რისთვის დააჯილდოვა ვოლოდიმირ ზელენსკიმ ლანა ღვინჯილია

23 აგვისტოს, უკრაინის პრეზიდენტმა, ვოლოდიმირ ზელენსკიმ გამოსცა ბრძანება, რომლითაც უკრაინის წინაშე დამსახურებისთვის არაერთ ცნობილ ადამიანს გადასცა სახელმწიფო ჯილდო. მათ შორის არის ორი ქართველიც: წმინდა ოლგას მესამე ხარისხის ორდენით დაჯილდოვდა ანტისაოკუპაციო მოძრაობის „ძალა ერთობაშია“ გამგეობის წევრი ლანა ღვინჯილია (არასამთავრობო ორგანიზაციის Populus Rei-ს დამფუძნებელი და სააკაშვილის საპრეზიდენტო ბიბლიოთეკის განვითარების და საზოგადოებასთან ურთიერთობის ხელმძღვანელი) და ღირსების III ხარისხის ორდენი გადაეცა ცნობილ ქართველ მოდის დიზაინერს, „ბალენსიაგას“ მოდის სახლის კრეატიულ დირექტორს, უკრაინისთვის დახმარების მოზიდვის პლატფორმა - United24-ის ელჩს, დემნა გვასალიას.

ოკუპაცია ის მთავარი მიზეზია, რის გამოც ლანა ღვინჯილია განსაკუთრებულად გულშემატკივრობს უკრაინელ ხალხს და ამ ქვეყნის მომავალს. ლანა სოხუმში დაიბადა. მას აფხაზეთში, ბებიის სახლში ბავშვობის არაერთი წელი აქვს გატარებული. დღემდე, ნამდვილი სახლის შეგრძნებაც იქაურობას უკავშირდება.

„აი, ეს ვერ დავთმე ვერასდროს. და ალბათ, ეს არის ყველაფრის მიზეზიც და მამოძრავებელი ღირებულებაც. საერთოდ ყველაფრის, რასაც უკვე 31 წელია ვაკეთებ“, - ამბობს ლანა ღვინჯილია.

როცა 2022 წლის 24 თებერვალს, რუსეთმა უკრაინაში ომი დაიწყო, ანტისაოკუპაციო მოძრაობის წევრების დიდმა ნაწილმა, უკრაინაში საომრად წასვლა გადაწყვიტა. ამ ოცამდე ადამიანს სხვა მსურველებიც შეუერთდნენ. ამ ამბავს ორგანიზება სჭირდებოდა. უამრავი დეტალი იყო გასათვალისწინებელი და მოსაგვარებელი - უსაფრთხოების გარანტიები, მგზავრობა, საბუთების მომზადება, კავშირების მოძებნა.

„მთელი მარტი გავათენე“, - იხსენებს ლანა ღვინჯილია, რომელიც ამ საორგანიზაციო საქმეებს აგვარებდა.

ამ საქმეების ნაწილი იყო უკრაინის თავდაცვასთან მოლაპარაკებაც და ისიც, თუ პოლონეთის საზღვარზე ქართველი მოხალისეები როდის რომელ ავტობუსზე უნდა დამსხდარიყვნენ, რომ დანიშნულების ადგილამდე მიეღწიათ.

იმ პერიოდში ლანა და მისი მეგობრები უკრაინელების დახმარებას სხვა გზებითაც ცდილობდნენ - მაგალითად, საჭირო რესურსების მომარაგებით. ეს იყო არა სამხედრო აღჭურვილობა, არამედ სხვადასხვა აუცილებელი ნივთი, რაც ველზე მეომრებს სჭირდებოდათ:

„ეს ნივთები, აპრილში, პირადად ჩავიტანე კიევში“.

მაგრამ ამ ომამდე იყო 2014 წელი. კიევის „მაიდნის“ ცნობილი მოვლენები და შემდეგ ომი უკრაინის აღმოსავლეთში. ლანა ღვინჯილია მაშინაც აქტიურობდა და თითქმის ყველა საპროტესტო აქციის თუ სხვა პროცესის ორგანიზებაში იყო ჩართული.

როცა 2014 წლის თებერვალში, მაიდანზე გასროლას პირველი მსხვერპლი მოჰყვა, მისი ორგანიზებით თბილისში აქცია გაიმართა, რომელიც CNN-ის ეთერშიც გავიდა.

„იმავე წლის აგვისტოში, როცა დონბასში რუსული ჯარი შევიდა, ისევ დავიწყე ფიქრი, რა გვექნა. როგორ გამოგვეხატა ჩვენი პროტესტი და სწორედ მაშინ გამიჩნდა პუტინის ფოტოს დაწვის იდეა აქციაზე. მახსოვს, პარლამენტთან ორასამდე ადამიანი მოვიდა. ეს ვიდეოც მოხვდა მაშინ CNN-ის საიტზე. 32 000 ნახვა ჰქონდა“...

ლანა ფიქრობს, რომ, ალბათ, სწორედ მისი ეს საქმიანობა გახდა მიზეზი, რატომაც აღმოჩნდა იმ ადამიანების გვერდით, ვინც ვოლოდიმირ ზელენსკიმ უკრაინის მხარდაჭერისთვის დააჯილდოვა.

„ეს ამბავი რომ გავიგე, მხოლოდ მამიდაჩემს ვუთხარი. საჯაროდ არაფერი მითქვამს. მოგვიანებით სიაც გამოქვეყნდა და როცა ამ სიას ჩავხედე, მართლა შთაბეჭდილების ქვეშ ვიყავი, ისეთი ადამიანების გვერდით ამოვიკითხე ჩემი სახელი და გვარი. ცხადია, ეს სასიამოვნო ამბავია“, - უთხრა ლანა ღვინჯილიამ რადიო თავისუფლებას.

წყარო: რადიო თავისუფლება