საშხაპის მინა იდეალურად რომ გამოიყურებოდეს - მეთოდი, რომელიც საპნის ლაქებს და მინერალურ ნადებს მოაშორებს

შუშის საშხაპე კაბინის რეგულარული წმენდა აუცილებელია მათი გამჭვირვალობის შესანარჩუნებლად და მუდმივი დაზიანებებისა თუ ნაკაწრებისგან დასაცავად. Southern Living-მა გამოაქვეყნა სტატია, სადაც ექსპერტები საკუთარ რჩევებს გვიზიარებენ.

„შუშაზე საპნის ლაქებისა და მინერალური ნადების დატოვება იგივეა, რაც თეთრ პერანგზე წითელი ღვინის დაღვრა: რაც უფრო დიდხანს უგულებელყოფთ, მით უარესდება მდგომარეობა. რეგულარული მოვლა იცავს მინას ნადებისგან გამოწვეული დაზიანებისგან და მარტივ გაწმენდას არ აქცევს სრულმასშტაბიან აღდგენით სამუშაოდ“, - აღნიშნა სახლების დასუფთავების სერვის Tidy Casa-ს დამფუძნებელმა რაიან ნოლმა.

ამასთან, კომპანია Glass Doctor-ის პრეზიდენტი ჯერემი სიბლი ურჩევს, საშხაპე კაბინის შუშა და სააბაზანოს ფანჯრები კვირაში ერთხელ მაინც გაირეცხოს, რადგან იქ შეიძლება ობი გაჩნდეს.
„მცირე ძალისხმევით, შხაპის შემდეგ სკრეპერის გამოყენებით ან კვირაში ერთხელ ღრუბლით გაწმენდით შესაძლებელია თავიდან ავიცილოთ მყარი წყლის ნადების დაგროვება“ - განმარტა მან.

თუმცა მნიშვნელოვანია გახსოვდეთ, რომ ყველა შუშის კარი ერთნაირი არ არის. ზოგიერთ მათგანს აქვს სპეციალური საფარი, რომელიც წყალს ან თითის ანაბეჭდებს არ ტოვებს.

„არასწორი საწმენდი საშუალების გამოყენებამ შესაძლოა დააზიანოს ეს საფარი ან მინა დაკაწროს. ყოველთვის წინასწარ გამოცადეთ“, - გვაფრთხილებს ექსპერტი.

რა დაგჭირდებათ:
სპრეის ბოთლი;
დისტილირებული თეთრი ძმარი;
ჭურჭლის სარეცხი სითხე;
ღრუბელი ან რბილი საწმენდი ღრუბელი;
საჭმელი სოდა;
მიკროფიბერის პირსახოცი;
სკრეპერი.
რა უნდა გააკეთოთ:
სპრეის ბოთლში თანაბარი რაოდენობით აურიეთ ძმარი და ჭურჭლის სარეცხი სითხე. ხსნარი უხვად შეასხურეთ საშხაპე კაბინის შუშის კარებს და დატოვეთ 10–15 წუთით, რათა ჭუჭყი და მინერალური ნადები დაიშალოს.

„კარი გაწმინდეთ არაბრაზიული ან რბილი ღრუბლით. შემდეგ კარგად ჩამორეცხეთ თბილი წყლით ნარჩენების მოსაშორებლად და გააშრეთ მიკროფიბერის პირსახოცით, რათა ზოლები არ დარჩეს“,  - გვირჩევენ ექსპერტები.

რამდენად ხშირად უნდა გაიწმინდოს საშხაპე კაბინის შუშის კარი?იდეალურ შემთხვევაში, ექსპერტები გვირჩევენ, რომ საშხაპის მინა კვირაში ერთხელ გაიწმინდოს.