„ყველაფერი არ უნდა შეუსრულო ბავშვს..." - ფსიქოლოგი თამარ გაგოშიძე აღზრდის მეთოდებზე

გადაცემაში „დილა მშვიდობისა საქართველო“ ერთ-ერთი სტუმრობის დროს, თამარ გაგოშიძემ აღზრდის მეთოდებზე ისაუბრა და თქვა, რომ მშობლებმა ბავშვს ყველა მოთხოვნა არ უნდა შეუსრულონ:

„ზოგადად, ნეგატიური ემოციების გვეშინია და ვცდილობთ რომ ჩავახშოთ, რათა ბავშვმა არ იტიროს. უცნაურია, მაგრამ ჩვენ მშობლებს პირიქით ვურჩევთ – არ ვეუბნებით, რომ არ იტირო, არ ვახშობთ, პირიქით, ვახმოვანებთ და ბავშვს ვეუბნებით: „მე მესმის, რომ გეწყინა, მესმის, რომ გაბრაზდი“. გვეშინია და ვცდილობთ, რომ ჩავახშოთ, ოღონდ ეს რეაქცია არ ჰქონდეს და ყველაფერზე წამსვლელები ვართ: შევუსრულოთ ყველაფერი, მივყვეთ მის სურვილებს, ამით ჩვენ მათ დათვურ სამსახურს ვუწევთ. ხშირად გვსმენია: „ბავშვს ნერვები არ მოეშალოს, არ ატიროთ“ – ბავშვი იმისთვის არის, რომ იტიროს და იმისთვის არის, რომ ამ ტირილით შეგატყობინოს. სწორი მიდგომა არის ეს – ჩვენ არ უგულებელვყოფთ ბავშვის ემოციას, მაგრამ სოციალიზაციისთვის და იმისთვის, რომ ნებელობა გამოიმუშაოს, მის სურვილებზე ყოველთვის არ მივდივართ და ვავარჯიშებთ – ეს ჩვეულებრივი ვარჯიშია.პოზიტიური მშობლობა არ ნიშნავს იმას, რომ ბავშვს ყველაფერი უნდა შეუსრულო, იმიტომ კი არა რომ ბოროტები ვართ, იმიტომ, რომ მისმა ტვინმა უნდა ივარჯიშოს. სპეციალურადაც კი შეიძლება შეუქმნა დისკომფორტი და ასწავლო, როგორ გადალახოს ის, ოღონდ, ცხადია, ეს არ უნდა იყოს შეუქცევადი სტრესი“, – აღნიშნავს თამარ გაგოშიძე.