უკრაინის თავდაცვის საკონტაქტო ჯგუფის შეხვედრა ნოემბერში გაიმართება

უკრაინის თავდაცვის საკონტაქტო ჯგუფის შეხვედრა, რომელიც გერმანიაში „რამშტაინის“ ავიაბაზაზე 12 ოქტომბერს უნდა გამართულიყო, ნოემბერში ჩატარდება. ინფორმაციას აშშ-ის თეთრი სახლი ავრცელებს.

როგორც ინფორმაციაშია აღნიშნული, საკონტაქტო ჯგუფის შეხვედრა ვირტუალურ ფორმატში გაიმართება და მას აშშ-ის პრეზიდენტი ჯო ბაიდენი გაუძღვება.

„2024 წლის ნოემბერში პრეზიდენტი ბაიდენი უკრაინის თავდაცვის საკონტაქტო ჯგუფის ქვეყნების ლიდერების დონეზე ვირტუალურ შეხვედრას გაუძღვება, სადაც ისინი საერთაშორისო პარტნიორებთან კოორდინაციაში უკრაინისთვის დამატებითი დახმარების შესახებ იმსჯელებენ“, - ნათქვამია განცხადებაში.

უკრაინის თავდაცვის საკითხებზე საკონტაქტო ჯგუფის შეხვედრა ქვეყნების ლიდერების დონეზე 12 ოქტომბერს გერმანიაში უნდა გამართულიყო, თუმცა იმ დროს აშშ-ში ქარიშხალ „მილტონის“ გამო ბაიდენმა ვიზიტი გადადო.