„არ დამავიწყდება, როგორ გადიოდნენ საელჩოს ბაღში და ერთმანეთს ყურში ეჩურჩულებოდნენ“ - ვისზე საუბრობს შალვა ნათელაშვილი

„ლეიბორისტული პარტიის“ ლიდერი, შალვა ნათელაშვილი „დროას“, „გირჩი - მეტი თავისუფლების“ და „სტრატეგია აღმაშენებლის“ ინიციატივაზე საუბრობს, რომლებიც ყველა ოპოზიციურ პარტიას მოუწოდებენ, რომ გაერთიანდნენ.

ნათელაშვილი იხსენებს პერიოდს, როდესაც ამერიკის ელჩთან შეხვედრებს მართავდნენ.

„წყლის ნაყვაა. გაერთიანება სახეზე იყო. ყველა იქ იყო აბსოლუტურად. აერთიანებდათ საერთო მისწრაფება, რომ ივანიშვილი დაემარცხებინათ. აბსოლუტურად უანგარო გაერთიანება გახლდათ, საქართველოს ისტორიისთვის არნახული, რადგან ჩვენი ქვეყანა დააქციეს ამ პარტიულმა გაერთიანებებმა. მრგვალი მაგიდა გავიხსენოთ.

აი, ვინც დღეს გვიწვევს ახალ ბლოკში, ეს ორი ბატონი (ზურა ჯაფარიძე, გიორგი ვაშაძე) იყო ამ დიდი ეროვნული გაერთიანების დაშლის ინიციატორები. არ დამავიწყდება ამერიკის ელჩთან მათი ქცევა, რა იმედით უყურებდა ამერიკის ელჩი, რომ პარლამენტში შევიდოდნენ და შეუძღვებოდნენ ოპოზიციას. აი, ამ ორ სუბიექტს, გრძელი ენები რომ აბიათ ახლა. არ დამავიწყდება არც ის, როგორ გადიოდნენ საელჩოს ბაღში და ჭორაობდნენ ჭორიკანა ქალებივით, ყურში რომ ეჩურჩულებოდნენ ერთმანეთს, როგორ შესულიყვნენ პარლამენტში“, - განაცხადა ნათელაშვილმა.