კანადაში, ბავშვმა მეტალოდეტექტორით თამაშის დროს ჩაძირული გემი იპოვა - ფოტოები

კანადაში, ბიჭმა მეტალოდეტექტორით ჰურონის ტბის სანაპიროზე ძველი ჩაძირული გემი იპოვა. ამის შესახებ უცხოური მედია წერს.

გამოცემის ცნობით, 2023 წელს, 8 წლის ლუკას ატჩისონის ოჯახი პარკში ისვენებდა. ბიჭმა აიღო მეტალოდეტექტორი, რომელიც ცოტა ხნის წინ აჩუქეს და თითქმის მაშინვე აღმოაჩინა ლითონის წვეტები სანაპიროზე.

„მამაჩემმა მითხრა: „ლუკას, ეს ჩაძირული ხომალდია. როდესაც დილით გამეღვიძა, არ მეგონა, რომ ჩაძირულ გემს ვიპოვიდი!“

ოჯახმა აღმოჩენის შესახებ პარკის თანამშრომლებსა და ონტარიოს საზღვაო მემკვიდრეობის კომიტეტის მოხალისეებს აცნობა. ნებართვების მიღების საჭიროების გამო, მათ გათხრები მხოლოდ ამ კვირაში დაიწყეს. მონაწილეებმა მუშაობა მძიმე ტექნიკით დაიწყეს და თანდათანობით ხელის ნიჩბებსა და ჯაგრისებზე გადავიდნენ.

საზღვაო ისტორიკოსმა ჟურნალისტებს განუცხადა, რომ ჯერჯერობით მათ გემის მცირე ნაწილი იპოვეს. გემის კორპუსის სტრუქტურის განივი ელემენტები მიუთითებს, რომ ეს შეიძლება შუნერი ყოფილიყო.

გუნდის მიერ განხილული ერთ-ერთი ვარიანტია შუნერი „სენტ-ენტონი“, რომელიც 1856 წლის ოქტომბერში ჩაიძირა. მარცვლეულით დატვირთული გემი ჩიკაგოდან ბუფალოში მიდიოდა.

მას შემდეგ, რაც მოხალისეები შუნერის ასაკს დაადგენენ, ისინი მას ხელახლა დამარხავენ, რათა დაიცვან გემი პარაზიტებისა და სხვა ორგანიზმებისგან, რომლებმაც შეიძლება ზიანი მიაყენონ. ეს საშუალებას მისცემს გემის სტრუქტურას კიდევ 50 წლის განმავლობაში შენარჩუნდეს.