კარლ ჰარცელი მოქმედებდა არა როგორც ელჩი, არამედ, პოლიტიკოსი - ირაკლი კობახიძე კარლ ჰარცელზე

„ევროპარლამენტარებთან შეხვედრაზე კითხვები დაისვა ევროკავშირის ელჩთან დაკავშირებით. ჩვენ უარყოფითად შევაფასეთ მისი რამდენიმეწლიანი საქმიანობა საქართველოში, რისთვისაც გვაქვს ძალიან მყარი საფუძველი“, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ გადაცემაში „იმედი LIVE“ განაცხადა.

მისი თქმით, ევროკავშირსა და საქართველოს შორის განვითარებულ ურთიერთობებში ჰარცელმა უარყოფითი როლი შეასრულა.

„ითქვა, რომ უმჯობესია პოლიტიკოსების მიმართ იყოს გამოთქმული კრიტიკა, ვიდრე დიპლომატების მიმართო და სწორედ ამაზე გვქონდა ჩვენ პასუხი - სწორედ იმის გამო, რომ ეს ადამიანი, კარლ ჰარცელი მოქმედებდა არა როგორც ელჩი, არამედ პოლიტიკოსი, გახდა აუცილებელი მისი საქმიანობის შეფასება ისე, როგორც შევაფასეთ. ევროკავშირს და საქართველოს შორის განვითარებულ ურთიერთობებში მან, სამწუხაროდ, ძალიან უარყოფითი როლი შეასრულა. უამრავი მაგალითი შეიძლება მოვიყვანოთ. შეგვიძლია პერიოდები გავიხსენოთ, რომელიც უკავშირდებოდა 8 მარტის შეთანხმების შემდგომ კვირებს, სადაც მას ჰქონდა ისეთი პოზიცია რაღაც თემასთან დაკავშირებით, რომელიც იყო სახელმწიფოსთვის შეურაცხმყოფელი. მეორე: 19 აპრილის შეთანხმება როდესაც განიხილებოდა, იქ მოლაპარაკებების დროს, გარკვეულ თემებზე მას ჰქონდა ისეთი პოზიცია, რომელიც იყო სახელმწიფოსთვის შეურაცხმყოფელი და ამის შემდეგაც იყო გარკვეული ეპიზოდები, სადაც ასეთი დამოკიდებულება დავინახეთ. დავინახეთ დამოკიდებულება, სადაც ის საქართველოს არ უყურებდა ბოლომდე როგორც სუვერენულ სახელმწიფოს. საჯაროდაც უამრავი განცხადება იყო, რაც უარყოფითად შეგვიძლია შევაფასოთ, მაგრამ კულისებში ხდებოდა იმაზე მეტი, ვიდრე საჯაროდ და ეს დამოკიდებულება იყო ძალიან საწყენი, რადგან საქართველო ყველას, განსაკუთრებით დიპლომატების მხრიდან უნდა იყოს დანახული, როგორც სუვერენული სახელმწიფო“, - აღნიშნა ირაკლი კობახიძემ.

ჰარცელის მიმართ დასმულ საკითხს ევროკავშირის საგარეო ურთიერთობების პრესსპიკერი, პიტერ სტანო გამოეხმაურა და განაცხადა, რომ ევროკავშირი სრულად უჭერს მხარს კარლ ჰარცელს, რომელმაც დიდი საქმე გასწია ევროკავშირი - საქართველოს ურთიერთობებისთვის.