რუსთავში ავტომობილი აფეთქდა - დაშავდა ორი ადამიანი

რუსთავში, თოდრიას ქუჩაზე ავტომობილი აფეთქდა. ამის შესახებ ინფორმაციას ,,ინფო რუსთავი" ავრცელებს.

როგორც სააგენტოს ერთ-ერთმა თვითმხილველმა განუცხადა, ავტომობილში მძღოლი ჩაჯდა, სიგარეტს მოუკიდა, რა დროსაც აფეთქება მოხდა. მისივე თქმით, სავარაუდოდ, ავტომობილში დამონტაჟებული გაზის ბალონიდან ბუნებრივმა აირმა გაჟონა.

შემთხვევის დროს დაშავდა ორი ადამიანი. ერთ-ერთია ავტომობილის მძღოლი, რომელმაც სახეზე დამწვრობა მიიღო, ხოლო მეორე გამვლელი ქალია.

ქალი სასწრაფო დახმარების ეკიპაჟმა კლინიკა "რუსთავში" გადაიყვანა. სააგენტოს ცნობით, დაშავებულს სერიოზული დაზიანებები არ აღენიშნება და მას გამოკვლევები უტარდება.

შემთხვევის ადგილზე მობილიზებული იყო სახანძრო-სამაშველო, საპატრულო და კრიმინალური პოლიციის ეკიპაჟები.