საქართველოს 19-წლამდე ნაკრებმა ელიტრაუნდის საგზური მოიპოვა

საქართველოს 19-წლამდე ნაკრები ევროპის ჩემპიონატის საკვალიფიკაციო რაუნდში ესტონეთს დაუპირისპირდა, 1:1 ითამაშა და ელიტრაუნდში გავიდა.

ჯგუფური ეტაპის პირველ ორ ტურში ჩვენმა გუნდმა 3 ქულა დააგროვა და მეორე ადგილზე იყო. ამდენივე ქულით, მაგრამ დამატებითი მაჩვენებლებით (ბურთები) ესტონეთი მესამე პოზიციას იკავებდა. ამდენად, ეს მატჩი ფინალის ტოლფასი იყო – ჩვენი გუნდი ფრეს შემთხვევაშიც ელიტრაუნდში გადიოდა.

შვედეთის ქალაქ ბუროსის „ბუროს-არენაზე“ გამართული მატჩი დაძაბული გამოდგა. მე-17 წუთზე ჩვენი გუნდის კარში პენალტი დაინიშნა, რომელიც მაკსიმ კალიმულინმა გოლად გარდასახა. თუმცა, პატარა „ჯვაროსნებმა“ წონასწორობა პირველივე ტაიმში აღადგინეს. 41-ე წუთზე ესტონელების კართან განვითარებული შეტევა იმით დასრულდა, რომ ოსკარ პიჰელამ ბურთი საკუთარ კარში ჩაჭრა.

მეორე ტაიმში ანგარიში აღარ შეცვლილა, ლაშა ფირცხალაიშვილის გუნდმა ჯგუფი 4 ქულით დაასრულა, ისევე როგორც ესტონეთმა, მაგრამ მეტი ბურთის წყალობით მეორე ადგილზე გავედით და ელიტრაუნდში თამაშის უფლება მოვიპოვეთ. 1tvsport