პუტინი ქალი რომ ყოფილიყო, არ დაიწყებდა გიჟურ „მაჩო-ომს“ და უკრაინაში არ შეიჭრებოდა - ჯონსონი

დიდი ბრიტანეთის პრემიერ-მინისტრმა, ბორის ჯონსონმა „ტოქსიკური მასკულინობის იდეალური მაგალითი“ უწოდა იმას, რასაც რუსეთის პრეზიდენტი ვლადიმირ პუტინი უკრაინაში აკეთებს. ამის შესახებ ჯონსონმა განუცხადა გერმანულ ტელეარხ ZDF-ს.

ბორის ჯონსონის თქმით, პუტინი ქალი რომ ყოფილიყო, არ დაიწყებდა „გიჟურ მაჩო-ომს“ და უკრაინაში არ შეიჭრებოდა.

გაერთიანებული სამეფოს პრემიერ-მინისტრმა ZDF-ს ინტერვიუ მისცა 28 ივნისს, „დიდი შვიდეულის“ წევრი სახელმწიფოების ლიდერთა სამიტის დასრულების შემდეგ. დიდი ბრიტანეთის, აშშ-ის, კანადის, გერმანიის, საფრანგეთის, იტალიის და იაპონიის ლიდერთა სამიტს 26-28 ივნისს, გერმანიამ უმასპინძლა. "დიდი შვიდეულის" ლიდერები შეთანხმდნენ, რომ უკრაინის დახმარება და რუსეთზე ზეწოლა გაგრძელდება, სანამ ეს საჭირო იქნება.