თურქეთის თავდაცვის უწყება: სამძებრო და სამაშველო ოპერაციები დაწყებულია აზერბაიჯანისა და საქართველოს ხელისუფლებებთან კოორდინაციით

თურქეთის თავდაცვის სამინისტრომ ავიაკატასტროფის შესახებ ინფორმაცია გაავრცელა. უწყება წერს, რომ სამძებრო და სამაშველო ოპერაციები დაწყებულია აზერბაიჯანისა და საქართველოს ხელისუფლებებთან კოორდინაციით.

"ჩვენმა სამხედრო სატრანსპორტო თვითმფრინავმა სი-130-მა, რომელიც აზერბაიჯანიდან ჩვენს ქვეყანაში დაბრუნებას აპირებდა, საქართველო–აზერბაიჯანის საზღვრის სიახლოვეს კატასტროფა განიცადა. სამძებრო და სამაშველო ოპერაციები დაწყებულია აზერბაიჯანისა და საქართველოს ხელისუფლებებთან კოორდინაციით," - წერს თურქეთის თავდაცვის უწყება.

ავიაკატასტროფას ეხმაურება თურქეთის შინაგან საქმეთა მინისტრიც. ალი იერლიკაია X-ის საკუთარ გვერდზე წერს, რომ ქართველ კოლეგას ტელეფონით ესაუბრა, რომელიც ადგილზე მიდის.

ავიაკატასტროფა საქართველო-აზერბაიჯანის საზღვართან მოხდა - ჩამოვარდა თურქეთის სამხედრო თვითმფრინავი. "კურიერმა" მოიპოვა ფაქტის ამსახველი ვიდეომასალა. კატასტროფა განიცადა სამხედრო-სატრანსპორტო თვითმფრინავმა "სი-130"-მა, იგივე ჰერკულესმა. "ფლაი რადარის" მონაცემებით, თვითმფრინავი აზერბაიჯანიდან, კონკრეტულად განჯის აეროპორტიდან ადგილობრივი დროით 14:19 წუთზე აფრინდა, რის შემდეგაც ფრენების მონიტორინგის საერთაშორისო პლატფორმაზე განახლებული მონაცემები აღარ იძებნება.

სამხედრო თვითმფრინავი მიფრინავდა დაახლოებით 8 კილომეტრის სიმაღლეზე, 519 კილომეტრი საათი სიჩქარით, რის შემდეგაც ვარდნა დაიწყო. დაშავებულებისა და დაღუპულების შესახებ ინფორმაცია ჯერჯერობით არ ვრცელდება.