ჩვენს მეგობარ უკრაინელ ხალხს ვუსურვებ დამოუკიდებლობას და ტერიტორიული მთლიანობის აღდგენას, Слава Україні - კობახიძე

ზუსტად ერთი წლის წინ უკრაინას უდიდესი ტრაგედია დაატყდა თავს, რასაც უკრაინელი ხალხი არ იმსახურებდა, – ამის შესახებ პარტია „ქართული ოცნების“ თავმჯდომარე ირაკლი კობახიძე სოციალურ ქსელში წერს.

„ომის შედეგად დაიღუპა ათი ათასობით უკრაინელი სამხედრო და სამოქალაქო პირი, მათ შორის, რაც განსაკუთრებით მტკივნეულია – 450-ზე მეტი ბავშვი. ლტოლვილად და დევნილად იქცა 16 მილიონი უკრაინელი. ომმა გაანადგურა უკრაინის ეკონომიკა და ინფრასტრუქტურა.

ომის დაწყებამდე ვამბობდით, რომ საერთაშორისო თანამეგობრობას ამ ომის არდასაშვებად და უდიდესი ტრაგედიის თავიდან ასაცილებლად ყველაფერი უნდა გაეკეთებინა. თუმცა, სამწუხაროდ, რუსეთის სამხედრო აგრესია მაინც შედგა.

უკრაინელი სამხედროები და მოხალისეები გმირულად იბრძვიან საკუთარი ქვეყნის დამოუკიდებლობისა და ტერიტორიული მთლიანობისათვის! ქედს ვიხრი მათი გმირობისა და თავდადების წინაშე! ჩვენ მეგობარ უკრაინელ ხალხს ვუსურვებ დამოუკიდებლობას და ტერიტორიული მთლიანობის აღდგენას! Слава Україні! “, – წერს ირაკლი კობახიძე.

ცნობისთვის, უკრაინაში ომის დაწყებიდან ერთი წელი გავიდა. ქალაქი, რომლის აღებაც პუტინს 3 დღეში სურდა ისევ დგას. ომის წლისთავზე კიევში უამრავ სტუმარს ელიან. იგეგმება საგანგებო სხდომა რადაში.

ზუსტად ერთი წლის წინ, გამთენიისას, დაახლოებით 6-ის ნახევარზე, პუტინის ბრძანებით, რუსულმა ძალებმა სუვერენული უკრაინის ტერიტორიაზე პირველი სარაკეტო იერიში მიიტანეს და საოკუპაციო ძალებმა დამოუკიდებელი ქვეყნის საზღვარი გადალახეს.

რუსული აგრესიის ერთი წლის თავზე ოკუპანტი ქვეყნის მთავარი სამიზნე ისევ დონეცკის ოლქის ქალაქი ბახმუტია. ბრძოლა ქალაქზე კონტროლის მოსაპოვებლად ამ დრომდე გრძელდება.რუსეთი ბახმუტის მიმართულებით მეორე მსოფლიო ომის შემდეგ ყველაზე მასშტაბურ სახმელეთო ოპერაციას ატარებს. უკრაინელი სამხედროების განცხადებით, დიდია ალბათობა, რომ ქალაქის აღმოსავლეთ ნაწილზე კონტროლი დაკარგონ. უკრაინულმა ძალებმა მარტო გასული ღამის განმავლობაში რუსული არმიის 90 იერიში მოიგერიეს.