აფგან მუხთარლიმ, ადამიანის უფლებათა ევროპულ სასამართლოში საქართველოსა და აზერბაიჯანის წინააღმდეგ დავა მოიგო

აზერბაიჯანელმა ჟურნალისტმა, აფგან მუხთარლიმ, ადამიანის უფლებათა ევროპულ სასამართლოში საქართველოსა და აზერბაიჯანის წინააღმდეგ დავა მოიგო. ევროსასამართლომ დაადგინა, რომ საქართველომ დაარღვია ადამიანის უფლებათა ევროპული კონვენციის მე-3 მუხლი წამების აკრძალვის შესახებ და მე-5 მუხლი, თავისუფლებისა და პირადი უსაფრთხოების უფლების შესახებ, - განმცხადებლის გატაცების, არასათანადო მოპყრობის შესახებ არაეფექტიანი გამოძიების ჩატარებით და აზერბაიჯანში მისი უკანონო ტრანსპორტირებით. თუმცა, განჩინებაში წერია, რომ სასამართლომ არ დაადგინა მე-3 და მე-5 მუხლების არსებითი "მატერიალური დარღვევა".

"მე ადამიანის უფლებათა ევროპული სასამართლოსგან ამ გადაწყვეტილებაში და გამარჯვებაში დარწმუნებული ვიყავი. ჩემი გატაცების საქმეზე გამოძიება სათანადოდ არ წარიმართა. მას შემდეგ, რაც გამტაცებლიდან ერთ-ერთი ამოვიცანი, მივედი პროკურატურაში და დავასახელე, თუმცა ჭეშმარიტების დასადგენად არაფერი გაკეთდა. ამ დრომდე არ ვიცი, რა ეტაპზეა გამოძიება. ისევ იმედი მაქვს და ყველაფერს გავაკეთებ, რომ სიმართლე სრულად დადგინდეს.“ - აცხადებს აფგან მუხთარლი.

საქართველოს ხელისუფლებამ მუხთარლის 12 500, აზერბაიჯანის ხელისუფლებამ კი 8 500 ევრო უნდა გადაუხადოს.