„სიზმარი მეგონა... ადამიანები უმისამართოდ დარბოდნენ და ყვიროდნენ... მე ფეხში მომხვდა“ - რას ჰყვება ტრაგედიას გადარჩენილი

6 დაღუპული და 5 დაშვებული - უმძიმესი ღამე საგარეჯოში. რუსთაველისა და კოსტავას ქუჩების კვეთაზე მდებარე საცხოვრებელი კორპუსის აივნიდან სროლა ღამის პირველი საათისთვის დაიწყო.

თავდამსხმელმა, ყოფილმა სამხედრომ ცეცხლი რამდენიმე მხრიდან გახსნა. დაღუპულთა შორის არის საპატრულო პოლიციის თანამშრომელი. 

დაშავებულთა შორის არის ვალერი მათიაშვილი , „გირჩი - მეტი თავისულფბის“  წევრი. იგი ტრაგედიის ღამეს იხსენებს. მან მაღაზიაში შესვლა მოასწრო და ტყვია მხოლოდ ფეხში მოხვდა. 

„პირველ რიგში ვუსამძიმრებ გარდაცვლილთა ოჯახებს. საიდან დავიწყო მართლა არ ვიცი იმდენად შოკისმომგვრელი იყო. ბოლომდე მჯეროდა რომ სიზმარი იქნებოდა. უცბად ატყდა სროლა. ადამიანები უმისამართოდ დარბოდნენ და ყვიროდნენ - დაიმალეთ, დაწექით.

პირველი რაც ვიფიქრე ის იყო, რომ თავშესაფარი უნდა მომეძებნა, შევედი მაღაზიაში და შესვლის მომენტში მომხვდა ფეხში. იმის მერე შენობის უკან ვიყავი გადასული. გარეთ გამოსვლა შეუძლებელი იყო. მალევე პოლიცია მოვიდა და როგორც გაიირკვა, პოლიციელსაც ესროლა.

არ ვიცი რა ლოგიკით, ყველას მიმართ ისროდა. მე პირადად მაგ ადამიანს არ ვიცნობდი და პირად უთანხმოებასაც ვერ დავუკავშირებ. უბრალოდ ყვეალს ესროდა, ვისაც ქუჩაში დაინახავდა. ყველა ცდილობდა, რომ რაღაცას ამოფარებოდა...“,- ამბობს დაშავებული „ტვ პირველთან“ საუბრისას. 

როგორც ვალერი ჰყვება, მასთან მყოფმა ადამიანებმა მიიღეს გადაწყვეტილება, რომ სასწრაფოს აღარ დალოდებოდნენ და საკუთარი ძალებით წასულიყვნენ საავადმყოფოში, რადგან მისივე თქმით, იქ ვინმეს ზედემტად მისვლა, უფრო მეტ მსხვერპლს გამოიწვევდა. 

შეგახსენებთ, ტრაგედია საგარეჯოში 19 იანვარს მოხდა. პირი, რომელიც საგარეჯოს ცენტრში ისროდა, 48 წლის ნოდარ ათუაშვილი იყო. ყოფილი სამხედრო თავდაცვის სამინისტროს 2006-21 წლებში მუშაობდა. მონაწილეობდა ავღანეთის მისიაშიც.

საგარეჯოში სპეცოპერაცია რამდენიმე საათის განმავლობაში მიმდინარეობდა. ადგილზე იმყოფებოდა შინაგან საქმეთა მინისტრი ვახტანგ გომელაური.