მსახიობებს, ბაჩო ქაჯაიას და ანა ტყებუჩავას 5000-ლარიანი ჯარიმის გადახდა დაეკისრათ

თბილისის საქალაქო სასამართლოს მოსამართლემ, ნინო ენუქიძემ 9 იანვარს რუსთაველის გამზირის გადაკეტვა ადმინისტრაციულ სამართალდამრღვევებად ცნო და მსახიობებს, ბაჩო ქაჯაიას და ანა ტყებუჩავას 5000-ლარიანი ჯარიმის გადახდა დააკისრა.

როგორც მოსამართლემ განმარტა, მსახიობებმა ჯარიმა დადგენილების ჩაბარებიდან 7 დღის ვადაში უნდა გადაიხადონ, გასაჩივრება კი, თბილისის სააპელაციო სასამართლოში დადგენილების ჩაბარებიდან 10 დღის ვადაში შეეძლებათ.

გადაწყვეტილების გამოცხადებას შსს-ს წარმომადგენელი არ დასწრებია, რომელიც მსახიობების ადმინისტრაციულ სამართალდამრღვევებად ცნობას ითხოვდა.

როგორც ბაჩო ქაჯაია და ანა ტყებუჩავა აცხადებენ, 9 იანვარს რუსთაველის გამზირზე აქციას იმ დროს შეუერთდნენ, როდესაც ქუჩა უკვე გადაკეტილი იყო, რასაც კადრებიც ადასტურებს. გარდა ამისა, მსახიობების თქმით, გააჩნიათ ჩეკები, რომლებიც ადასტურებს, რომ რუსთაველის გადაკეტვის დროს კაფეში იმყოფებოდნენ.