მსოფლიო

VIDEO: "ხელი ძლიერად მომიჭირა, ალბათ, შველას მთხოვდა..." - ახალი დეტალები სკანდალური სასამართლო პროცესიდან

ყაზახეთის ეროვნული ეკონომიკის ყოფილი მინისტრის კუანდიკ ბიშიმბაევის სასამართლო პროცესზე, რომელიც ბრალდებულია მეუღლის, სალტანატ ნუკენოვას უკიდურესი სისასტიკით ჩადენილ მკვლელობაში, 11 აპრილს მეორე ბრალდებულმა, ბახიტჯან ბაიჯანოვმა ისაუბრა.

ბაიჯანოვი ბიშიმბაევის ნათესავი და BAU რესტორნის დირექტორია, სადაც მკვლელობა მოხდა. მას ბრალად დანაშაულის შეუტყობინებლობა ედება.

ბაიჯანოვმა თქვა, რომ გულწრფელად განიცდის, რადგან ახალგაზრდა ქალს პირადად იცნობდა.

მისი თქმით, 9 ნოემბერს მან რამდენჯერმე ნახა სალტანატი. დილით, ბრალდებულმა ის მხოლოდ შორიდან დაინახა, როცა რესტორნის VIP კაბინაში კარი შეაღო. თავდახრილ სალტანატს მარცხენა თვალი ჰქონდა შეშუპებული.

როგორც ბახიტჯან ბაიჯანოვმა ამბობს, მას 9 ნოემბერს, დილით, დაცვის თანამშრომელმა დაურეკა და უთხრა, რომ ბიშიმბაევი და ნუკენოვა მანქანით ცდილობდნენ წასვლას, თუმცა ნასვამმა ბიშიმბაევმა მანქანის მართვა ვერ შეძლო.

8:00 საათის შემდეგ, რესტორნის მენეჯერმა კარლიგაშ ალმაგამბეტოვამ დაურეკა ბაიჯანოვს და თქვა, რომ ბიშიმბაევი მთელი ღამე ყვიროდა და მუშაობის საშუალებას არ აძლევდა იმ ადამიანებს, რომლებიც რესტორანში რემონტს აკეთებდნენ.

იმ დღის ქრონოლოგიას რომ დავუბრუნდეთ, ბაიჯანოვმა თქვა, რომ დაახლოებით 9:30 საათზე ბიშიმბაევმა დაურეკა და რესტორანში დაიბარა. მეორე სართულზე რომ ავიდა, შეამჩნია, რომ ერთ-ერთ VIP ჯიხურში შუქი ენთო. ბრალდებულის მონაყოლის მიხედვით, ბიშიმბაევმა სთხოვა პლედის მოტანა.

მისი თქმით, ის VIP კაბინაში მხოლოდ მას შემდეგ შევიდა, რაც ბიშიმბაევმა დარეკა და უთხრა, რომ სახლში წასვლას აპირებდნენ. VIP კაბინაში შესვლის შემდეგ, ბაიჯანოვმა ბიშიმბაევთან ერთად სალტანატის ფეხზე წამოყენება სცადეს, ამ დროს, ქალმა, ბაიჯანოვის თქმით, ფეხზე წამოდგომა სცადა და ბაიჯანოვს ხელი მაგრად მოუჭირა,

"ალბათ, შველას მთხოვდა, მაშინ ამას ვერ მივხვდი, ახლა ასე ვფიქრობ,"- თქვა ბრალდებულმა.

მან ასევე თქვა, რომ მოგვიანებით, ბიშიმბაევის მითითებით, წაშალა ჩანაწერები რესტორანში დამონტაჟებული სათვალთვალო კამერებიდან.

დღის განმავლობაში, ბაიჯანოვმა, მისი თქმით, შესთავაზა ნუკენოვასთვის სასწრაფოს გამოძახება, მაგრამ ბიშიმბაევმა თქვა, რომ მას მხოლოდ ეძინა და დახმარება არ სჭირდებოდა.

თუმცა, საღამოს, როცა ბიშიმბაევმა დაუძახა და უთხრა , რომ სალტა აღარ სუნთქავდა, ბაიჟანოვმა გამოიძახა სასწრაფო. ამ დროს, ბიშიმბაევი ნათელმხილველს ესაუბრებოდა.