ცნობილია მამაკაცის ვინაობა, რომლის ცხედარი წერილთან ერთად გუდაურში, სასტუმროს ნომერში იპოვეს

გუდაურში სასტუმრო „თვინსმა“ მუშაობა დროებით შეაჩერა. მიზეზი ტურისტის გარდაცვალება გახდა. მამაკაცის ცხედარი სასტუმროს ნომერში პერსონალმა იპოვა. მას აბაზანაში ვენები ჰქონდა გადაჭრილი. „პრაიმტაიმმა“ გაარკვია გარდაცვლილის ვინაობა. ის 27 წლის შონ ტეკოისია. რუსეთის მოქალაქე საქართველოში დაახლოებით 10 დღის წინ, სავარაუდოდ ლარსის გამშვები პუნქტიდან შემოვიდა და მთელი ეს პერიოდი გუდაურში იმყოფებოდა.

ცნობილი გახდა იმ წერილის შინაარსიც, რომელიც გარდაცვლილმა თვითმკვლელობამდე დაწერა. ირკვევა, რომ შონ ტეკოისი პუტინის მმართველობას არ იზიარებდა და აკრიტიკებდა რუსეთის მიერ წარმოებულ ომს უკრაინაში. ახალგაზრდა მამაკაცმა წერილში უკანასკნელ სურვილიც გაამჟღავნა.

„არ გადამასვენოთ იმ საძულველ ქვეყანაში, პუტინის რუსეთში. აქ დავასრულე ყველაფერი და აქვე დამმარხეთ, საქართველოში. ყველაფერი მძულს, რაც აგრესიას უკავშირდება, მათ შორის ის ომებიც, რომლებიც ჩემს ქვეყანას ჯერ საქართველოსთან, ახლა კი უკრაინასთან აქვს.“

სასტუმროს თანამშრომლები მომხდარის შესახებ მედიასთან კომენტარს არ აკეთებენ, პირად საუბრებში კი ყვებიან, რომ მამაკაცი საქართველოში მარტო იყო ჩამოსული და არასდროს მალავდა უკმაყოფილებას რუსეთის აგრესიული პოლიტიკის მიმართ.

შინაგან საქმეთა სამინისტრო ფაქტს თვითმკვლელობამდე მიყვანის მუხლით იძიებს. გარდაცვლილის ცხედარი, თბილისში ექსპერტიზაზე გადაასვენეს.