გარდაიცვალა ქართველი პატიმარი, რომელიც ბელგიის იზოლატორში სამი კვირა შიმშილობდა - ახალი დეტალები

ბელგიაში გარდაცვლილი თავშესაფრის მაძიებელი საქართველოს მოქალაქე 40 წლის კაცია, რომელიც ანტვერპენის ოლქში მდებარე დაკავების ცენტრში იმყოფებოდა.

ადგილობრივი მედიის ინფორმაციით, მამაკაცი თავშესაფრის მიღებას და საფრანგეთში დაბრუნებას ცდილობდა, სადაც მას ოჯახი ჰყავს, თუმცა საფრანგეთის შესაბამისი უწყებები ამის უფლებას არ აძლევდნენ.

ამ ფაქტის გამო, ის ბოლო 3 კვირის განმავლობაში პროტესტის უკიდურეს ფორმას, შიმშილობას მიმართავდა და ის სამედიცინო პერსონალის მეთვალყურეობის ქვეშ იმყოფებოდა.

ადგილობრივი მედიის ინფორმაციით, დაკავებული გარდაცვალებამდე ნახევარი საათით ადრე შემოწმდა და მისი ჯანმრთელობის გაუარესებაზე არაფერი მიანიშნებდა. ბელგიელი ექიმების დასკვნით, პატიმარი ბუნებრივი სიკვდილით გარდაიცვალა.