პირის ღრუს დაავადებების სამკურნალოდ ანტიბიოტიკების ალტერნატივა აღმოაჩინეს - კვლევა

მძიმე პერიოდონტიტის მკურნალობისას ომეგა-3 ცხიმოვანი მჟავებისა და დაბალი დოზით ასპირინის კომბინაციამ ანტიბიოტიკების მსგავსი შედეგი აჩვენა. ამის შესახებ მკვლევრებმა სამეცნიერო ჟურნალ Journal of Periodontology-ში გამოქვეყნებულ კვლევაში განაცხადეს.

კვლევაში 109 პაციენტი მონაწილეობდა, რომლებსაც მძიმე პერიოდონტიტი ჰქონდათ. ყველა მათგანს პროფესიული კბილების წმენდა ჩაუტარდა, რის შემდეგაც სხვადასხვა მკურნალობის ჯგუფებში გადაანაწილეს.

ერთი წლის შემდეგ კლინიკური მიზნის მიღწევის მაჩვენებელი ანტიბიოტიკების ჯგუფში 58% იყო, ხოლო ომეგა-3-ისა და დაბალი დოზით ასპირინის მიმღებ პაციენტებში - 57.7%. საკონტროლო, პლაცებოს ჯგუფში კი ეს მაჩვენებელი მხოლოდ 23.1% აღმოჩნდა.

კვლევის კიდევ ერთი საინტერესო შედეგი ის იყო, რომ ანტიბიოტიკებისა და ომეგა-3-ისა და ასპირინის კომბინირებულმა გამოყენებამ დამატებითი სარგებელი არ აჩვენა.

მკვლევრების შეფასებით, მიღებული შედეგები პერსპექტიულია, განსაკუთრებით იმ პაციენტებისთვის, რომლებსაც ანტიბიოტიკების მიღება არ შეუძლიათ. ასეთი მიდგომის ფართოდ გამოყენებამ შესაძლოა მომავალში ანტიბიოტიკების ჭარბი გამოყენებისა და ანტიბიოტიკორეზისტენტობის პრობლემის შემცირებასაც შეუწყოს ხელი.

თუმცა, ომეგა-3-ისა და ასპირინის მიღება ანტიბიოტიკების ნაცვლად თვითნებურად არ უნდა დაიწყოთ - მკურნალობის სქემა ექიმმა უნდა განსაზღვროს.