სომხეთის პრეზიდენტი საქართველოს ოფიციალური ვიზიტით ეწვევა

ხვალ, ორბელიანების სასახლეში, სომხეთის რესპუბლიკის პრეზიდენტის დახვედრის ოფიციალური ცერემონია გაიმართება, რის შემდეგაც ვაჰაგნ ხაჩატურიანს საქართველოს პრეზიდენტი სალომე ზურაბიშვილი პირისპირ შეხვდება.

დაგეგმილია პრეზიდენტების გაფართოებულ ფორმატში, დელეგაციების თანხლებით, შეხვედრა და მედიისთვის ერთობლივი განცხადებების გაკეთება.

ოფიციალური ვიზიტის ფარგლებში, სომხეთის რესპუბლიკის პრეზიდენტი შეხვედრებს გამართავს საქართველოს პრემიერ-მინისტრთან და პარლამენტის თავმჯდომარესთან.

ვაჰაგნ ხაჩატურიანი პატივს მიაგებს საქართველოს ერთიანობისათვის ბრძოლაში დაღუპულ გმირებს და მათ მემორიალს გვირგვინით შეამკობს.