ზელენსკი ევროპულ ქვეყნებს მოუწოდებს, შეარჩიონ ერთი წარმომადგენელი, რომელიც რუსეთთან მომავალ სამშვიდობო მოლაპარაკებებში ევროპის სახელით მიიღებს მონაწილეობას

უკრაინის პრეზიდენტი ვოლოდიმირ ზელენსკი ევროპულ ქვეყნებს მოუწოდებს, ნოემბრის ბოლომდე შეარჩიონ ერთი წარმომადგენელი, რომელიც რუსეთთან მომავალ სამშვიდობო მოლაპარაკებებში ევროპის სახელით მიიღებს მონაწილეობას. ამის შესახებ ზელენსკიმ დანიაში ვიზიტის დროს განაცხადა.

უკრაინის პრეზიდენტის განცხადებით, მოლაპარაკებებში ევროპის ერთიანი პოზიციის წარმოდგენა კონტინენტის როლს გააძლიერებს, ამასთან, თითოეული ქვეყნის ხმა მნიშვნელოვანი და გადამწყვეტი იქნება.

„ვფიქრობ, ეს ნოემბერში უნდა მოხდეს და არა ნოემბრის ბოლოს. უნდა შევთანხმდეთ, ვინ წარმოადგენს ევროპას მოლაპარაკებებში. ეს უკეთესი იქნება, რადგან ამ ადამიანს მოლაპარაკებების მანდატი ექნება და მას მთელი ევროპისგან, მთელი ამ კოალიციისგან მიიღებს. ეს კარგია. ვგულისხმობ, რომ თითოეული ხმა ძალიან მნიშვნელოვანი და გადამწყვეტი იქნება“, – განაცხადა ზელენსკიმ.

ამასთან, უკრაინის პრეზიდენტმა აღნიშნა, რომ მოსკოვის არ სჯერა, თუმცა იმედი აქვს, რომ მისი ეჭვები არ გამართლდება.

„ჩვენ არ ვენდობით, მაგრამ იმედი გვაქვს, რომ ვცდებით. იმედის გარეშე ცხოვრება არ შეგვიძლია. ჩვენ ყოველთვის მხარს ვუჭერთ მოლაპარაკებებს, რადგან მუშაობა გვინდა. საჭიროა მეტი ზეწოლა. რუსეთზე ზეწოლა საკმარისი არ არის, ეს სიმართლეა. ვფიქრობ, რუსეთზე მეტი ზეწოლა და მათთან ნაკლები ბიზნესურთიერთობა უფრო სასარგებლო იქნება“, – აღნიშნა ზელენსკიმ.