ქუთაისის საერთაშორისო უნივერსიტეტში გელათის მონასტრის მსოფლიო მემკვიდრეობის ძეგლის კედლის მხატვრობისა და მოზაიკის საკონსერვაციო პროგრამების საანგარიშო ღონისძიება გაიმართა

გელათის რეაბილიტაციის დროებითი კომიტეტის ორგანიზებით, ქუთაისის საერთაშორისო უნივერსიტეტში გელათის მონასტრის მსოფლიო მემკვიდრეობის ძეგლის კედლის მხატვრობისა და მოზაიკის საკონსერვაციო პროგრამების საანგარიშო ღონისძიება გაიმართა.

ღონისძიებაზე სიტყვით გამოვიდნენ საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო, საქართველოს პრემიერ-მინისტრი ირაკლი კობახიძე, ეროვნული მუზეუმის გენერალური დირექტორი დავით ლორთქიფანიძე.

დამსწრე საზოგადოებას მიესალმა ქუთაისის საერთაშორისო უნივერსიტეტის რექტორი გიორგი ხუბუა.

მთავარი მომხსენებლები იყვნენ კედლის მხატვრობის კონსერვაციის ბრიტანელი ექსპერტი სტივენ რიკერბი და მოზაიკის კონსერვაციის იტალიელი ექსპერტი, პროფესორი რობერტო ნარდი, რომლებმაც გელათის მონასტრის მსოფლიო მემკვიდრეობის ძეგლის რეაბილიტაციის ორი ძირითადი მიმართულების - კედლის მხატვრობისა და მოზაიკის კონსერვაციის მიმდინარე პროგრამის ანგარიში წარადგინეს.

სიტყვით გამოსვლისას საქართველოს კულტურის მინისტრმა თინათინ რუხაძემ მადლობა გადაუხადა საქართველოს მთავრობას, რომელმაც თავიდანვე სრული მხარდაჭერა აღუთქვა ამ საშვილიშვილო საქმეს და იმედი გამოთქვა, რომ გელათის რეაბილიტაციის კომიტეტი სამეცნიერო, საეკლესიო და სამთავრობო მხარდაჭერით, მალე მივა ხელშესახებ შედეგამდე და ეს შედეგი იქნება გადარჩენილი გელათი ჩვენი მომავალი თაობებისთვის, ჩვენი ღირსებისთვის, იდენტობისთვის და ყველა იმ ფასეულობისთვის, რაც ამართლებს ჩვენი, როგორც ერთ-ერთი უძველესი ერის და უძველესი კულტურის არსებობას.

ინფორმაციას კულტურის სამინისტრო ავრცელებს.