ათენში 13 წლის გოგონას გატაცება სცადეს – დაკავებულია კაცი, რომელიც კიდევ ერთი არასრულწლოვნის გატაცების მცდელობაშია ბრალდებული

ათენში ბოლო დღეების მანძილზე არასრულწლოვანი ბავშვების გატაცების მცდელობის რამდენიმე შემთხვევა დაფიქსირდა.

ΣΚΑΙ-ის ინფორმაციით, პერისტერიში ამჯერად 13 წლის გოგონას გატაცება სცადეს, ინციდენტში ორი მამაკაცი მონაწილეობდა.

იქ მდებარე კამერების ჩანაწერებში ჩანს, რომ გოგონა გზაზე მიდის, რაღაც მომენტში კი, მის უკან ორი კაცი ჩნდება და სწორედ ამ დროს, მოზარდი სრულიად სხვა მხარეს უხვევს, რათა მათ თავი დააღწიოს.

როგორც ირკვევა, გოგონამ დახმარება გამვლელს სთხოვა, რომელმაც ხელი დაჰკიდა და დანიშნულების ადგილამდე მიიყვანა.

ისიც აღსანიშნავია, რომ გოგონამ შენიშნა გაჩერებული მანქანაც, რომელიც საკმაოდ საეჭვოდ გამოიყურებოდა, თუმცა, მძღოლმა ის მაშინვე დაძრა და წავიდა, როგორც კი დაინახა, რომ გოგონა ვიღაცასთან ერთად იყო.

აქვე აღსანიშნავია, რომ პოლიციამ არგირუპოოლში მამაკაცი დააკავა, არასრულწლოვნის გატაცების მცდელობის ბრალდებით, ამ შემთხვევაში საქმე აბსოლუტურად სხვა ბავშვს ეხებოდა.