დაბადებას ზეიმობდნენ. სამი წლის შემდეგ გაჩნდა გიორგი, 1924 წელს - ოლია. პატარებს დედა როცა ყველაზე მეტად სჭირდებოდათ, სწორედ მაშინ გარდაეცვალათ. ივანე ბუჩუკურმა მეორედ იქორწინა. მათ ორი შვილი შეეძინათ. უმცროსი რამდენიმე თვის იყო, როცა დაიღუპა. შვილზე დარდს გადაჰყვა დედა. ივანე მეორედ დაქვრივდა...ოლია ბუჩუკური: " ჩემი ძმა ვასილი პატარა იყო, როცა მამაჩემმა ბიძაჩემს დუშეთიდან თბილისში პირველად გააყოლა. იქაურობა ძალიან მოსწონებია, დედაქალაქის სიჭრელემ და ხალხის განსხვავებულობამ საბედისწერო ნაბიჯი გადაადგმევინა - მე-4 კლასში იყო, როცა დილით სკოლაში წავიდა და უკან აღარ დაბრუნებულა. მამა ყველგან ეძებდა, მაგრამ ვერსად მიაგნო. თბილისში გაპარულა. სწორედ მაშინ დაიწყო მისი მძიმე, მაგრამ საინტერესო ცხოვრება. არავინ იცის, როგორ, მაგრამ ეს პატარა ბიჭი ლავრენტი ბერიას კართან აღმოჩნდა. ამხანაგ ლავრენტისთვის გაუმხელია ვასილს თავისი ბავშვური ოცნებები. მისი გამბედაობით აღფრთოვანებულ ბერიას საცხოვრებელი მუშათა ბანაკში, ხოლო სამუშაო მაუდის ფაბრიკაში მიუცია. სანიმუშო მოსწავლე იყო. ერთხელაც სოფელში ჩამოვიდა ლამაზი, გაზრდილი და დადინჯებული. სოფელი გაოცდა. რვეულში ფრიადები ჰქონდა სულ. პედაგოგები დიდ წარმატებას უწინასწარმეტყველებდნენ, მაგრამ წინასწარმეტყველებას ახდენა არ ეწერა... 14 წლის იყო, ეროვნული მოძრაობის წევრი ახალგაზრდები რომ გაიცნო და ჩაერთო თავისუფალი საქართველოსთვის მებრძოლთა კავშირში.დღე მუშაობდა და მეცადინეობდა, საღამოს ავლაბრის იატაკქვეშა სტამბაში პროკლამაციებს ბეჭდავდა, ღამით კი თბილისის ცენტრალურ ქუჩებში აკრავდა. ერთ საღამოს პროკლამაციებით დატვირთული ამავე სტამბასთან შინსახკომელებმა დააპატიმრეს. 14 წლის მთიული ბიჭი მეტეხის ციხეში ჩააგდეს. თუმცა არ გატყდა, არც ერთი თანამებრძოლი არ დაასახელა შეპირებული თავისუფლების სანაცვლოდაც კი. ჩემი ძმა დახვრეტას და გადასახლებას ასაკმა გადაარჩინა. რომ დაიჭირეს, მას მერე 15 წელი არაფერი გაგვიგია მის შესახებ. მამას მეზობლებმა ორჯერ სუფრაც გადაახდევინეს, ბიჭი ცოცხალი აღარ გყავს და მისი სულის საცხონებლად საკლავი უნდა დაკლაო. ზუსტად მაშინ თურმე ვასიკოს იმხანად გავრცელებული მუცლის ტიფი შეეყარა. ციხის უფროსის გადაწყვეტილებით, მომაკვდავი პატარა ბიჭი საავადმყოფოს ნაცვლად, ლოტკინის დასახლებაში, გარდაცვლილებთან ერთად ცოცხლად დაუმარხავთ. ჩემი ძმა სასწაულებრივად გადაურჩა სიკვდილს. შვილის საფლავზე მიმავალ უცხო ქალს შეუნიშნავს, რომ მიწის ზედაპირი ინძრეოდა. გათხარა და 16 წლის დაუძლურებული ბიჭი ამოიყვანა. ის ქალბატონი თამარ კაკუტია იყო. მასვე მოუსულიერებია და გადაუცია საპატიმროსთვის... იმ დროს მე დიდი ოჯახის პატარა დიასახლისი ვიყავი. პატარა ხელებით ვზელდი ცომს, ვერ ვერეოდი და ხელები მისივდებოდა. სხვა გზა არ მქონდა, დედის მოვალეობა ჩემს თავზე უნდა ამეღო. მაშინ 5 წლის ვიყავი, ჩემი ძმებიც პატარები იყვნენ. მამას კი მოჰქონდა საჭმელი, მაგრამ მახსოვს დღეები, როცა სახლში თანასოფლელი ბავშვები გვიცვივდებოდნენ და ობლებს ლუკმას გვართმევდნენ. სოფელს შიოდა..."სანამ კომუნისტების ლოზუნგი "ყველაფერი ხალხს" მთამდე მიაღწევდა, ბუჩუკურების ოჯახი შეძლებულად ცხოვრობდა. ივანეს სამი დუქანი ჰქონდა, მაგრამ ერთ დღეს დააპატიმრეს - ბოლშევიკებმა მიიღეს ინფორმაცია, რომ ივანე ბუჩუკური წერა-კითხვის გამავრცელებელი საზოგადოებისა და 1924 წელს პარიზში შალვა ბერიძის დაფუძნებული პატრიოტული ორგანიზაცია "მომავლის" (იმავე წელს ქაქუცა ჩოლოყაშვილის წინადადებით "თეთრი გიორგი" დაერქვა), დამფინანსებელი ყოფილა. სამი წელი ბავშვები მეზობლებისა და ნათესავების იმედად იყვნენ.ოლია ბუჩუკური: "ერთ დღეს მეზობელმა მითხრა, უკვე ერთი თვეა თქვენს სახელზე ფოსტაში წერილია მოსული და არ უნდა მიაკითხოთო? მაშინვე გავვარდი. სამკუთხა გაყვითლებული ფურცელი მომაჩეჩეს, რამდენჯერმე წავიკითხე, მაგრამ ვერაფერი გავიგე, ვინ რას იწერებოდა. გაუგებარი შინაარსის გზავნილი ბიცოლასთან წავიღე. იმანაც რამდენჯერმე გადაიკითხა და უცებ გაოცებულმა მითხრა, ეს ვასილის წერილიაო... ახალი ამბით გახარებული, კახეთში კითხვა-კითხვით ჩავედი მამასთან, რომელიც მაშინ ანაგაში მუშაობდა. ვუთხარი, ვასიკოსაგან წერილია-მეთქი. მთელმა სოფელმა იზეიმა, ხარიც კი დაკლეს, ძია ვანოს შვილი გამოუჩნდაო...1939 წელს ჩემი ძმა ფინეთის ომში წავიდა, თუმცა გადარჩა. ჩეკისტებმა ისევ ორი წლით გაისტუმრეს ციმბირში ხეტყის დამამზადებლად. ორი წელი ციმბირში გაცილებით უარესი იყო, ვიდრე გაჭირვება, პატიმრობა ან ომია. მას საკუთარი თვალით უნახავს დამშეული რეპრესირებულების მიერ მოკლული ადამიანი, რომლისგანაც კერძი მოამზადეს. კომუნისტები გადასახლებულებს, განსაკუთრებით ხანში შესულებს, დიდ გეგმას აძლევდნენ. თურმე ერთი 80 წელს მიღწეული ქართველი გეგმას ვერ ასრულებდა. სწორედ მაშინ გამოცადა ვასილმა მეორედ ცოცხლად დამარხვა - მოხუცს მიხმარებიან ვასიკა და კიდევ სხვა ქართველები, თუმცა ერთ პურზე გაყიდულმა კაცმა დაასმინა და ზედამხედველები სასტიკად გაუსწორდნენ. იქამდე აწამეს ვასილი და დანარჩენები, სანამ გონება არ დაკარგეს. მერე ნაგავსაყრელზე გადააგდეს და მიწა მიაყარეს, შუაღამისას, ციმბირულ სიცივეში, გონს მოსულა და სხვა ბანაკში წასულა".დაბრუნება...ოლია ბუჩუკური: "პატიმრობის ვადა რომ ამოეწურა, სამშობლოში მატარებლით ბრუნდებოდა და ერთ-ერთ სადგურზე პირდაპირ მეორე მსოფლიო ომის ფრონტის ხაზზე გაუშვეს. იქაც გადარჩა... მაშინ ჩემი მეორე ძმა, გიორგი, ჯარში მსახურობდა, ჩვენი უმცროსი ძმა კოლა სკოლის მოსწავლე იყო... სოფელში წითელარმიელები დაბანაკდნენ, ორჯონიკიძის მხრიდან შემოვიდნენ მთიულეთში. ვის ოჯახშიც ჯარისკაცი გაათენებდა ღამეს, უსახელოდ ითვლებოდა იქ მცხოვრები ყველა ქალი. ჯარის უფროსი მოვიდა და მითხრა, შენ ვინა ხარ, ორი ოთახი დაგიკავებია და ჯარი ქუჩაში დგასო. შემეშინდა, გავიქეცი ნათლიასთან და ვთხოვე დახმარება. ის იცნობდა უფროსობას, მის სახლში ცხოვრობდნენ, გამომყვა და გადამარჩინა. არ შემოვუშვი ჩვენს ოჯახში რუსის ჯარი.მალე მსოფლიომ ომის დასრულება იზეიმა. ჩვენი მონატრებული და გადარჩენილი, გაუტეხავი ვასილი დაგვიბრუნდა. დილაადრიან ეზოში ვფუსფუსებდი, როცა ორი სამხედრო კაცი შემოვიდა. გული შემიღონდა, ესენი ვინღა არიან-მეთქი. ერთ-ერთი დაიხარა და მოფერება დამიწყო. შემრცხვა ჩემი თავის, ხალხის, მეზობლების. თავი ცოცხალი რად მინდა, სალდათმა მაკოცა-მეთქი, ასე ვფიქრობდი და თან ვტიროდი. რამდენიმეწამიანი დუმილის შემდეგ მითხრა, ოლია, ვეღარც კი მიცან, შენი ძმა ვარო! გაოგნებული შევყურებდი. დამამტკიცებლად სურათი მაჩვენა. როცა ვასილი ომიდან ჩამოსულა, თბილისში სამხედრო ნაწილში ჩვენს ძმასთან, გიორგისთან მისულა და ფოტოც გადაუღიათ. რომ ჩავეხუტეთ ერთმანეთს, დიდხანს ვკოცნე ჩემი ნატანჯი ძმა... მერე მეორე ძმაც დაბრუნდა ჯარიდან და იმ დღის შემდეგ საოჯახო საქმეებში ორივე მეხმარებოდნენ... ერთხელაც სიზმარი ვნახე - ვითომ ვასილის საწოლში ვიღაც უცნობი ქალი იწვა... მალე ხადის ხეობაში ქორწილში მეგარმონედ მიმიწვიეს. სწორედ იქ ვიცანი სიზმრად ნანახი გოგონა, ნინო ზაქაიძე და ვასილს ვუთხარი, ეს გოგონა ვნახე სიზმარში-მეთქი. მალევე იქორწინეს და ორი ვაჟი შეეძინათ".ანდერძიოლია ბუჩუკური: "იმის გამო, რომ ვასილი ხალხის მტრად ჰყავდათ კომუნისტებს შერაცხილი, ხოლო მისი მეუღლე ხალხის მტრის შვილად, არსებობისთვის ბრძოლა უწევდათ. ნინო გაკულაკებული მამის, ალექსანდრე ზაქაიძის შვილი იყო. ოჯახს ორჯონიკიძეში 11-ნომრიანი სასტუმრო ჰქონდა, სოფელში კი მიწები, საქონელი და სალდათის ბაზარში რამდენიმე დახლი. კოლექტივიზაციამ ახალგაზრდებს სამშობლოში მომავალი მოუსპო. ამიტომ გაჭირვებას ისევ საქართველოდან შორს წასვლით შეებრძოლნენ. ყიზლარში დასახლდნენ ჩემი ძმა და რძალი. იქ კოლექტივში მუშაობდნენ, თან მეურნეობაც ჰქონდათ. ყიზლარში, ქართულ დასახლებაში ჩემი ძმა გადასახლებულ ზვიად გამსახურდიას შეხვდა. მათ მალევე გაუგეს ერთმანეთს. ორივეს დამოუკიდებელი სამშობლოს ბედი ადარდებდა, ორივეს კომუნისტური მარწუხები აკავებდა და ორივე ბედკრული საქართველოს შვილები იყვნენ. როგორც ვასილი იგონებდა, გამსახურდია ძალიან დარდობდა, რომ დათმობაზე წავიდა კომუნისტებთან, რომ დროზე ადრე ვერ განდევნა საძულველი ჩინოვნიკები ქვეყნიდან და ვერ იზეიმა საქართველოს დამოუკიდებლობა. გამსახურდიას ოჯახზე თავდასხმის მუქარით აკავებდნენ კომუნისტები. ზვიადს, ერთი მხრივ, სამშობლოს ბედი ადარდებდა, მეორე მხრივ კი ოჯახი, რომლის ამოწყვეტას ვერასოდეს აპატიებდა თავს". ვასილი 80-იანი წლების მიწურულს მეუღლესთან ერთად დაუბრუნდა სოფელს და ააშენა სახლი, სადაც ამ პატრიოტი ადამიანის ხსოვნა უკვდავყოფილია.P.S. სამაგალითო ქართველი ვასილ ბუჩუკური ჩემი ოჯახის წევრი იყო, თუმცა პირადად არ ვიცნობდი. ეს იყო კაცი, რომელიც კომუნისტების გადმოგდებულ ანკესს არასოდეს წამოჰგებია, კაცი, რომელიც უკანასკნელ დღეებს სასთუმალქვეშ ამოდებული თოფით ითვლიდა - ტყვია ოკუპანტებს ეკუთვნოდა. მან იცოდა, რომ ორი რუსეთი არ არსებობდა და რომ დადგებოდა დღე, როცა კვლავ შემოიჭრებოდა ქართული სახელმწიფოს ჩამოსაშლელად რუსის ჯარი. ამიტომაც დაუბარა სიკვდილის წინ შვილიშვილებს ანდერძად,"სამშობლოს თავისუფლება არაფერზე გაცვალოთო. ვასილ ბუჩუკური 2005 წელს გარდაიცვალა. წელს, საქართველოს დამოუკიდებლობის მეასე წლისთავზე, ისიც 100 წლის გახდებოდა.

pensioneri

1670169502

პენსიონერს ესთეტიკურმა ცენტრმა დიდი ოდენობით თანხა გამოსძალა (საბერძნეთი)

პენსიაზე გასულ პოლიციელს ესთეტიკურმა ცენტრმა ნახევარი მილიონი ევრო გამოსძალა. ამის შესახებ ინფორმაციას ბერძნული მედია ავრცელებს. როგორც ირკვევა, პენსიონერს დიდი ოდენობით თანხა დაწესებულებამ დაავადების სამკურნალოდ გადაახდევინა, თუმცა შედეგი ვერ მიიღო.საუბარია 70 წლის კაცზე, რომელსაც ვიტილიგო (თეთრი ლაქები კანზე) აწუხებს. სწორედ მის მოსაშორებლად მიმართა ესთეტიკურ ცენტრს და მიიღო დაპირება, რომ ლაზერული თერაპიისა და  მკურნალობის კონკრეტული კურსით, სასურველ შედეგს მიიღებდა.კაცმა სამი თვე იმკურნალა, თუმცა კურსის გაგრძელება ფინანსური კრიზისი გამო ვეღარ შეძლო. სასურველი შედეგის მისაღებად კი ცენტრმა მას დამატებით 90 ათასი ევრო მოსთხოვა. მას შემდეგ კი რაც პაციენტმა მათ ფინანსური კრიზისის შესახებ შეატყობინა, მკურნალობის გასაგრძელებლად ცენტრმა მას სახლის გაყიდვა შესთავაზა.“ამის შემდეგ ყოფილმა პოლიციელმა ესთეტიკური ცენტრის წინააღმდეგ საჩივარი შეიტანა. 

ყიფშიძეები

1669849638

„არ ვაჭარბებ...“ - რას ამბობს გიორგი ყიფშიძის მეუღლე მამამთილის შესახებ

ყიფშიძეების ოჯახი სხვადასხვა მიზეზით, საზოგადოების ყურადღების ცენტრში ხშირად ექცევა. ახლახან, ლენუკა ყიფშიძემ „პრაიმ ჰაუსში“ მონაწილეობის მიღება გადაწყვიტა, მანამდე, საზოგადოების განხილვის საგანი მისი ძმის, გიორგი ყიფშიძის პირადი ცხოვრება გახდა...მას შემდეგ, რაც გიორგი ასაკით უმცროს გოგოზე დაქორწინდა, საზოგადოება ამ თემას აქტიურად განიხილავდა და ზოგიერთი მათგანი აკრიტიკებდა კიდეც. გიორგის მეუღლე ენი გასიევაა, წყვილს 2 საერთო შვილი ჰყავს.ცნობილია, რომ გიორგი ყიფშიძის უფროსი შვილი, ნატალია დედინაცვალთან მეგობრობს, მათ შორის ასაკობრივი სხვაობა 4 წელია.„პრაიმტაიმი“ ენის ცნობილი ოჯახის შესახებ ესაუბრა.- რას ნიშნავს სტატუსი ზურა ყიფშიძის რძლობა?- ზურა ყიფშიძის რძლობა ნიშნავს იმას, რომ ადამიანი, რომელიც გიდგას გვერდით არის მეგობარი, გარდა ამისა, არის მამა, ძმა.- როგორი ბაბუაა ბატონო ზურა?- ძალიან კარგი ბაბუაა, არ ვაჭარბებ. ყველანაირად მზრუნველი და ყურადღებიანი ადამიანია, ამას ძალიან ვაფასებ და ჩემთვის მნიშვნელოვანია.- როგორი ურთიერთობა გაქვთ ნატალიასთან?- ნატალიასთან ძალიან ახლო ურთიერთობა მაქვს. ჩემი ახლო მეგობარია.- ალბათ ლენუკას დიდი გულშემატკივარი ხართ...- ლენუკას მხარს აქტიურად ვუჭერ, ჩემ ტიკტოკ გვერდზეც, სადაც ბევრი გამომწერი მყავს, სულ ამაზე ვსაუბრობ. - გავრცელდა ინფორმაცია, რომ გიორგის ჯანმრთელობის პრობლემა აქვს, თუ შეგიძლიათ ამაზე საუბარი?- შემიძლია გითხრათ, რომ ახლა არანაირი ჯანმრთელობის პრობლემა აქვს. უბრალოდ ძალიან შეაწუხეს და სიტუაცია დაძაბეს, რატომ გახდაო. 3 წლის წინ რაღაც პატარა პრობლემები ჰქონდა, მაგრამ ეს ყველაფერი მოგვარებულია და კარგად არის.- როგორი მამაა გიორგი?- გიორგი საუკეთესო მამაა. ბავშვები რომ გაგვიჩნდა, აქტიურად იყო ჩართული აღზრდაში, ჩემზე მეტადაც კი, სანამ მე მივეჩვიე. ბავშვებთან დაკავშირებით ყველაფერი გიორგიმ მასწავლა. ძალიან მაგარი მამაა. ნატალია დედასთან ცხოვრობს, მაგრამ ხშირად მოდის და მაქსიმალურად ართობს ბავშვებს, ძალიან მზრუნველია.

გოგა ჯაბაური

1669808398

რას საქმიანობს და ვისთან მეგობრობს გოგა ჯაბაური „პრაიმ ჰაუსიდან“ წასვლის შემდეგ

„პრაიმ ჰაუსიდან“ წასული ერთ-ერთი ყველაზე ხმაურიანი მონაწილე, გოგა ჯაბაური „პრაიმტაიმთან“ საკუთარი ცხოვრებისა და სიახლეების შესახებ საუბრობს. გოგა გვიმხელს, ვისთან მეგობრობს და ვისთან შეინარჩუნებს ახლო ურთიერთობას მომავალში.- რა შეიცვალა თქვენს ცხოვრებაში „პრაიმ ჰაუსიდან“ წასვლის შემდეგ, ქუჩაში ბევრი გცნობთ?- ფაქტობრივად, არაფერი. ცხოვრებას ისევ ისე ვაგრძელებ. ქუჩაში ბევრს არ დავდივარ, სიარულში დიდ დროს არ ვატარებ. ჯერ ისედაც ბევრ ხალხთან მქონდა ურთიერთობა, მაგრამ ცნობადობა 50%-ით გაზრდილია, რასაც ვამჩნევ.- გაქვთ რამე შემოთავაზებები, თუნდაც, სარეკლამო კუთხით? რას საქმიანობს ახლა გოგა?- ჯერჯერობით, შემოთავაზებები არ მაქვს. ვაკეთებ იმ საქმეს, რასაც მანამდე ვაკეთებდი - კომერციით ვარ დაკავებული. ძველ საქმეებს დავუბრუნდი და ახლებზეც არ ვამბობ უარს, თუ იქნება რამე საინტერესო.- ნაწყენი ხართ ვინმეზე?- პროექტში? - არა. არ მეგონა, თუ ასეთ გადაწყვეტილებას მიიღებდა ჟიური, მაგრამ ყველას თავისი გადაწყვეტილება აქვს. რაც შეეხება მონაწილეებს, ფარისევლებთან გადაკვეთა არ მექნება, თუ მექნება, მხოლოდ გამარჯობით შემოვიფარგლები. წყენა საერთოდ არ მაქვს, ვაანალიზებ რასაც ვაკეთებ და იქიდან გამომდინარე, გადაწყვეტილებებს ვიღებ. ადამიანი, რომელიც საკუთარ თავს ატყუებს, ჩემთან დასაახლოებლად აზრს ვერ ვხედავ, ფუნქცია არ ექნება.- ყოფილ მონაწილეებთან კონტაქტი გაქვთ? - ყოფილ 5-6 მონაწილესთან მაქვს კონტაქტი. ესენი არიან: მარიამ ჩაგანავა, საბა უგრეხელიძე, ალექს ბანცაძე, გიორგი მეტრეველი, ლეტოსთან მაქვს კარგი ურთიერთობა, ბეატრისი მიყვარს ძალიან და ევასთანაც არ მაქვს ცუდი ურთიერთობა სიმართლე რომ გითხრათ. დანარჩენებიდან, ვინც პროექტში დარჩნენ, ბაგირას ვცემ ძალიან დიდ პატივს. როგორც ჩანდა პროექტში ყოფნისას, სხვებთან არ მაქვს კარგი ურთიერთობა და ძალიანაც კარგი, ესე იგი ეს ხალხი საჭირო არ იყო, ცხოვრებაში ფარისევლობა არ მჭირდება. პროექტის დასრულების შემდეგ მეგობრობას მხოლოდ ბაგირასთან განვაგრძობ.- ლენუკა წარსულს ჩაბარდა?- ლენუკა წარსულს მას შემდეგ ჩაბარდა, რაც მხარი არ დამიჭირა მაშინ, როდესაც პროექტში მისი მხარდაჭერა მჭირდებოდა. მას შემდეგ ერთმანეთს გადავეკვეთეთ, თუმცა ურთიერთობა აღარ გვაქვს. მასთან მეგობრობის გაგრძელების აზრს ვერ ვხედავ, თამაში ხომ არ არის? მე რადიკალური ტიპი ვარ, არავის გამო ვაპრებ ჩემი რადიკალურობის შეცვლას, ჩემ თავთან მაგით გამოვირჩევი. ერთხელ გათვითცნობიერებულ გადაწყვეტილებას რომ მივიღებ, ანუ მივიღე.- ის ხომ თამაშში ხდებოდა...- რა მნიშვნელობა აქვს, მე ისეთი ვიყავი, როგორც ვარ... არ მითამაშია.

გივი სიხარულიძე

1669745763

„ამბობენ, კანონები უნდა გამკაცრდესო... ადამიანი მორალურად უნდა შეიცვალოს“ - გივი სიხარულიძე

მსახიობი გივი სიხარულიძე ქვეყანაში არსებულ ვითარებას ეხმაურება და საკუთარ პოზიციას „პრაიმტაიმთან“ აფიქსირებს.გივი სიხარულიძე: - როცა კაცობრიობამ ზურგი შეაქცია ღმერთს და ხელი სატანას ჩამოართვა, იმ დღიდან ჩვენი საქმე უკანაა წასული. ეს ყველაფერი გამოიწვია იმან, რომ ეკლესიაზე ძალიან დიდი ზეწოლაა. 24 საათი ეკლესიის მსახურების გინებაა. მეც არ მეხატება გულზე მეუფეები და მათი განდიდება, მაგრამ ეკლესიაში არიან მოძღვრები, უბრალო მღვდლები, ბერები, მონაზვნები, წესიერი ხალხი, მართლა ღმერთთან ახლოს რომ დგანან. მივალ და მათ ჭუჭყიან ფეხებს დავუკოცნი, მაგრამ მეუფეებზე რომ არის ლაპარაკი, ყველას ვეთანხმები.ეკლესია შეურაცხყვეს. რაზე დგას ქვეყანა, მსოფლიო საერთოდ, დგას მრწამსზე. შენ თუ ღმერთის მორწმუნე კაცი ხარ, ასეთ საქციელს ჩაიდენ, რაც გუშინ მოხდა?! [მონაზონზე სექსუალური ძალადობა] მე ერთ რამეს ვიტყვი, კარგად იცით, სანამ მწერალი და მსახიობი გავხდებოდი, იქამდე ქუჩის ბიჭი ვიყავი. ერთი კანონი იყო, ასეთ საქმეს რომ ჩაიდენდნენ ნაძირალები, ან ახალგაზრდა ბიჭს რომ გააუპატიურებდა ვიღაც, ციხე უსწორდებოდა მათ თვითონ. კანონი ხომ სჯიდა...- ბოლო დროს კრიმინალის ბევრი შემთხვევა ფიქსირდება...- ძალიან ბევრი. ეს რამ ქნა იცით? სიყვარული დაიკარგა ადამიანებს შორის. რაზე დგას, ფუძე რა არის ადამიანის ცხოვრების - სიყვარული. იყო ასეთი უდიდესი რელიგიური ფილოსოფიის მამამთავარი რუსეთში, ბერტიევი, რომელიც წერს: - ადამიანო, შენ მაღლა ცაში ნუ ეძებ ღმერთს, ღმერთი არს შენში, თუ შენ შეგიძლია გიყვარდეს.“ სიყვარული აღარ არის...- როგორ უნდა შევცვალოთ დღევანდელი რეალობა?- უნდა ვიწამოთ ის, ყველაზე დიდი რაც არის - უფალი და მისი ძალა. უნდა გვიყვარდეს, კი არ უნდა გვეშინოდეს უფლის. ახლა ამბობენ, კანონები უნდა გამკაცრდესო. შენს ფსიქიკას რა შეცვლის, უბრალოდ შეგეშინდება, რომ რამე არ ჩაიდინო. მაგრამ მაინც ჩაიდენ, როგორც კი მომენტი გექნება. ამიტომ აქედან მორალი: ადამიანი მორალურად უნდა შეიცვალოს, რომ შეიცვალოს, ამას მთელი ინსტიტუტები სჭირდება. ეს ინსტიტუტი სიკეთის ინსტიტუტია, მერე ოჯახი. დღეს ოჯახებში როგორ იზრდება ბავშვი, დედა ღამის 4 საათზე მოდის ნასვამი, სიგარეტს, პლანს ეწევიან... კაიფობენ და ბავშვი სიყვარულის გარეშე, არაჯანსაღ გარემოში იზრდება, ეს სამყაროს ღუპავს. რასაც დათესავ, იმას მოიმკიო, მომავალში ათასჯერ უარესი გველოდება. მთელი მსოფლიო გადაშენების გზაზეა, თუ ასე გაგრძელდა, სამყარო აღარ იარსებებს და გენიოსი ყოფილა, ვინც აპოკალიფსი იწინასწარმეტყველა - აუცილებლად გადაშენდება სამყარო.