ამ ტესტით გაიგებთ, რამდენად აისახება ასაკი თქვენს სხეულზე - სულ 30 წამი დაგჭირდებათ

 დაბერებას სახასიათო ნიშნები ახლავს თან, მაგალითად მოძრაობის შეზღუდვა. დროის საკითხია, როდის შეგვაწუხებს მსგავსი რამ, პრობლემის გამოსავლენად კი ერთი მარტივი ტესტის გაკეთება შეგიძლიათ.

ეს ე.წ. დაჯდომა-ადგომის ტესტის ერთ-ერთი ტიპია, რომლის შესასრულებლადაც სულ რაღაც 30 წამი დაგჭირდებათ. აუცილებელია მხოლოდ წამმზომი და მკლავების დასაყრდნობის გარეშე სკამი, რომელსაც სწორი საზურგე აქვს. ამ ნახევარი წუთის განმავლობაში უბრალოდ სკამზე დაჯდომა და ადგომა უნდა გაიმეოროთ იმდენჯერ, რამდენჯერაც მოასწრებთ.

მეცნიერული კვლევებით დადგენილია, რომ დაჯდომა-ადგომის ტესტით ქვედა კიდურების სიძლიერე მართლაც განისაზღვრება, მაგრამ შედეგების შესაფასებლად სხვა ფაქტორებიც გასათვალისწინებელია. დაავადებათა კონტროლისა და პრევენციის ცენტრების ინფორმაციით, 60-64 წლის კაცებში ტესტის საშუალი მაჩვენებელი 14-ია, ქალებისა კი — 12. ესაა რაოდენობა, რამდენჯერაც ადამიანმა 30 წამში ადგომა და დაჯდომა მოასწრო. აღნიშნული რიცხვი ასაკის მატების პარალელურად იკლებს და 85-89 წლის ასაკში უკვე 8-მდე ჩამოდის.

იხილეთ ცხრილი, რომელშიც პირველი სვეტი ასაკს გვიჩვენებს, მეორე კაცების საშუალო მაჩვენებელს, ხოლო მესამე — ქალებისას:

60-64 < 14 < 12
65-69 < 12 < 11
70-74 < 12 < 10
75-79 < 11 < 10
80-84 < 10 < 9
85-89 < 8 < 8
90-94 < 7 < 4

 ამ ტესტის სხვა ვარიაციებიც არსებობს, რომელთაგანაც ზოგი უფრო მრავალფეროვან მოძრაობას მოიცავს. კერძოდ, ასეთია ძირს დაჯდომა და შემდეგ ადგომა. მსგავსი ტესტებით ვიგებთ, რამდენადაა შენარჩუნებული ქვედა კიდურების თავისუფლად მოძრაობის უნარი, ვინაიდან ეს ბევრი მნიშვნელოვანი კუნთის ჩართულობას საჭიროებს.

აღნიშნული ტესტი ქვედა კიდურების სიძლიერისა და სტაბილურობის განსასაზღვრად ფართოდ მიღებული და გამოყენებადი მეთოდია. ის დანერგილია როგორც ფიზიოთერაპიაში, ისე ოკუპაციურ თერაპიასა და რეაბილიტაციაში. ეს ტესტი 1990-იან წლებში შეიმუშავეს და კლინიკურ პრაქტიკებში ჩართეს.

ტესტის გაკეთება ასაკის მიუხედავად ყველას შეუძლია. თუკი მიყოლებით დაჯდომასა და ადგომას ბევრჯერ ვერ ახერხებთ, ფეხებისა და მუხლების სპეციალური ვარჯიშების შესრულებაა რეკომენდებული, რათა კიდურები გააძლიეროთ. ასევე, ეფექტიანია სიარული. 17 ნაშრომზე დაყრდნობით, ერთ-ერთი კვლევის ფარგლებში, დაადგინეს, რომ დღეში მხოლოდ 4 000 ნაბიჯის გადადგმა ნებისმიერი მიზეზით სიკვდილის რისკს ამცირებს, ამის დაახლოებით ნახევარი კი — გულსისხლძარღვთა დაავადებებით სიკვდილისას.