მოსკოვში დააჯარიმეს მოქალაქე, რომელსაც ქუდი და სამკერდე ნიშანი უკრაინის დროშის ფერებში ეკეთა

ყვითელი და ლურჯი ქუდისა და სამკერდე ნიშნისთვის მოსკოვის მკვიდრი 30 ათასი რუბლით დაჯარიმდა. ამის შესახებ უცხოური მედია წერს.

გამოცემის ცნობით, ქალს, „საჯარო ადგილას უკრაინის დროშის ფერებში შეღებული სამკერდე ნიშანი ეკეთა, რაც უარყოფით დამოკიდებულებას გამოხატავდა რუსეთის შეიარაღებული ძალების მიმართ“.

გარდა ამისა, რუსეთის პოლიციის ცნობით, ბრალდებულმა „ბლოგერების ყურადღება მიიპყრო“.

შეგახსენებთ, რუსეთში მოსახლეობის ნაწილმა უკრაინაში ომის წინააღმდეგ პროტესტი დაიწყო. საპროტესტო აქციაზე გამოსვლის გამო ამ დროისთვის დაკავებულია 15 000-ზე მეტი ადამიანი, დანარჩენ აქტივისტებს კი ეძებენ.

ომის საწინააღმდეგო აქციების მონაწილეებს როგორც ჯარიმები, ასევე სისხლისსამართლებრივი დევნა ემუქრებათ.