ბრიტანეთში, შვიდი ახალშობილის მკვლელობაში ბრალდებული ექთნის საქმეზე გამოძიება გრძელდება - რატომ არ შეაჩერა მედიკოსი საავადმყოფოს ხელმძღვანელობამ საეჭვო შემთხვევების შემდეგ

ბრიტანეთში ახალშობილების მკვლელობაში მსჯავრდებული ექთნის, ლუსი ლეტბის საქმეზე ჩატარებულმა დამოუკიდებელმა გამოძიებამ საავადმყოფოს ხელმძღვანელობის სერიოზული ჩავარდნები გამოავლინა. ანგარიშის მიხედვით, ექიმების გაფრთხილებების დროულად გათვალისწინებისა და შესაბამისი პროცედურების ამოქმედების შემთხვევაში, შესაძლოა, რამდენიმე ახალშობილის სიცოცხლის გადარჩენა შესაძლებელი ყოფილიყო.

ლუსი ლეტბი 2023 წელს შვიდი ახალშობილის მკვლელობაში და კიდევ შვიდი ბავშვის მკვლელობის მცდელობაში დამნაშავედ ცნეს. დანაშაულები 2015 წლის ივნისიდან 2016 წლის ივნისამდე პერიოდში, ინგლისის ქალაქ ჩესტერში მდებარე საავადმყოფოში მოხდა. მას სამუდამო პატიმრობა მიესაჯა და სასჯელს ამჟამადაც იხდის.

ლეტბის საქმემ ბრიტანეთში დიდი გამოხმაურება გამოიწვია. თუმცა, მოგვიანებით დაწყებული დამოუკიდებელი გამოძიების მიზანი მისი მსჯავრის გადახედვა არ ყოფილა. კომისიას უნდა დაედგინა, რა ხდებოდა საავადმყოფოში, როგორ რეაგირებდა ხელმძღვანელობა ახალშობილების საეჭვო სიკვდილისა და გართულებების შემთხვევებზე და შეიძლებოდა თუ არა ტრაგედიის თავიდან აცილება.

გამოძიების დასკვნით, ექიმები ლეტბის საქმიანობასთან დაკავშირებით შეშფოთებას არაერთხელ გამოთქვამდნენ, თუმცა მათი გაფრთხილებები სათანადოდ და დროულად არ იქნა გათვალისწინებული. ლეტბის მორიგეობების პერიოდში ახალშობილების სიკვდილისა და მძიმე გართულებების შემთხვევების ზრდამ ექიმებში ეჭვები გააჩინა, თუმცა საავადმყოფოს ხელმძღვანელობამ შესაბამისი რეაგირება ვერ უზრუნველყო.

გამოძიების ხელმძღვანელმა, მოსამართლემ, საავადმყოფოში არსებული მართვის სისტემა და პაციენტების უსაფრთხოების დაცვის მექანიზმები მკაცრად გააკრიტიკა. ანგარიშში აღნიშნულია, რომ ხელმძღვანელობასა და კლინიკურ პერსონალს შორის მნიშვნელოვანი დაპირისპირება არსებობდა, რამაც პრობლემებზე ეფექტური რეაგირება კიდევ უფრო გაართულა.

დასკვნის მიხედვით, ლეტბის კლინიკური საქმიანობიდან უფრო ადრე ჩამოშორებას შესაძლოა სამი ბავშვის სიცოცხლე გადაერჩინა, ხოლო კიდევ შვიდი ახალშობილი შესაძლო საფრთხისგან დაეცვა.

გამოძიებამ ასევე დაადგინა, რომ საავადმყოფოს ხელმძღვანელობამ პოლიციას დროულად არ მიმართა. ლეტბის წინააღმდეგ ეჭვების გაძლიერების შემდეგაც კი, მისი საქმიანობის შეზღუდვისა და შესაძლო დანაშაულის გამოძიების საკითხზე გადაწყვეტილებები სათანადო სისწრაფით არ იქნა მიღებული.

ანგარიშის მიხედვით, ხელმძღვანელობის ნაწილი შესაძლო დანაშაულის სწრაფად გამოვლენაზე მეტად საავადმყოფოს რეპუტაციის დაცვაზე იყო ორიენტირებული. გამოძიების შეფასებით, ამან პოლიციისთვის მიმართვა და აუცილებელი ზომების მიღება შეაფერხა.

ამასთან, ლუსი ლეტბი სასამართლოს მიერ გამოტანილ განაჩენს არ აღიარებს და დანაშაულის ჩადენას უარყოფს. მისი საქმის გადახედვის მოთხოვნას ამჟამად ბრიტანეთის სისხლის სამართლის საქმეების გადახედვის კომისია განიხილავს.

ლეტბის საქმე ბრიტანეთის ისტორიაში ერთ-ერთ ყველაზე გახმაურებულ კრიმინალურ საქმედ რჩება. დამოუკიდებელი გამოძიების ახალი დასკვნები კი ყურადღებას ამახვილებს არა მხოლოდ თავად ლეტბის ქმედებებზე, არამედ იმ გარემოებებზეც, რომლებმაც შესაძლოა მისი დანაშაულებრივი საქმიანობის დროულად გამოვლენას ხელი შეუშალა.