ალექსანდრ დუგინის პირველი კომენტარი შვილის დაღუპვის შემდეგ - „ჩვენს ერს ასეთი გაუსაძლისი დარტყმებითაც კი ვერ გატეხენ“

ალექსანდრ დუგინი შვილის მკვლელობას გამოეხმაურა. დუგინი მომხდარს ტერაქტად აფასებს და მის მოწყობაში უკრაინის მთავრობას ადანაშაულებს.

„რუსეთის მტრებმა მალულად მოკლეს ის. მაგრამ ჩვენს ერს ასეთი გაუსაძლისი დარტყმებითაც კი ვერ გატეხენ. მათ სისხლიანი ტერორით სურდათ ჩვენი ნების ჩახშობა ყველაზე დაუცველებზე თავდასხმით, მაგრამ ისინი თავისას ვერ მიაღწევენ. ჩვენ არა მარტო შურისძიება გვინდა, ეს ძალიან ცოტაა, ჩვენ მხოლოდ გამარჯვება გვინდა, ამ გამარჯვებას შეეწირა ჩემი ქალიშვილი. ასე რომ, გაიმარჯვეთ, გთხოვთ. ჩვენ გვინდოდა, ის აღგვეზარდა ჭკვიან და გმირ ადამიანად. დაე, ახლა იყოს ის შთაგონება ჩვენი გმირობისთვის“, – ამბობს დუგინი.

ალექსანდრ დუგინის შვილი დარია დუგინა ორი დღის წინ მოსკოვის ოლქთან ავტმობილის აფეთქების დროს დაიღუპა. რუსეთის უსაფრთხოების ფედერალურ სამსახურში აცხადებენ, რომ დარია დუგინას მკვლელობა უკრაინის სპეცსამსახურების მიერ იყო მომზადებული.

უკრაინის პრეზიდენტის ადმინისტრაციის ხელმძღვანელის მრჩეველმა მიხაილ პოდოლიაკმა გუშინ ბრალდება უარყო და თქვა, რომ უკრაინის ხელისუფლებას დუგინის ქალიშვილის მკვლელობასთან კავშირი არ აქვს.